Blanknberge Scarphout: Lange geleedn dêel van Blanknberge, verzwolgn deur de zêe in 1334

Over 't ountstoan van Blanknberge is 't er nie styf vele geweetn. Verzekers en d'r een dêel zêevoarders afkomstig uut Olland under gevestigd an de voet van de blanke duunn. Een stroke zand tusschn de duunn en de zêe addn ze voorzien van scherpe outn poaln met de punt noa boovn vor under te verweirn teegn d'invalln van de Vikings en andere zêeschumers. Die zandstroke krêeg de noame "Scarphout" (=scherp out) en was verzekers nie beweund. Achter de duunn, mêer landinwoarts, woarn de visschers beschut teegn de nôorderwind en de stormn. Volgens de historicus Gramaye bouwdn d'êeste beweuners een kapelle in de duunn. Da gebouwtje wierd deur bisschop Transmarus van Doornik in 948 gewyd en ipgedreegn an de O.L.Vrouwe van Scarphout. Round de kapelle kwoamn d'r mêer en mêer visschersuzetjes en 't dorp wierd Blanknberge genoemd. De noame "Scarphout" is al vermeld ip een koarte van Boudewyn I van Vloandern (met den Yzern Oarm). 't Platstje zoudt ountstoan zyn ten tyde van den êestn groaf van Vloandern die over uze streke regeerde van 863 tout 879.

Ip 23 november 1334, Sint-Clemensdag, wierd Blanknberge geteisterd deur de geweldigstn storm aller tydn. De boarn sloegn brêde bressn in de duunn en 't woater stroomde verre in 't binnland. Ountelboare menoages verdrounkn. Ook de vier êeuwn oude kapelle weerstound nie an 't geweld en Scarphout wierd verzwolgn deur de zêe...

Vroeger woarn de Blanknbergsche visschers styf bygelovig. At er etwien was woavan da ze een emelste schrik addn was 't wel Roesschaert. Ze durfdn ook nie in den omtrek van 't vroegere Scarphout voarn omda ze peisdn dat under nettn zoudn bluuvn angn an de overbluufseln van Scarphout. D'r wordt ook verteld da je round 1900 by lêeg woater de funderingn van Scarphout nog koste zien. De visschers beweirdn ook da ze 's nachts orgelmuziek en begroavingsliedern kostn ôorn. En os 't schôon were was met een bitje wind kost je 't kloksje van Scarphout nog ôorn luudn. Da kloksje stak een alve meter uut boovn 't woater! En nog volgens de visschers zoudt 't O.L.Vrouwebeeldje van Meetkerke afkomstig zyn van 't kerksje van Scarphout.

Scarphout bestoat nie me, moa toch kom je de noame nog vele teegn in Blanknberge, (hotel, residentie, winkel...). D'r is ook de "Royal Scarphout yachtclub" en vroeger wast er een basketclub in Blanknberge die Scarphout noemde. Ook de dichteresse Arlette Paepe et de noame gebruukt vor eur pseudoniem: Ria Scarphout. Ook de jeugdbewegink KSA van Blanknberge et ieran z'n noame te dankn, noamelik 'Scarphoutstede'.