Корепанов, Герман Афанасьевич

Вордӥськиз 1924-тӥ арын 30-тӥ июле Сьӧлта черкогуртын. 1947-тӥ — 1949-тӥ аръёсы дышетскиз Ижысь крезьгуръя училищеын (хорен дирижёрез удысъя). 1950-тӥ арын дышетскыны пыре Кузонысь консерваторие (Г. И. Литинскийлэн композицияя люкетаз).

Пичи дырыз курадӟыса ортчиз. Герман Афанасьевичлы 13 арес но тырмыса ӧз вутты, атайзэ репрессия улэ кыскизы. Пичи Герман огминутскын «тушмонлэн пиез» луиз. Школаын дышетскыкуз, мыло-кыдо ветлӥз Сьӧлта черкогуртысь Чеберлыкъя юртэ, гожъяз кылбуръёс но веросъёс. Быдӟым Отечественной ож мынон аръёсы службазэ ортчиз Дальней Востокын. Ӵапак отын шӧдӥськиз солэн крезьгур дуннее кыстӥськон мылкыдыз. Кылдытэ духовой оркестрлы чаклам вальсъёс но маршъёс. Война йылпумъяськем бере Герман Афанасьевич композиторлэсь удыссэ быръе. Кылдытэ «Мон тодам вайисько», «Зарни нянь» кырӟанъёссэ. Г. А. Корепанов — нырысетӥ удмурт опералэн — «Натальлэн» — авторез. 1964-тӥ арын со кылдытэ нырысетӥ удмурт симфониез. «Наталь» опералы вылӥ дунъет сётӥзы Совето Союзысь тодмо композиторъёс — А. И. Хачатурян но Т. Н. Хренников.

Нырысетӥ удмурт симфониез одӥг кылзӥсьлэсь сюлэмзэ но вырӟытытэк ӧз кельты. Калык пусйиз: отын возьматэмын калыкез репрессиосын курадӟытон. Симфония сӥземын курадӟытыса вием удмурт пилы Кузебай Гердлы, лагерьёсын сюрсэн-сюрсэн быдтэмъёслы. Та симфония капчиен пыриз СССР-лэн крезьгуро фондаз.

1957-тӥ арын пусъемын УАССР-ысь искусство удысысь сӥё-дано ужась нимын, 1958-тӥ арын луиз РСФСР-ысь искусство удысысь дано ужась. Удмурт Республикаысь культура но искусство удысын ужасьёс пӧлын со нырысетӥез адями, кудӥз пусъемын Удмурт АССР-лэн кун премиеныз (1967-тӥ арын). Тае ним солы сётӥзы «Наталь» операзэ но удмурт симфонизэ, озьы ик «Дано лу, партия!», «Удмуртия», «Сӥзьыл кырӟан», «Мы — железный народ» кырӟанъёсыз понна. 1961-тӥ арысен — СССР-ысь композиторъёслэн огазеяськонзылэн правлениезлэн ёзчиез. РСФСР-ысь кун премиосын пусъёнъя комиссилэн ёзчиез. Быдӟым Отчественной оже пыриськем мурт. Крезьгуро искусствоын вормонъёс басьтэмез понна 1971-тӥ арын пусъемын Ленин нимо орденэн, озьы ик «Знак Почёта» гадьпусэн. Япониен нюръяськонэ пыриськемез понна пусъемын Быдӟым Отечественной ожлэн II степенё орденэныз, «За Победу над Японией» гадьпусэн. Г. А. Корепанов аслаз творчествояз быгатыса кутӥз удмурт фольклорез.

Улонысь кошкиз 1985-тӥ арын Ижкарын.