Кириллов, Сергей Ксенофонтович

Сергей Ксенофонтович Кириллов вордӥськиз но будӥз Алнаш ёросысь Сӥзьгуртын. Аслаз гуртысьтыз начальной классэз быдтыса, дышетсконзэ Алнаш шоръёзо школаын азьланьтӥз. Со бере пыриз Ижкарысь гурт хозяйствоя институтэ, соку гинэ усьтӥськем электрофакультетаз. Дышетсконзэ йылпумъямез бере, Сергей Кириллов Алнаш ёросаз берытске. Одӥг арзэ Кузьымгуртын энергетик луыса ужа. Собере сое Алнашысь «Сельэнерго» ужъюртэ отё. Тыршыса, сюлмысь ужамзэ синйылтыса, солы «Сельхозмонтажник» нимо огазеяськонэн кивалтонэз оско. Выль ужлы но выль адямиослы дышыса гинэ вуэ, огыр-бугыр улон вуыса, ваньзэ выльысь кутсконо луэ. Соку Сергей эшъёсыныз «Монтажник» ужъюртсэс кылдытэ, кудӥз туннэ нуналлы ёросын одӥгез синйылтымонэз, азинскисез луэ.

Тросэз Сергей Кирилловез кивалтӥсь луэменыз ӧвӧл, кырӟанъёсызъя тодо. Сергей Ксенофонтович егит дырысеныз ик ӧз люкиськылы гитараеныз. Но со мукет крезьгур тӥрлыкъёсын но шудэ. Нырысьсэ сцена вылэ С. Кириллов 1998-тӥ арын потӥз. Соку Алнашын крезьгурез яратӥсьёс, крезьгурчиос пӧлын фестиваль ортчиз. Отын со куинетӥ степеньем данъян басьтӥз (нырысетӥзэ сцена вылэ потыса!). Со дырысен гуръёсыз одӥгез мукетыз сьӧры вордскылӥзы. Туннэ нуналлы Сергей Кирилловлэн 200-лэсь трос кырӟанъёсыз, соосын кык дискез потэмын. Выль гуръёс быгато уж дурын но, дорын но, сюрес вылын но вордскыны, соин ик солэн одӥг гитараез дораз, нош мукетыз машинаяз яке ужан интыяз луэ. Али со чемысь самодеятельной крезьгурчиос понна радъяськись ёрос но Элькун конкурсъёсы пыриське, трос вормонъёсыз ини. Сергей Кирилловлэсь кырӟанъёссэ али радио, телевидение пыр но ӵем бергато. Огназ сяна, со кырӟалля «Натӥ» дуэтэн но. Соослэн трос ни ӵош быдэстэм гуръёссы.

Сергей Ксенофонтовичлэн семьяез но туж синмаськымон. Соос Валентина Николаевна кузпалэныз куинь нылпи будэтӥзы, табере внукъёссы но вань ини. Валентина Николаевнаез Алнаш ёросын сяна, палэназ но тодо: трос аръёс ӵоже ини со кивалтэ Алнаш черкогуртысь Г. Д. Красильниковлэн мемориальной музей-юртэныз, пыриське уно ужрадъёсы но конференциосы.

• ?