Vukreste

Vukreste i vukhongeri lebyi kulu kutlula mixaka hinkwayo ya vukhongeri emisaveni, naswona byi na malandza yo tlula 2.4 wa tibiliyoni, la ma tiviwaka tani hi Vakreste. Vakreste va pfumela leswaku Yesu i n'wana wa Xikwembu naswona i muponisi wa misava, loyi ku vuya ka yena ku vhumbiweke e ka Testamente ya khale.

Vukhongeri bya Vukreste byi nga hlamuseriwa hi kukomisa eka ku pfumela leswi landzelaka. Leswaku Yesu u xanisekile, a lova, a vekiwa e sirheni, a chikela e tiheleni, naswona a pfuka eku feni, leswaku a nyika lava va pfumelaka eka yena, nkutsulo wa swidyoho swa vona. Vathlela va pfumela leswaku Yesu u thlandlukele e matilweni, laha a fumaka na Xikwembu-Tatana, swin'we na Moya lowo kwetsima, naswona leswaku u ta vuya a ta avanyisa lava hanyaka na vafi athlela a nyika valandzeri vakwe vutomi lebyi nga heriki. Ku tswariwa ka yena, ku chumayela ka yena, ku vambiwa ka yena, na ku pfuxiwa swi vuriwa eVhangeli kumbe "Mahungu lamanene". Rito evhangeli rithlela ri hlamusela matsalwa ya vutomi bya Yena na tidyondzo ta yena, leti tivekaka ngopfu hi leti tsariweke hi —Matewu, Mareka, Luka, na Yohani.

Vukreste byi sungule hi lembe-xidzana ro sungula. Byisimekiwe ku suka e Yudeya, naswona byi hangalake ku xika e Yuropa, Siriya, Bhabhilona, Ashiya, Gibhita, Topiya na Indiya, naswona hi lembe-xidzana ra vumune byi vile vukhongeri bya ximfumo bya le Rhoma. Byi yile emahlweni byi hangalaka na misava ku fika e Amerika, Ostraliya na Afrika wale dzongeni.