西班牙哈布斯堡王朝

西班牙哈布斯堡王朝（英文：Habsburg Spain），立在西班牙自家个历史书当中畀叫做奥地利王朝（Casa de Austria）是从16世纪开始辰光统治西班牙，一直持续到18世纪初个一个哈布斯堡家族分支。具体个确立是立在卡洛斯一世退位个辰光，拿奥地利部分让自家个阿弟费迪南一世继承。拿自家个殖民帝国搭西班牙王国让自家个大儿子费利佩二世继承。个能，就拿哈布斯堡家族分成两支哉。立在费利佩二世手里向，西班牙成为欧洲顶顶强盛个霸主，同时搭荷兰、英国、法国、奥斯曼帝国进行战争，并一直保持优势地位。1580年，又兼任葡萄牙国王，让西班牙成为世界高头领土面积第一大个国家。到伊个儿子费利佩三世当国王个辰光，西班牙还是好维持老早个霸主地位，弗过国力已经开始下降。到费利佩三世个儿子费利佩四世继位之后。一系列矛盾开始爆发，到1640年，失去葡萄牙王国，1643年，立在罗克鲁瓦战役当中畀法国个孔代亲王决定性打败。又因为货币贬值搭近亲繁殖。到费利佩四世个儿子卡洛斯二世继位之后。西班牙国力彻底衰落，从老早个进攻态势转入防守，交关地盘也畀法国个太阳王路易十四抢过去。卡洛斯二世是近亲繁殖个后代，智力天生有问题，脑子弗大正常，加剧西班牙个混乱。伊嘸继承人，临死辰光要求自家母系个波旁家族继承王位，引发西班牙王位继承战争。到卡洛斯二世死脱，西班牙哈布斯堡王朝也就因为嘸后代，完结哉。