Tchanson El Crås Boyea Dôna

Li tite vout dire : el crås boyea da Dôna. C' est ene des piceures del croejhete walone po mostrer l' apårtinance.

I s' tchante so ene air d' ene tchanson e francès ki s' loméve "Ma pauvre enfant".

Li tecse a parexhou dins l' "Journal de Charleroi" do 23 d' fevrî 1859.

Bob Dechamps el ritchantéve voltî.

I.

L' ôte djoû so on feu d' hoye
Dôna fijheut chîler
Po ddjuner
On long boket d' dispouye,
Pezant pus d' on cwåtron.
Vla k' est bon !
Sorvént l' gros marou
D' Lambertine Irou
Ki, sintant bon l' pourcea,
Lyi vole ès crås, lyi vole ès crås, lyi vole ès crås boyea. (2 côps)

II.

- Vla l' fwait d' on vint-godom !
Dit Dôna, tot saizi,
Tot stourdi.
Padlé l' måjhon Bonome,
Tot come on distchinné,
L' tchet coreut;
El Rossea Artur
Lyi vleut taener l' cur.
- Djoke tu, lyi dit Dôna;
Araetche lyi l' crås, araetche lyi l' crås, araetche lyi l' crås boyea ! (2 côps)

III.

Souwant et wôr d' alinne,
I creye å Noer Rossea :
- Cour par la !
- Ba ! Ça n' våt nén les poennes;
I doet esse trop poevré,
L' crås boket;
Mi, ça n' m' ergåre nén;
T' n' as k' a t' dismoenner.
Coroz tot seu, Dôna
Après vosse crås, après vosse crås, après vosse crås boyea. (2 côps)

IV.

Padlé l' måjhon Louwisse,
El tchet voleut cori
Po s' catchî;
Mins l' pus vî des Batisse
Lyi tape on côp d' talon
So s' mouzon;
El marou gnawéve;
Mins måy i n' låtcha
Èç ki voleut Dôna :
El boket d' crås, el boket d' crås, el boket d' crås boyea. (2 côps)

V.

El tchet s' såve dé Laliye,
Mins vla kel gros Picård
Da Douwård
Acourt, tot e fureye
Åyant flairé l' boket
Ki passéve;
Lu, d' on seu côp d' dint,
A rade metou fén
Mågré les cris d' Dôna
Å boket d' crås, å boket d' crås, å boket d' crås boyea. (2 côps)

• Rimetaedje del mwaisse modêye e scrijhaedje Feller, da Emile Vandereuse (p. 55-56)