ನಾಗರ ಪಂಚಮಿಡ್ ಉಚ್ಚುದ(ನಾಗನ) ಅರಾಧನೆ.
ನಾಗ ದೇವೆರೆಗ್ ಪೂಜೆ ಮಲ್ಪುನ, ತನು ಪಾಡುನ ಪರ್ಬ. ತುಲುನಾಡ್ಡ್ ಈ ನಾಗದೇವೆರ್ ಮಸ್ತ್ ನಂಬಿಕೆದ ದೇವೆರ್. ಒಂಜೊಂಜಿ ಕುಟೊಂಬಗ್ ಒಂಜೊಂಜಿ ಬನ ಉಪ್ಪುಂಡು. ನಾಗರ ಪಂಚಮಿದಾನಿ ಮಾತೆರ್ಲ ಸೇರ್ದ್ ತನು ಪಾಡುವೆರ್. ಬೈಲ್ದ ಪುಂಚೊಗು ಪೇರ್ ಪಾಡ್ದ್ ಪೂಜೆ ಮಲ್ಪುವೆರ್. ಉಂದು ಪೊಂಜೊವ್ಲೆಗ್ಲಾ ವಿಶೇಷವಾಯಿನ ಪರ್ಬ.
ನಾಗರ ಪಂಚಮಿ | |
---|---|
ಇಂಚಲಾ ಪನ್ಪೆರ್ | Naaga Pujaa |
ಆಚರಿಸವೆರ್ | ಹಿಂದೂಲು |
ಬಗೆ | ಧಾರ್ಮಿಕ, ಭಾರತ ಬುಕ್ಕ ನೇಪಾಳ |
Observances | Worshipping images or live Cobra. |
ತಾರಿಕ್ | Fifth day (Panchami) of the month of Shravana month of the Lunar calendar |
ನಾಗರ ಪಂಚೆಮಿ/ಪಂಚಮಿ ತುಳುನಾಡ ಸುರುತ ಪರ್ಬ, ಫಲವಂತಿಕೆದ ಪರ್ಬೊಲ ಅಂದ್. ಇನಿತಲೆಕ ಈ ಪರ್ಬೊ ದುಂಬು ಸಾರ್ವಜನಿಕವಾದ್ ನಡತೊಂದಿಜ್ಜಾಂಡ್. ತುಳುವೆರ್ ಮೂರ್ತಿ ಪೂಜೆ ಮಲ್ತೊಂದಿಜ್ಜಂಡ್ ಅಪಗ ಅಕ್ಲಕ್ಲೆ ಇಲ್ಲ ಜಾಲ್ಡ್, ಇಜ್ಜಿಂಡ ಇಲ್ಲ ಕೈತಲುಪ್ಪುನ ಬನೊಟಾ, ಇಜ್ಜಿಂಡ ಕಂಡದ ಕೋಡಿದ್ ಉಪ್ಪುನ ಬನತ ನಾಗನ ಕಲ್ಲ್ಗ್ ಪೇರ್ ಮೈತೊಂದಿತ್ತೆರ್. ಅಪಗದ ಕಾಲೊಡು ನಾಗಾರಾದನೆ ಪಂಡ ಪರಿಶುದ್ದವಾಯಿನ ಮಣ್ಣ್ಡ್ದ್ ಮಲ್ತಿನ ಮಣ್ಣ್ದ ಕರಟ್ ನಾಗನ ಪ್ರತಿಕೃತಿನ್ ಬುಡ್ಪಾದ್, ನಾಗಮುರಿ ಪನ್ಪಿ ಈ ಕರನ್ ದೀದ್ ತುಳುವೆರ್ ನಾಗ ತಂಬಿಲ ಮಲ್ತೊಂದಿತ್ತೆರ್. ತಂಬಿಲ ಮಲ್ತ್ದ್ ಕರಟ್ ಶುದ್ದವಾಯಿನ ನೀರ್ ದಿಂಜಾದೀದ್ ಅರೆಗಾಲದ ದೊಂಬುದ ಪೆಟ್ಟ್ಗ್ ಉಚ್ಚುಲೆಗ್ ಬಾಜೆಲಾದ್ ಕಂಗಾಲಾವಂದಿಲೆಕ್ಕ ಜಾಗ್ರತೆ ಮಲ್ತೊಂದಿತ್ತೆರ್. ಇಂಚ ನೀರ್ ದಿಂಜಾದೀತಿನ ಕರಕೊಲು ಪ್ರಾಣಿ, ಪಕ್ಕಿಲೆನ್ ತಂಪು ಮಲ್ತ್ದ್ ಪ್ರಕೃತಿ ತಂಪು ಇತ್ತೊಂದಿತ್ತ್ಂಡ್. ಕಾಲ ಕಳೆವೊಂದು ಪೋಯಿಲೆಕ್ಕ ತುಳುನಾಡ್ದ ಜಲಸಂಸ್ಕ್ರಿತಿ ದೂರಾದ್ (ಆರ್ಯೆರ್ನ ಅಗ್ನಿ ಸಂಸ್ಕೃತಿ)ವೈದಿಕತೆ ನಮ್ಮಡೆ ಬನ್ನಗ ನಾಗ ದೇವೆರೆ ಈ ಸೇವೆನ್ ನಾಗರ ಪಂಚೆಮಿಯಾದ್ ಪರ್ಬೊದ ಆಚರಣೆಗ್ ಕನತೆರ್. ಕರಕ್ ಪೂಜೆ ಮಲ್ಪುನ ಶಾಸ್ತ್ರೊಗು ಸರಿಯತ್ತ್ ನಾಗ ಪೂಜೆಗ್ ಮೂರ್ತಿಯೆ ಮುಖ್ಯ ಪನ್ನಗ ನಾಗಮುರಿಕುಲು ಪೊಟ್ಟುಗುವೆಲ್ ತೋಡು ಸೇರ್ಂಡ್. ಕರತ ಬದಲ್ ನಾಗನ ಮೂರ್ತಿ ಪ್ರತಿಷ್ಠೆ ಆಂಡ್ ವೈದಿಕತೆ ಸುರುವಾಂಡ್ ಅವೆಡ್ದ್ ಬೊಕ್ಕ ನಾಗೆ ಮಸ್ತ್ ಶುದ್ದವಾಯಿನ ದೇವೆರ್ ಅವೈದಿಕೆರ್ ನಾಗನ ಮೂರ್ತಿದ ಮುಟ್ಟ ಸುಳಿಯೆರೆ ಸಮೇತ ಆವಂದ್ ಪನ್ಪಿ ಪಾತೆರೊಗು ಪೋಡಿದ್ ದೂರ ಉಂತುವೆರ್. ಪುಂಚದ ಪುರ್ಸದಂದ್ ದುಂಬುದ ಕಾಲೊಡು ಪುಂಚದ ಮಣ್ಣನ್ ಕಣ್ಣಗ್ ಒತ್ತೊಂದು ಮುಂಡೊಗು ಪುರ್ಸದ ಪಾಡೊಂದು ಬಂಜಿಗೊಂತೆ ದೆತೊಂದು ಇತ್ತ. ಅಂಡ ಏಪ ವೈದಿಕ ಸಂಸ್ಕೃತಿ ನಮ್ಮಡೆ ಬತ್ತುಂಡೋ ಅವೆರ್ದ್ ಬೊಕ್ಕ ಪುಂಚದ ಪುರ್ಸಾದದ ಬದಲ್ಗ್ ಮಂಜಲ್ ಪೊಡಿ ಪುರ್ಸಾದ ಆದ್ ತಿಕ್ಕೆರೆ ಸುರು ಅಂಡ್.