S Wort Glaube (indogermanisch leubh ‚begeere‘, ‚lieb haa‘, ‚für lieb erklääre‘, ‚guethäisse‘, ‚loobe‘) bezäichnet e Grundhaltig vo Verdraue, v. a.
im Konteggst vo religiöse Überzüügige.
Wäared dr äänlig Begriff „Religiosidäät“ d Eerfurcht vor dr Ornig und dr Vilfalt in dr Wält und die allgemäini Empfindig von ere dranszendänte Wirkligkäit mäint, wo nid cha erklärt oder bewiise wärde, mäint mä mit „Glaube“ s Überzügtsi vo dr Leer von ere konkrete Religion (oder Filosofii).
Dr Glaube spiilt in de verschidnige Religione en underschiidlig wichdigi Rolle. Wääred er zum Bischbil im Christedum und vor allem im Protestantismus unabdingbar für s Seelehäil isch, isch er im Juudedum kä religiöses Konzept und was vom ene Juud gforderet isch, isch Grächtigkäit uf dr Grundlag vo dr uniwerselle Nöggsteliebi und d Gliichhäit vo alle Mensche.
In dr Nöirotheologii brobiert mä dr Glaube as Fenomeen vom Hirni z erkläre. Dr nordamerikanischi Nöirowüsseschaftler Michael Persinger het mit magnetische Fälder d Schlööfelabbe vo sine Brobande stimuliert, und eso welle religiösi Empfindige (Gottesmodul) erzüüge. Er het erklärt, ass die Fenomen de Sümptom vo dr Epilepsii wurde gliiche. Dr Scott Atran sinersits het in sim Wärk In Gods We Trust e darwinistische Aasatz. Die darwinistischi Glaubensforschig gseet im Glaube nit öbbis wo anerzoge isch, sondern evoluzionär im Bewusstsii vom Mensch verankeret isch. D Religiosidäät und dr Glaube wärde as evoluzionärs Nääbebrodukt erklärt, es wärden aber au mögligi Selekzionsvordäil undersuecht. Dr Justin Barrett gseet evoluzionspsüchologisch d Religiosidäät nit as en Strategii vo Gmäinschafte, wo für s Überlääbe wichdig isch, sondern as en Entwiggligsstadium vo dr menschlige Psüüche.
This article uses material from the Wikipedia Alemannisch article Glaube, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Dr Inhalt isch verfiegbar unter CC BY-SA 4.0, wänn nyt andersch aagee isch. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Alemannisch (DUHOCTRUNGQUOC.VN) is an independent company and has no affiliation with Wiki Foundation.