Alessandro Mocellin (scritura in Veneto: Łesandro Mosełin, pronunsià drio l'IPA: [le'saŋdɾo mose'iŋ]; Maròstega, 30 de zenaro 1988) el ze un jurista, łenguista, autor, tradutor e cantador łìrego veneto.
Fin da ła pubregasion, inte el 2010, del só primo łibro "Libera grafia universale", el ze coinvolzesto in prima parsona inte ła salvavardia e difuzion de ła łengua veneta, che ła ze stà mesa da l'UNESCO inte l'Atlante mondiałe de łe łengue a riscio (col stato de vulnerable).
El ze conosùo par ver scrito come primo autor el primo manuałe univarsitario in łengua veneta "I Sete Tamizi – Ła ciave par capir tute łe łengue romanse!", insenbre a i do profesori univarsitari todeschi Horst G. Klein e Tilbert D. Stegmann, de ła Goethe Universität Frankfurt, che ła cura e ła sostien ła cołana sientìfega de studi par ła interconprension tra łengue romanse.
El ze stà anca el promotor e responsàbiłe sientìfego del primo Convenjo Intarnasionałe so ła Łengua Veneta (#1CILVE), dove che parsonałità acadèmeghe come el primo łenguista de l'Unesco Prof. Christopher Moseley i ga firmà na declarasion volta al reconosimento istitusionałe de ła łengua veneta.
Da'l 2014 el ze el Diretor de l'Academia de ła Łengua Veneta, departemento łenguìstego de l'Academia de ła Bona Creansa, dove che el ze insenjante e ideator de i Corsi de Veneto, e che par cueła el vien ciamà a tenjer łesion in Veneto e anca a l'èstaro. A zunjo 2017 el ze stà ełeto Presidente de l'Academia de ła Bona Creansa. In novenbre del steso ano, col sostenjo de ła Rejon Veneto, el ze stà inte łe comunità venete de Rio Grande do Sul (Braziłe) par promòvar projeti de insenjamento de ła łengua Veneto-Brazileira; el ga anca prezensià a łe audision del Consejo Rejonal del Veneto prezentando proposte e opinion rełative a ła cultura veneta inte l'ànbito de l'autonomìa aministradiva.
A marso 2018 el ga portà el studio de ła łengua veneta par ła prima volta rento łe scołe, co un projeto insarìo inte el Pian de l'oferta formadiva de na scoła in provincia de Vicensa.
El ze el responsàbiłe del servisio DECACERT de sertifegasion łenguìstega veneta de l'Academia.
Inte ła só cariera de cantador łìrego (vałutà co ła voze de "tenor łìrego spinto" dal Maestro Gianfranco Cecchele) el ga fato racuanti conserti, interpretando brani de Puccini, Verdi, Buzzolla, Mayr, Hahn.
El ze conosùo anca par ver recuparà e portà a ła resitasion par ła prima volta inte i teatri e i spetàcołi ła tradusion veneta de ła Divina Comedia de Giuseppe Cappelli, reportada al pùblego par ła prima volta in asołudo inte el febraro 2011 mostrando un orizenałe del 1875 in direta tełeviziva e resitàndoghine i primi versi.
El ze ciamà da menbri de istitusion, asosiasion, movimenti par pareri zurìdeghi so temi de intarese veneto. El conparise publegamente so ła carta stanpà, e anca in tełevizion e par radio, itałiane e foreste.
This article uses material from the Wikipedia Vèneto article Alessandro Mocellin, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). El contegnùo el xe disponibile soto CC BY-SA 4.0, almanco che no ghe sia scrito difarente. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Vèneto (DUHOCTRUNGQUOC.VN) is an independent company and has no affiliation with Wiki Foundation.