Lalgorit Geredik

Binon sukalalgorit kel gebon prinsipi volfa. Brefo, pöp tuvedotas fädik panemöl balats pajafon, kel volfon nenatiko jüs bal vedon kotenüköl.

Lalgorit geredik stabik pädatikon fa hiel John Holland ün 1972, in buk: „Adaptation in Natural and Artificial Systems“. Lalgorit geredik, e lalgorits volfik votik, pegebons sekaliegiko ko säkäds difik mödik. Säkäds samik binons: vegamataibs, dils flitömas, platots leäktronik, e stir vobianas.

Dabinons dins tel kelis mutoy dunön pro LG. Balido, mutoy votafomön binodi uta kel poprodon, ad lised numas. Liseds at panemons kromosoms e nums onsik panemons gereds. Ekö sam fasilik: disinam taba nomik ko lögs fol e sürfat folliena stedagulik. Dabinons nums kil: lunot e vidot sürfata, e geilot löga alik. If givoy numis fädik kil (kels binons in portat), getoy tabi fädik.

Ven edatikoy numavotafomami, ejafoy sukaspadi säkäda: konlet tuvedotas mögik valik. Du volfon, pöp vestigon spadi at.

Din telid keli mutoy is dunön, binon jafön lönedasekäti. At binon sekät kel jonon gudi balata alik. Plü balat binon gudik, plü num pünätas pagivon one. Pro sam taba: if tab padesinon pro mens gretik mäl, pogivonöv pünätis dub lögs gretikum, ed operonöv pünätis dub binön tu gretik u tu smalik, adas mens mäl kanons seidön zü on.

Me lönedasekät, kanoy sevön gudi balata seimik.

Lalgorit stabik binädon me dils sököl.

• 1. Jafolöd pöpi primik fädik balatas.
• 2. Blufolöd balati alik me lönedasekät.
• 3. If kod stöpik pakotenükon, stöpolöd.
• 4. Välolöd pöpi nulik se bäldik, me pünäts.
• 5. Dunolöd tölatis geredik sui pöp nulik.
• 6. Gololöd jü dil 2id.

Dil veütikün binon välam pöpas nulik; nen välam, volf no kanon jenön. Välam proporik (ü rulätik) binon metod kösömikün välama. Pö metod at, pöp nulik alik paprodon dub balat bal pos votik: mödot pünätas keli balat dalabon, leigon luverati das povälamon sökölo. Kodü atos, balats gudikum vedons mödikums, e balats badikum vedons nemödikums. Binos „lailif lönedikünas“.

Dils veütik i binons tölats geredik, kels binons luvotükam e gereditök. Luvotükam binon luverat vemo smalik das gered povotükon. Samo, if gereds binons els bits, el ,1' vedonöv el ,0' ed el ,0' vedonöv el ,1'. Tölat gereditöka sumon balatis tel e tökon geredis anik onas. Sot stabikün binon plad-bal: plad pasesukon su kromosom, e gereds valik po plad et patökons. Sots votik ninädons plad-tel e fädik.

Stöpoy lalgoriti ven kod(s) stöpik pakotenükon(s). Kods sömik kösömik binons: balat dabinon, tuvedot kela kotenükon; tim tu mödik pebinon; pöp volfon no plu.