Michael Jordan
Michael Jeffrey Jordan (New York City, 17 februoari 1963) is een Amerikoansche basketspeler.
Dienen wordt anzien als één van de beste basketters aller tydn en j’et den NBA overal ter weireld populair gemakt in de joarn 1980-1990. J’ is 1,98 m grôot en je speelde mè numero 23.
Basketcarrière
Achter e schitterende carrière by de University of North Carolina vanof 1981 gingt ‘n in 1984 noa den NBA by de Chicago Bulls. Al gauwe wierd ’n één van de sterren van de competitie. Deur dat ’n zo oge koste springn ( je koste dunkn vanof de vryworplyne), krêegt ’n de bynoame "Air Jordan" en "His Airness". Je was ook één van de beste spelers in verdediginge. In 1991 et ‘n ‘t êerste kampioenschap met de Bulls gewonn en d’r volgdn nog titels in 1992 en 1993. In oktober 1993 gaft ’n z’n ountslag by den NBA vor e baseballcarrière te begunn, moa je kêerdege were by de Bulls en d’r volgdn nog drie kampioenschappn in 1996, 1997 en 1998. Jordan stoptege vor e twêede kêer in 1999, moa je speeldege nog twêe NBA-competities by de Washington Wizards van 2001 tout 2003.
Ounderscheidingn
- Vuuf kêers NBA MVP (most valuable player: beste speler)
- Tien “All-NBA” benoemingn (joarlikse ounderscheidinge in den NBA)
- Neegn “All-Defensive” pryzn (beste verdediger)
- Vêertien kêers meegespeeld in den NBA All-Star Game (een speciale NBA-competitie met de beste spelers)
- Drie “steals” titels
- Zes NBA Finals MVP awards
- NBA Defensive Player of the Year Award in 1988
J’ et ook ‘t NBA record van ogste gemiddelde score van 30,1 puntn in de reguliere competitie en 33,4 puntn in de playoffs. (je scoorde 63 puntn in één van die matchn ost ‘n 23 joar oud was, e playoff-record). In 2001 et ’n e nieuw record gevestigd deur ip z’n 38ste 51 puntn te scoorn.
Jordan zorgde ook vo ’t succes van de Air Jordan sneakers van Nike. Je speeldege in de live action/têeknfilm Space Jam uut 1996 en j’is één van de eigenoars en Managing Member van de Charlotte Bobcats in North Carolina, e professionele basketploeg in de Southeast Division van de Eastern Conference in den NBA.
Jordan is nog assan één van de best betoalde sporters deur inkomstn van reclame.
Externe koppelinge
This article uses material from the Wikipedia West-Vlams article Michael Jordan, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). De inhoud is, tenzij anders aangegeven, beschikbaar onder CC BY-SA 4.0 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki West-Vlams (DUHOCTRUNGQUOC.VN) is an independent company and has no affiliation with Wiki Foundation.