ನಾಗಬನ ಸಿಮೆಂಟ್ದ ಕಟ್ಟೆ ಅಂಡ್. ಬನೊಟು ಇತ್ತಿ ಮರಕುಲು ಪ್ರಾಣಿ, ಪಕ್ಕಿಲೆಗ್ ಆಸರೆಯಾದ್ ಉಪ್ಪೆರೆ ಅಂಚನೆ ಕಾಲ ಕಾಲೊಗು ಬರ್ಸ ಬರಿಯೆರೆ ಬೋಡಾದ್ ದುಂಬುದಕುಲು ಇಂಚಿತ್ತಿ ನಾಗ ಬನೊಕ್ಲೆನ್ ಒರಿತೊಂದು ಬೈದೆರ್.ಆಂಡ ನಮ ಇನಿ ಬನೊಕ್ಲೆನ್ ಕಡ್ತದ್ ಸಿಮೆಂಟ್ದ ನಾಗನ ಕಟ್ಟೆಲೆನ್ ಮಲ್ತೊಂದುಲ್ಲ. ಸಿಮೆಂಟ್ದ ಬೆಚ್ಚೊಗು ಉಚ್ಚುಲು ಖಂಡಿತ ಬದುಕುಜಿ. ಕಾಡ ಬರಿಟ್ ಪಂಚವರ್ಣದ ಶುದ್ದಬಣ್ಣೊಡು ಕಾಲಸರ್ಪನ ಮಂಡಲ ಬರೆದ್ ನಡತೊಂದಿತ್ತಿನ ನಾಗ ದರ್ಶನದ ನಲಿಕೆದ ಸೇವೆನೆ ಕಾಡ್ಯನಾಟ ಪುಂಚದ ಮಣ್ಣೆ ಪುರ್ಸಾದೊ. ಆಂಡ ತುಲುವೆರೆ ಕಾಡ್ಯನಾಟ ಮಾತ ಇನಿ ಅಧುನಿಕತೆದ ಬುಳೆಚ್ಚಿಲ್ಗ್ ತಿಕ್ಕಿದ್ ನಾಗಮಂಡಲ ಪನ್ಪಿ ರೂಪ ಪಡೆದ್ ಬೇತೆಕುಲೆನ ಜೋಳಿಗೆ ದಿಂಜಾಪಿನ ಸೊತ್ತಾದುಂಡು.ಆಂಡ ವೈದಿಕೆರ್ ಪೊಯೆರಾವಂದಿನ, ದೂರ ದೀತಿನ ಮೇರೆ ಮೊಗೇರೆ ಪನ್ಪಿ ಜಾತಿದಕುಲು ಇತ್ತೆಲ ಕೆಲವು ಕಡೆಟ್ ನಾಗಮುರಿ ದೀದ್ ಅವೈದಿಕ ತಂಬಿಲ ಬೊಕ್ಕ ಕಾಡ್ಯನಾಟದಂಚಿನ ಮೂಲ ಸಂಪ್ರದಾಯೊನು ಒರಿಪಾವೊಂದು ನಡಪಾವೊಂದು ಬರೊಂದುಲ್ಲೆರ್
ಕೇದಗೆ, ಸಂಪಿಗೆ, ರೆಂಜೆ, ಪಿಂಗಾರ ಇಂಚಿನ ಪೂಕುಲು ನಾಗಗ್ ಇಷ್ಟ. ಇತ್ತೆ ಅಂಚಿನ ಪೂಕುಲೆನ್ ಬಡುದು ಪೇಂಟೆದ ಪೂಕುಲೆನ್ ಪಾಡೊನ್ದುಲ್ಲ.
