Poaschn

Ip dien dag viern christenen da Jezus verreezn is uut den dôod, ip den derdn dag achter dat 'n an 't kruus genoageld is ip goeie vrydag.

Poaschn deurt twêe doagn en wordt gevierd ip zundag en moandag (êeste en twidde Poaschn of poaszundag en poasmoandag).

't Woord Poaschn (Nederlands: Pasen, Frans: Pâques) is via 't Latyn gelêend uut 't Aramees pasha wa da oversloan wil zeggn. Da verwyst noa de tienste ploage van Egypte woaby dan de Joodsche huuzn overgesleegn wierdn. De Joodn viern den uuttocht uut Egypte met e fêeste da ze Pesach noemn. En omda 't in 't begun van de lente gevierd wordt is 't ook e lentefêeste. Den dôod en de verryzenisse van Jezus gebeurdegen binst de Pesach.

In 't Iengels en Duuts wordt Poaschn Easter en Ostern genoemd. Die benoamienge komt van ôostn, van woa dat de zunne ipkomt. De noame kan ook verwyzn noa d' Angelsaksische godinne Eostre, die in april wordt anbeedn.

By e moderne poasfêeste zyn der buutn christelikke elementn wok elementn (poaseiers, poaskeun, poashoaze) die verwyzn nor e heidense lentefêeste.

• 't Zyn fygn achter Poaschn: 't Is nie an tydn, 't is te loate.
• Ip je poasbest zyn: ip je schonst geklid zyn.

Poaschn valt ip den êeste zundag achter vulle moane achter 't begun van de lente (21 moarte).

• 2009: 12 april
• 2010: 4 april
• 2011: 24 april
• 2012: 8 april
• 2013: 31 moarte
• 2014: 20 april
• 2015: 5 april
• 2016: 27 moarte
• 2017: 16 april
• 2018: 1 april

Ofbeeldiengn die ier by passn ku je vien in de categorie Easter van Wiki Commons.