洋山芋

野生洋山芋原产在拉南美洲安第斯山一带，畀当地印第安人培育。16世纪个辰光是西班牙殖民者先带转欧洲去，1650年洋山芋已经成为仔爱尔兰个主要粮食作物，并开始在拉欧洲普及起来哉。17世纪洋山芋已经成为欧洲个重要粮食作物。1719年由爱尔兰移民带转美国去，开始在拉美国种植。19世纪爱尔兰洋山芋歉收，饿煞脱仔交关人。

17世纪洋山芋已经传播到东亚大陆。由于洋山芋非常适合在拉原来粮食产量极低、只好长莜麦个高寒地区生长，个咾弗多几时就在拉乃朝个内蒙古、河北、山西、陕西北部普及开来。洋山芋搭珍珠米、番薯迭排从美洲传入个高产作物成为贫苦阶层个主要食品，对维持东亚大陆人口个迅速增加起着仔重要作用。

洋山芋单单在拉原产地就有几百只品种，世界各地貤弗断培养新品种，乃么目前全世界有几千只品种：有含淀粉比例较高，适合作为主食个，也有适合作为素菜食用个。根据用途，貤培养出交关新品种，花色有白、红、紫等品种，地下块茎有圆形、卵形搭椭圆形，外皮有红、黄、白搭紫颜色。

洋山芋含有大量碳水化合物，同时含蛋白质、矿物质（磷、钙等）、维生素等。好当主食，也好当素菜吃，或做辅助食品像洋芋条、洋芋片咾啥，也用来制作淀粉、粉丝咾啥，也好酿酒或者当喂众牲个饲料。

 

维基共享资源里向寻得着搭该篇文章搭界个多媒体资源：

洋山芋