ನಾಗರ ಪಂಚೆಮಿದಾನಿ ಓಲೋಲು ಪುಂಚ ತೋಜಿಂಡಾ ಅವ್ಲವ್ಲು ಪೇರ್ ಮೈಪುನತ್ತ್. ದೈವ, ದೇವಸ್ಥಾನದ ಬರಿಟ್ ನಾಗನ ಪುಂಚ ಇತ್ತಂಡ ಅವೆಕ್ ಪೇರ್ ಮೈಪೊಲಿ.ಪೇರ್ ಮೈಪುನಗಲಾ ಲೀಟರ್ಗಟ್ಳೆ ಪೇರ್ ಮೈಪುನತ್ತ್. ಒಂಜಿ ರಡ್ಡ್ ಚಂಚದಾತ್ ಮೈಪೊಡು. ತುಡರ್ ಅರ್ಲಾದ್ ಊದುಬತ್ತಿ ತೋಜಾದ್ ಅವೆರ್ದ್ ಬೊಕ್ಕ ಆರತಿ ಮಲ್ಪೊಡು. ಅಂಚ ಮಲ್ತಿ ಬೊಕ್ಕ ಅಡೆಗ್ ಪೂ ಬಿರ್ಕೆರೆ ಬಲ್ಲಿ. ಅವೆತ ಬದಲಾದ್ ಅರಿ ಇಜ್ಜಿಂಡ ಬಾರ್ ಬಿರ್ಕೊಲಿ. ಬಾರ್ ಬಿರ್ಕುಂಡ ಫಲ ಜಾಸ್ತಿ. ದಾಯೆ ಪಂಡ ನಾಗೆ ಫಲವಂತಿಗೆದ ಶಕ್ತಿ. ಭೂಮಿದ ಫಲವಂತಿಕೆನ್ ರಕ್ಷಣೆ ಮಲ್ಪುನ್ನೇ ನಾಗೆ. ಅಂಚಾದ್ ನಾಗ ಬೆಮ್ಮೆರೆ ಈ ತುಳುನಾಡ್ ಡ್ ಬರಗಾಲ ಬರಂದ್. ಅಂಡ ಸ್ರ್ ಷ್ಠಿ ಕರ್ತೆ ಬ್ರಹ್ಮೆನೆ ಬೇತೆ ನಾಗಬೇರ್ಮೆರೆ ಬೇತೆ. ಉದಲ್ದ ಪುಂಚ ನಾಗಗ್ ಬಾರೀ ಇಷ್ಟ. ಅಂಚಾದ್ ನಾಗೆ ಅವೆಟೆ ಬದುಕುನಿ.
ನಾಗನ ಕಟ್ಟೆ ಅಶ್ವತ್ಥ ಮರತಡಿಟ್ ಇತ್ತಂಡ ಐಕ್ ಬಾರೀ ಮಹತ್ವ ಉಂಡು. ದಾಯೆ ಪಂಡ ಬ್ರಹ್ಮ, ವಿಷ್ಣು, ಈಸರ ದೇವೆರ್ ಈ ಮರಟುಪ್ಪುವೆರ್ಗೆ. ಅಂಚಾದ್ ಈ ಮರತಡಿಟ್ ಇತ್ತ್ನ ನಾಗನ ಕಲ್ಲ್ಗ್ ಪೆತ್ತದ ಪೇರ್ ಮೈತಂಡ ಬಾರೀ ಎದ್ಡೆಗೆ. ದಾಯೆ ಪೆತ್ತದನೆ ಪೇರ್ ಮೈಪೊಡು, ಅವೆಕ್ಲ ಒಂಜಿ ಕಾರಣ ಉಂಡು. ಪೆತ್ತದ ಸರ್ರೊಡು ಮುಪ್ಪತ್ತ ಮೋಜಿ ಕೋಟಿ ದೇವತೆಲು ಉಲ್ಲೆರ್ಗೆ. ಅಂಚಾದ್ ಪೆತ್ತದ ಪೇರ್ ಅಮುರ್ತಗ್ ಸಮಾನ ಅದುಂಡು. ಪೇಂಟೆಲೆಡ್ ಮಲ್ಲ ಮಲ್ಲ ಕಟ್ಟನೊಲು ಉಪ್ಪುನವ್ಲು ನಾಗಾರಾಧನೆ ಎಂಚ ಮಲ್ಪೊಲಿ ಪಂಡ ಒಂಜಿ ಹರಿವಾಣ ದೆತೊಂದು ಅವೆಟ್ ಬೊಲ್ಲಿದ ನಾಗನ್ ದೀದ್ ಅವೆಕ್ ಮಂಜಲ್, ಬೊಂಡ, ಪೇರ್ದ ಅಭಿಷೇಕ ಮಲ್ತದ್ ಪೂಜೆ ಮಲ್ಪೊಲಿಗೆ. ಅವು ಬುಡ್ದು ಆ ಕಟ್ಟೊನೊಡು ಯೇರ್ನಂಡಲ ಇಲ್ಲಲ್ ಪುಂಚ ಇತ್ತಂಡ ಅವೆಕ್ ಪೋದು ಪೇರ್ ಮೈಪುನವು ತಪ್ಪಾಪುಂಡು.
