הויף סטריקאוו

נאך דער פטירה דער ישמח ישראל פון אלעקסאנדער, וואס האט נישט איבערגעלאזט קיין קינדער, זענען די מערהייט פון זיינע חסידים אריבער צו זיין ברודער דער תפארת שמואל און א טייל חסידים זענען אריבער צו רבי אהרן צבי לאנדא פון ביאלע. נאך זיין פטירה האט זיך זיין ברודער רבי אלימלך מנחם מענדיל באזעצט אין סטריקאוו, וואו ער האט אויפגעשטעלט זיין הויף.

היינט זענען דא צוויי סטריקאווער רביס, רבי דוד בראנדער אין בני ברק און רבי יעקב דן שטערן אין ירושלים.

 

• רבי אלימלך מנחם מענדל לאנדא פון סטריקאוו (נפ' י"ט שבט תרצ"ו), דער "אלטער רבי" פון סטריקאוו—זון פון רבי בעריש ביאלער, רבי פון די ווארקער חסידים
  • רבי יעקב יצחק דן לאנדא פון סטריקאוו (תרמ"ב- מרחשון תש"ד)—זון פון רבי אלימלך מנחם מענדל
    • רבי אברהם אביגדור נחום לאנדא פון סטריקאוו (תרע"ז- ט"ז אלול תשס"א)—זון פון רבי יעקב יצחק דן
      • רבי דוד בראנדער פון סטריקאוו-בני ברק—איידעם פון רבי אברהם אביגדור נחום
      • רבי יעקב דן שטערן פון סטריקאוו-ירושלים—אייניקל פון רבי אברהם אביגדור נחום

 

נאך דער פטירה פון דער ישמח ישראל, האבן א טייל פון זיינע חסידים געוואלט מכתיר זיין רבי אהרן צבי לאנדא פון ביאלע (א זון פון רבי דוב בעריש ביאלער). זיין מוטער האט זיך שטארק דערקעגנט, מיט דער טענה אז ווערן א רבי איז א סכנה פאר איר זון, אבער ער האט נאכגעגעבן דעם דרוק פון די חסידים און האט אויף זיך גענומען די רביסטעווע אין שעדליץ י"ד שבט תר"ע. זיין מוטער איז אבער געווען גערעכט, פיר חדשים נאכהער איז ער נפטר געווארן דעם צווייטן טאג שבועות תר"ע.

זיין ברודער רבי אלימלך מנחם מענדל האט איבערגענומען די הנהגה פון אים און האט זיך באזעצט אין סטריקאוו.ביי דער ערשטער וועלט מלחמה האט רבי אלימלך מנחם מענדל האט ער געוואוינט אין זגיערזש. ער איז נפטר געווארן אין תרצ"ו אין אטוואצק.

נאך זיין פטירה האט מען מכתיר געווען זיין זון רבי יעקב יצחק דן זיין ממלא מקום. רבי יעקב יצחק דן איז אומגעקומען צוזאמען מיט דער מערהייט פון זיינע חסידים אינעם חורבן אייראפע. זיין זון רבי אברהם אביגדור נחום איז געראטעוועט געווארן ווען ער איז אנטלאפן אין ווילנע, וואו ער האט געלערנט ביי רבי יצחק זאב הלוי סאלאווייטשיק, דער בריסקער רב; אין תש"א (1941) איז ער ארויף מיט זיין רבי'ן קיין ארץ ישראל.

אין תש"ח האבן די איבערגעבליבענע חסידים מכתיר געווען רבי אברהם אביגדור נחום צו פירן ווייטער דאס חסידות. אין זיינע יארן האט מען אויפגעשטעלט שטיבלעך אין תל אביב און בני ברק, אחוץ דעם אלטן סטריקאווער בית מדרש אין ירושלים, וואס דער אלטער סטריקאווער רבי האט געגרינדעט בשעת ער איז געווען אין ארץ ישראל. אין תשמ"ו איז רבי אברהם אביגדור נחום אריבער פון תל אביב, וואו ער האט געוואוינט צענדליקע יארן, קיין בני ברק, און האט באשטימט זיין בית מדרש אין דער אלשיך גאס. אין תש"ן האט רבי אברהם אביגדור נחום געעפנט אין בני ברק די ישיבה "קול יעקב סטריקוב", אויף זיין פאטערס נאמען. אין דער פירערשאפט פון דער ישיבה האט ער באשטימט זיינע דריי איידעמעס, רבי משה שמואל שטערן (זון פונעם ביליצער רב), רבי ישעיהו פרענקל-תאומים(רב פונעם קראקעווער בית מדרש) און רבי דוד בראנדער (זון פון רבי שלום בראנדער בעלזער ראש ישיבה). אין תשנ"ב האט מען געבויט א ניי שטיבל אין ירושלים, אין ביי דער חנוכת הבית האט רבי אברהם אביגדור נחום מכתיר געווען זיין עלצטע אייניקל רבי יעקב דן שטערן רב פונעם שטיבל.

נאך דער פטירה פון אברהם אביגדור נחום ט"ז אלול תשס"א אן קיין זין, און אן א צוואה ווער זאל אים נאכפאלגן, האט דאס חסידות זיך צעטיילט. רוב פון די חסידים האבן מכתיר געווען זיין יונגסטן איידעם רבי דוד בראנדער אין זיין בית מדרש אין בני ברק; אויך דער גרויסער בית מדרש אין ירושלים איז אונטער אים. אן אנדער טייל חסידים האט מכתיר געווען רבי יעקב דן שטערן, דעם אייניקל פון רבי אברהם אביגדור (ער איז א זון פון זיין איידעם רבי משה שטערן און אן איידעם ביי רבי מנחם נחום בן רבי יוחנן טווערסקי פון רחמסטריווקא), וואס פירט זיין הויף אין דעם שטיבל אין ירושלים. אויך האט ער א שטיבל אין בני ברק, וואו זיין פאטער רבי משה שטערן איז רב.