రాజ్యోత్సవ ప్రశస్తి

వివిధ రంగాలలో ప్రముఖులను ఈ పురస్కారంతో సత్కరిస్తారు.

ఈ పురస్కారాలను ప్రతి యేటా నవంబర్ 1వ తేదీన బెంగళూరులో కర్ణాటక ముఖ్యమంత్రి చేతుల మీదుగా బహూకరిస్తారు. ఈ పురస్కారం క్రింద ఒక లక్ష రూపాయల నగదు, 20-25 గ్రాముల బరువు ఉన్న స్వర్ణపతకం, ప్రశంసాపత్రం, జ్ఞాపిక, శాలువాను ఇస్తారు. ఇవి కాకుండా అర్హులైన పురస్కార గ్రహీతలకు ప్రభుత్వం తరఫున ఇంటి స్థలాలను కూడా ఇస్తారు.

రాజ్యోత్సవ ప్రశస్తిని 1966నుండి ఇవ్వడం ప్రారంభించారు. సామాన్యంగా బెంగళూరులోని "రవీంద్ర కళాక్షేత్ర"లో ఈ పురస్కార ప్రదాన కార్యక్రమం ఉంటుంది. ఈ పురస్కారాన్ని ఈ క్రింది విభాగాలలో విశేషమైన కృషి చేసినవారికి ఇవ్వబడుతుంది:
కళలు (సాహిత్యం, నాటకం, సినిమా, సంగీతం, నృత్యం, జానపదం, యక్షగానం, బయలునాటకం, శిల్పం, చిత్రలేఖనం), సమాజసేవ, పత్రికలు, మీడియా, క్రీడలు, వైద్యం, విద్య, వ్యవసాయం, శాస్త్ర సాంకేతిక రంగాలు. అనేక కారణాల వల్ల రాజ్యోత్సవ ప్రశస్తిని కొన్ని సంవత్సరాలు ప్రకటించలేదు.

రాజ్యోత్సవ ప్రశస్తిని అందుకున్న వారిలో రట్టిహళ్లి నాగేంద్రరావు, హెచ్.నరసింహయ్య, బి.ఆర్.పంతులు, గిరీష్ కర్నాడ్, మాస్తి వెంకటేశ అయ్యంగార్, రాజ్‌కుమార్, ఉడుపి రామచంద్రరావు, ప్రకాష్ పడుకోనె,జోళదరాశి దొడ్డనగౌడ, చింతామణి నాగేశ రామచంద్ర రావు, పుట్టణ్ణ కణగాల్, కుమార్ గాంధర్వ, యు.ఆర్.అనంతమూర్తి, భీమ్‌సేన్ జోషి, ఆరతి, ఆర్.కె.లక్ష్మణ్, రోజర్ బిన్నీ, సయ్యద్ కిర్మాణీ, సతీష్ ధావన్, శివరామ కారంత్, ఆర్.కే. నారాయణ్, జి.వి.అయ్యర్, తిక్కవరపు పఠాభిరామిరెడ్డి, బి.సరోజాదేవి, గుండప్ప విశ్వనాథ్, విష్ణువర్ధన్, అంబరీష్, శంకర్ నాగ్ (మరణానంతరం), అశ్వని నాచప్ప, ఎం.ఎం.కల్బుర్గి, పండరీబాయి, భారతి, షైనీ విల్సన్, బ్రిజేష్ పటేల్, అనిల్ కుంబ్లే, పి.బి.శ్రీనివాస్, జవగళ్ శ్రీనాథ్, మహేష్ భూపతి, అజీమ్ ప్రేమ్‌జీ, మంజు భార్గవి, ఎం.ఎ.నరసింహాచార్, మైసూర్ నాగమణీ శ్రీనాథ్, ఎం.ఎస్.షీలా, సుమ సుధీంద్ర, మైసూర్ ఎం.నాగరాజ, హెచ్.ఆర్.కేశవమూర్తి, వైశాలి కాసరవల్లి, సురేష్ అర్స్, సుహాస్ గోపీనాథ్ మొదలైన ప్రముఖులు ఉన్నారు.