Waasserstoff: Cheemescht Element

Seng relativ Atommass ass 1,00794.

Et ass vun allen Elementer dat mat der niddregster Atommass. Waasserstoff besteet nëmmen aus engem Kär mat engem Proton an engem Elektron dee ronderëm de Kär dréint. Et ass dat heefegst Element am Universum (93 % vun der Mass vun allen Atomen). Stären (an domat och d'Sonn) bestinn haaptsächlech aus Waasserstoff. All anert Element ass am Laf vun der Zäit aus Waasserstoff gebilt ginn.

Ënner de Bedéngunge wéi se normalerweis op der Äerd virkommen, kënnt net dësen atomare Waasserstoff vir, mä seng dimeriséiert Form, de molekulare Waasserstoff H₂, wat e Gas ouni Faarf a Geroch ass.

Bei bestëmmte cheemesche Reaktiounen entsteet Waasserstoff fir kuerz Zäit atomar als H, och naszéierende Waasserstoff genannt. E reagéiert an dëser Form besonnesch staark mat aneren Elementer oder Verbindungen.

Den englesche Chimist Henry Cavendish ass den Entdecker vum Waasserstoff. 1766 huet hie Waasserstoff produzéiert andeems e Saier op Zénk geschott huet. Hien huet dee Gas, deen dobäi entstanen ass, als "brennbar Loft" bezeechent. Well hien et als spezifesch Substanz identifizéiert huet, huet e gesot et wier en Element.

An 100 Millioune Liter Loft si 5 Liter Waasserstoff. Der Äerd hir Unzéiungskraaft geet net duer fir de Waasserstoff zeréckzehalen, nëmmen op Planéite wei Saturn a Jupiter geet d'Gravitatiounskraaft duer. De Waasserstoff fënnt een haaptsächlech a gebonnener Form erëm wei am Waasser.

Dem Cavendish seng Method bei där een op en onedelt Metall eng verdënnt Saier schëtt gëtt nach haut an de Laboratoire benotzt fir Waasserstoff hierzestellen.