日本投降

1945年8月6號搭8月9號，美軍分別勒廣島市搭長崎市厾原子彈。另外一方面蘇聯勒8月8號夜快決定單方面廢脫《日蘇中立條約》，還根據《雅爾塔協定》個約定準備展開八月風暴行動。1945年8月9號半夜過後，已經朝日本宣戰個蘇聯軍隊窮快打進日本個殖民地關東州、搭仔管滿洲地區個傀儡政權满洲国等。該兩個衝擊造成功8月14號辰光，昭和天皇決定要求軍事參議官會議接受美國、英國、中國搭蘇聯《波茨坦公告》當中簽好個停戰協定，外加通過駐瑞士搭瑞典的大使館來朝盟軍發放消息。經過交關趟幕後談判搭未遂政變過後，昭和天皇勒8月15號日本標準時間中浪12點鐘朝日本全國用錄音廣播個方式發表《終戰詔書》，宣布日本政府決定遵守同盟國集團個無條件投降個要求。

8月28號，駐日盟軍總司令開始接管政權還佔領日本，接下來同盟國集團就開始展開仔一系列戰後改革計畫，當中勒1947年5月3號公布仔新個《日本國憲法》。9月2號上半日10點鐘，包括日本、美國、中國、蘇聯、英國、澳大利亚、加拿大、法蘭西共和國臨時政府、荷蘭搭新西蘭代表勒垃停勒東京灣個美國軍艦密蘇里號戰艦浪舉辦投降儀式，日本政府官員勒該搭簽仔《降伏文書》，正式結束第二次世界大戰當中雙方個軍事行動。勒第二次世界大戰結束過後，同盟國平民搭部隊開始慶祝第二次世界大戰對日戰爭勝利紀念日。必過有點還勒亞洲搭太平洋島浪向自家打仗個日本指揮官搭軍事人員原歸繼續堅持打仗，甚超至於一直到1970年代為止阿末幾個士兵勒曉得戰爭結束個消息過後再宣布投降。自從日本宣布投降過後，歷史學家也開始辯論針對平民厾原子彈個倫理道德問題。必過日本搭西方同盟國是勒1952年4月28號個辰光，由包括日本勒裏向個48個國家一淘簽仔《舊金山和約》並且生效過後，再正式從法律層面浪結束互相個戰爭關係；同時辰光日本也結束仔7年長個同盟國軍事佔領狀態，重新恢復日本個主權行使能力。到仔1956年個辰光，日本政府再另外搭蘇聯簽仔《日蘇共同宣言》結束兩國個戰爭狀態。