马耳他,英文名Malta,南欧国家之一。
马耳他来勒中世纪个辰光先后被阿拉伯人搭诺曼人占据,来勒15世纪,迭个地方开始成为从近东罗德岛迁徙来个医院骑士团个总部。来勒迭个辰光开始,奥斯曼帝国就一直对马耳他构成威胁。来勒1522年,爆发邪气巨大个战争,历史高头叫做马耳他之围,奥斯曼有好多万军队,几乎要攻破此地,弗过西班牙帝国个援军及时赶到,拿回教军队灭脱,迭个事体也成为西欧抵抗回教个一个辉煌胜利。
来勒拿破仑战争之后,马耳他被英国人占领,成为英国个辖地。英国人推广伊拉个文化,对马耳他有邪气大个影响。
第二次世界大战辰光,马耳他时英国来勒地中海高头个堡垒,发生交关事体。著名小说马耳他之鹰里向侪有描写。到二战结束,英国人走脱,马耳他独立哉。
独立后个马耳他,快速融入欧洲社会,成为欧盟个成员国。
马耳他来勒地中海个中央,面积弗是老大,只有三百多平方公里。属于典型个地中海气候,国土范围内资源弗多,适合种植橄榄,放牧。马耳他周边个鱼类资源邪气丰富,捕鱼也是马耳他人个重要职业。
马耳他来勒相当长个辰光里向是医院骑士团个总部,宗教高头深受天主教个影响。到现在,马耳他还有九成以上个居民是天主教徒。迭个比例来勒欧洲算是顶高个。
马耳他个主体民族是马耳他人,是印欧民族搭闪米特人格混血,现在马耳他共和国有四十几万马耳他人,还有交关马耳他人移民到美国搭澳大利亚去哉。
马耳他来勒历史高头是欧洲个一部分,搭欧盟内部国家个关系是伊拉外交个重点。马耳他传统个友好邻国是西班牙搭意大利,此外,搭英国也有特殊个关系。
来勒世界高头,马耳他一直奉行和平、公正个外交策略,弗参与地区纷争,提倡谈判解决问题。弗过近腔阿拉伯之春让交关北非回教难民流窜到马耳他,马耳他也有些吃弗消,来勒迭个问题高头搭突尼斯一直有摩擦。
江南人晓得马耳他,是通过17世纪初利玛窦个世界地图搭传教士对欧洲国家个介绍。弗过因为马耳他是个小岛,对伊拉个印象弗是老深。
This article uses material from the Wikipedia 吴语 article 马耳他, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 除非另外声明,内容用CC BY-SA 4.0授权。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 吴语 (DUHOCTRUNGQUOC.VN) is an independent company and has no affiliation with Wiki Foundation.