רבי יעקב יוסף האגער (געב' ב' כסלו ה'תשכט), איז דער וויזשניצער רבי פון בארא פארק.
יעקב יוסף האגער | ||
---|---|---|
אדמו"ר מוויזשניץ בארא-פארק | ||
געבורט | ב' כסלו ה'תשכ"ט פאראייניגטע שטאטן | |
חסידות | וויזשניץ מאנסי | |
פירערשאפט | כ"ט אדר ה'תשע"ח - | |
הויף ארט | בארא פארק, ברוקלין, ניו יארק | |
נומער אין דינאסטיע | 2 | |
פאריגער | רבי מרדכי האגער | |
זיינע רביס | רבי מרדכי האגער | |
פאטער | רבי פנחס שלום האגער | |
מוטער | מרת זיסל רייזל הורוויץ | |
ווייב | מרת שפרה טווערסקי | |
קינדער | פייגא ברכה טירנויער נפתלי האגער ישראל האגער חיים מאיר האגער יוחנן האגער שמואל צבי האגער דוד האגער מרגליא האגער סימא מירל האגער מנחם מענדיל האגער יצחק האגער אסתר רחל האגער |
רבי יעקב יוסף איז געבוירן געווארן אין יאר ה'תשכ"ט אין די פאראייניקטע שטאטן, צו זיין פאטער רבי פנחס שלום האגער, דער געוועזענער וויזשניצער רב אין בארא פארק, און עלטסטער זון פון רבי מרדכי האגער, דער פריערדיגער וויזשניצער רבי פון מאנסי, און צו זיין מוטער מרת זיסל רייזל, טאכטער פון הרה"ק רבי שמואל צבי הורוויץ, ספינקער רבי. ער איז אויפגעהאדעוועט געווארן און זיך געווייקט אלע יארן ביי זיין גרויסן זיידן דער וויזשניצער רבי, וועלכער איז גלייכצייטיג אויך געווען מורו ורבו. זייענדיג דער עלטסטער אייניקל, דער עלטסטער זון פון זיין בכור, האט אים דער רבי צימליך שטארק געגליכן און האט זיך פארלאזט אויף אים אין פארשידענע ענינים און הינזיכטן. ער האט געהייראט זיין שוועסטער-קינד מרת שפרה, טאכטער פון זיין פעטער רבי אברהם דוב טווערסקי, רחמיסטריווקער רב אין מאנסי, און איידעם פון זיין זיידן רבי מרדכי האגער, דער וויזשניצער רבי.
אין יאר ה'תשע"ה, נאך דער פטירה פון זיין פאטער, וועלכער האט געדינט אלס רב פון דער ארטיגער וויזשניצער קהילה דריי און דרייסיג יאר, האט רבי יעקב יוסף איבערגענומען זיין ארט. כמעט אלע יארן האט ער געוואוינט אין מאנסי, און אפילו נאכדעם וואס ער האט איבערגענומען זיין פאטער'ס אויפגאבע און געווארן רב פון זיין זיידנ'ס חסידים אין בארא פארק אנשטאט זיין פאטער און די בעלאסטונג פון דער קהילה איז געפאלן אויף אים, איז ער געבליבן וואוינען אין מאנסי נאענט צום באליבטן זיידן, וואו איז ער געזעצן אין כולל און פלייסיג געלערנט, און נאר אויף שבתים פלעגט ער אריבערקומען קיין בארא פארק זיך צו געפינען מיט די בני הקהילה. אינמיטן דער וואך פלעגט ער פירן אלעס וואס באטרעפט די ענינים פון דער קהילה פונדערווייטנס, און מאנכמאל פלעגט ער זיך אריבערכאפן איבערראשנדיג קיין בארא פארק אויך אינמיטן דער וואך, נאכצופאלגן פון נאענט די אנטוויקלונג און טעטיגקייטן אין זיין קהילה, נישט פארגעסנדיג פון זיינע יונגעלייט ביי וועמען ער איז זייער באליבט און געשעצט. ער איז באקאנט אלס אן אויסערגעווענליכער תלמיד חכם וואס זיצט און האראוועט און ניצט אויס יעדע מינוט כדבעי. זיין חברותא מיט וועמען ער לערנט אינאיינעם איז דער דיין רבי יוסף מנחם באב"ד. במשך די יארן האט ער זיך פארהערט אין פילצאליגע מכמונות התורה, און זאגאר אריבער א ספעציעלע בחינה ביי די גרעסטע רבנים, וועלכע האבן אויסגעדריקט שטוינונג און באגייסטערונג פון זיינע ברייטע קענטעניסן און ידיעות בתורה. אזוי ווי די איבעריגע משפחה מיטגלידער זיינע, האט דער רבי אימער געפירט און פירט א שטוב פון חסד. ער איז באוואוסט מיט זיין גרויסצוגיגקייט און גוטמוטיגקייט, ער האט שוין ארויסגעהאלפן פילע צעבראכענע און מיטגעמאכטע אידן סיי גייסטיש און סיי פיזיש. נישט איינמאל האט ער זאגאר אריינגענומען צו זיך אין שטוב נויטבאדערפטיגע אידן און האט זיך באזארגט פאר זיי מיט אלעס וואס זיי ברויכן. רבי יעקב יוסף איז אויך באקאנט אלס א בעל צדקה און טיילט ארום שווערע געלטער פאר צעבראכענע מענטשן און אויך פאר אנדערע צוועקן. נאך דער פטירה פון זיין גרויסן זיידן אום כ"ט אדר ה'תשע"ח, לויט דער צוואה איז יעדער זון פונעם רבי'ן איבערגענומען די הנהגה און געווארן א רבי אין זיין וואוינארט. זיין אייניקל רבי יעקב יוסף איז געקרוינט געווארן רבי פון די מאנסי וויזשניצער חסידים אין בארא פארק, א קהילה וואס באשטייט פון אכט הונדערט און פופציג משפחות, און איז די צווייטע גרעסטע הויפטקווארטיר פון מאנסי וויזשניצער חסידים נאך מאנסי. ער פארמאגט פיר בתי מדרשים, א ישיבה, תלמוד תורה, כולל און א מיידל שולע. רבי יעקב יוסף ווערט באטראכט אלס איינער פון די יונגסטע אויב נישט דער יונגסטער רבי לבית וויזשניץ, און טראצדעם פירט ער זיין גרויסע קהילה מיט אומגעהויערע געטריישאפט און באזארגט פאר אלע באדערפענישן פון די בני הקהילה.
This article uses material from the Wikipedia ייִדיש article יעקב יוסף האגער, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). דער אינהאַלט איז פֿאַראַן אונטער CC BY-SA 4.0 ווען נישט באוויזן אנדערש. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ייִדיש (DUHOCTRUNGQUOC.VN) is an independent company and has no affiliation with Wiki Foundation.