נביאים
נביאים איז דער נאמען פון דער צווייטער אפטיילונג פון תנך, וואס איז כולל די געשיכטע פון עם ישראל אין ארץ ישראל ביז צום חורבן בית המקדש און די נבואות פון די נביאים.
- דער ארטיקל דיסקוטירט די צווייטע אפטיילונג פון תנ"ך. טאמער זוכט איר מענטשן וואס האבן נבואה, זעט נביא.
א נביא הייסט איינער וואס הערט און גיט איבער דאס ווארט פונעם באשעפער.
מען לייענט די הפטרה פון נביאים בציבור שבת, יום טוב און תעניתים נאך קריאת התורה.
לויטן רמב"ם, ווערן די ספרים פון תנ"ך צעטיילט אויף דריי דרגות פון קדושה וואס ווענדט זיך ווי אזוי מ'האט זיי געשריבן. משה רבינו האט געשריבן די תורה על פי ד', די ספרים פון נביאים זענען געשריבן מיט נבואה, און די ספרים פון כתובים זענען געשריבן מיט רוח הקודש.
די ספרים פון נביאים ווערן צעטיילט לויט זייער ענין:
- נביאים ראשונים, וואס איז כולל ספר יהושע, ספר שופטים, ספר שמואל און ספר מלכים. די ספרים באשרייבן די היסטאריע.
- נביאים אחרונים, וואס איז כולל ספר ישעיה, ספר ירמיה, ספר יחזקאל און תרי עשר. די ספרים אנהאלטן די נבואות וואס האבן א צוועק אויך פאר די שפעטער דורות. תרי עשר איז א ספר וואס איז כולל די נבואות פון די צוועלף נביאים: הושע, יואל, עמוס, עובדיה, יונה, מיכה, נחום, חבקוק, צפניה, חגי ,זכריה און מלאכי.
די ספרים פון נביאים
נביאים איז כולל אכט ספרים. די מסורה ווער האט זיי מחבר געווען שטייט אין דער גמרא (מסכת בבא בתרא יד-טו):
- ספר יהושע - רעדאקטירט פון יהושע בן נון.
- ספר שופטים - רעדאקטירט פון שמואל.
- ספר שמואל - רעדאקטירט פון שמואל. היינטיקע צייטן איז מען נוהג צו טיילן דעם ספר לויט דער נוצרישע טיילונג אויף צוויי: שמואל א' און שמואל ב'.
- ספר מלכים - רעדאקטירט פונעם נביא ירמיהו. היינטיקע צייטן איז מען נוהג צו טיילן דעם ספר לויט דער נוצרישע טיילונג אויף צוויי: מלכים א' און מלכים ב'.
- ספר ישעיה - רעדאקטירט פון חזקיה און זיינע חברים.
- ספר ירמיהו - רעדאקטירט פון ירמיהו.
- ספר יחזקאל - רעדאקטירט פון די אנשי כנסת הגדולה.
- תרי עשר - (צוועלף אויף אראמיש), איז א זאמלונג פון צוועלף נביאים וואס די אנשי כנסת הגדולה האבן מסדר געווען.
ס'איז דא תרגום פון יונתן בן עוזיאל אויף נביאים.
| ספרים אין תנ"ך |
| תורה: בראשית | שמות | ויקרא | במדבר | דברים נביאים: יהושע | שופטים | שמואל (א' וב') | מלכים (א' וב') | ישעיה | ירמיה | יחזקאל | תרי עשר: הושע | יואל | עמוס | עובדיה | יונה | מיכה | נחום | חבקוק | צפניה | חגי | זכריה | מלאכי כתובים: תהילים | משלי | איוב | שיר השירים | רות | איכה | קהלת | אסתר | דניאל | עזרא - נחמיה | דברי הימים (א' וב') |
This article uses material from the Wikipedia ייִדיש article נביאים, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). דער אינהאַלט איז פֿאַראַן אונטער CC BY-SA 4.0 ווען נישט באוויזן אנדערש. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ייִדיש (DUHOCTRUNGQUOC.VN) is an independent company and has no affiliation with Wiki Foundation.