Li Federåcion Walonreye-Brussele (F.W.B.) (k' on loméve divant Kiminålté francesse di Beldjike), c’ est ene des troes kiminåltés del Beldjike, avou l’ Kiminålté flaminde eyet l' Kiminålté tîxhon-cåzante.
C' est ene institucion ki s' ocupe del culteure, di l' acsegnmint et co sacwants ôtes pititès sacwès (odiovizuwel, spôrts) so èn aroyaedje ki rascovere li pus grande pårteye del Walonreye (apus kel kiminålté tîxhon-cåzante), et Brussele. Mins a Brussele, n a eto, sol minme sitindêye, li Kiminålté flaminde.
Li Federåcion Walonreye-Brussele a sovint stî moennêye pa des Brusselwès. Çou ki fwait ki sacwants interesses des Walons, inte di zels, li diswalpaedje do lingaedje walon, ont stî metous sol costé. Metans dins les cwårs dinés å CLRE po schaper les ptits lingaedjes del Walonreye, la kel walon riprezinte a pô près 75 åcint des ki-pôrént-esse djåzeus.
Sacwants waloneus ey eto des dislaxhiveus ont dmandé dispu bele ådje li raloyaedje del Federåcion Walonreye-Brussele al Redjon walone, come li Kiminålté flaminde s' aveut tot timpe raloyî al redjon flaminde po fé l' Flande.
E 2008, pol prumî côp, li prezidint del Redjon walone et del Federåcion Walonreye-Brussele, c' est l' minme djin : Rudy Demotte. Mins, docô après, i gn a rieu deus prezidints.
Li FWB est onk des mimbes del francofonreye. Çou k' est co on côp drole, ca l' Beldjike tote etire, leye eto, est on mimbe di cisse soce la. Ça fwait k' po les minmes administrés, gn a deus minisses ki s' paynut l' voyaedje po-z aler ås mwaisses raploûs del Francofonreye.
This article uses material from the Wikipedia Walon article Federåcion Walonreye-Brussele, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Li contnou est dzo l' licince CC BY-SA 4.0 a moens k' ça soeye dit ôtrumint. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Walon (DUHOCTRUNGQUOC.VN) is an independent company and has no affiliation with Wiki Foundation.