ನಾಗರ ಪಂಚೆಮಿದಾನಿ ಗಾಳಿಲ ಬರ್ಸಲ ಬತ್ತದ್ ನಾಗನ ಕಲ್ಲದ ಮಿತ್ತ್ ಮೈತನ ಪೇರ್ ಕಡಲ್ ಸೇರೊಡುಗೆ. ಭೂಮಿರ್ದ್ ಮಿತ್ತ್ ಏಳ್ ಲೋಕ ಇತ್ತ್ಲೆಕನೆ ಭೂಮಿರ್ದ್ ಆಡಿಟ್ ಏಳ್ ಪಾತಾಲೊಳುಲ್ಲಗೆ. ಪಾತಾಳದ ಗುರ್ಕಾರ್ರೆ ನಾಗೆ. ಅಂಚಾದ್ ಭೂಮಿದ ಮಿತ್ತ್ ನಾಗನ ಕಲ್ಲ್ಗ್ ಮೈತ್ನ ಪೇರ್ ಕಡಲ್ದ ಮುಕಾಂತರ ನಾಗನ್ ಸೇರುನ್ದುಗೆ. ಉಂದೊಂಜಿ ತುಳುವೆರ್ನ ನಂಬೊಳಿ ಗೆಯಾದುಂಡು. ಕೃಷಿ ಪ್ರಧಾನವಾಯಿನ ತುಳುನಾಡ್ ದ ಭೂಮಿನ್ ಕಾಪುನ ನಾಗಗ್ ಬೊಂಡ ಅವುಲ ಗೆನ್ದಾಲಿ ಬೊಂಡ, ಮಂಜಲ್ ಪೂಜುನಿ, ಪೇರ್ದ ತನು ಕೊರ್ಪುನಿ ಪಂಡ ಬಾರೀ ಇಷ್ಟ. ನಾಗನ ಬಣ್ಣ ಮಂಜಲ್ ಇತ್ತ್ ನೆರ್ದಾತ್ರ ಆಯಗ್ ಕೊರ್ಪುನ ಪೂ,ಪರ್ನ್ದ್, ಫಲವಸ್ತು, ಪುರ್ಸದ ಪೂರ ಮಂಜಲ್ ಬಣ್ಣದವೇ ಆದಿಪ್ಪುಂಡು. ಕಡು ಇಸತ ಬಣ್ಣೊಲ ಮಂಜಲ್ ಆದ್ ಉಪ್ಪುಂಡು. ಅಂಚನೆ ನಂಜಿ ಇಸೊನು ಮಾಜಾಯೆರೆ ಉಪಯೋಗ ಮಲ್ಪುನ ಮಂಜಲ್ದ ಪೊಡಿಲ ಮಂಜಲೇ ಆದುಂಡು. ಕಜಿಪುಗು, ಮೋನೆದ ಪೋರ್ಲುಗ್ಲಾ ಮಂಜಲ್ದ ಉಪಯೋಗ ಆಪುಂಡು.
ಲತ್ತ್ ಪಿಂಗಾರದ ಮುಗ್ಗೆ ನಾಗ ದೇವೆರೆಗ್ ಇಷ್ಟೊಗೆ. ಅಂಚಾದ್ ನಾಗಮಂಡಲ, ನಾಗನ ದರ್ಸನೊಗು ಪಿಂಗಾರದ ಪಾಲೆಲೆನ್ ಕನತದ್ ಅವೆಕ್ ಚೂರು ನೀರ್ ಪಾಡ್ದ್ ಪಾತ್ರಿಲು ಮೋನೆಗ್ ಉರ್ದೊನ್ವೆರ್. ಅಪಗ ಅಕ್ಲೆ ಮೋನೆ ಉಚ್ಚುದಲೆಕ ತೋಜುಂಡು.
This article uses material from the Wikipedia ತುಳು article ನಾಗರ ಪಂಚಮಿ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ಪ್ರತ್ಯೇಕವಾದ್ ಉಲ್ಲೇಕ ಮಲ್ಪಂದೆ ಇತ್ತ್ಂಡ, ವಿಸಯ "CC BY-SA 4.0" ದ ಅಡಿಟ್ ಲಬ್ಯ ಉಂಡು. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ತುಳು (DUHOCTRUNGQUOC.VN) is an independent company and has no affiliation with Wiki Foundation.