ಉಮಾಬಾಯಿ ಕುಂದಾಪುರ

ಭಗಿನೀ ಮಂಡಲದ ಸ್ಥಾಪಕಿ, ನಾ ಸು ಹರ್ಡೀಕರ್ ಸ್ಥಾಪಿಸಾಯಿನ ಹಿಂದೂಸ್ತಾನಿ ಸೇವಾದಲೊದ ಮಹಿಳಾ ವಿಭಾಗೊದ ಮುಖ್ಯಸ್ಥೆ ಆದಿತ್ತೆರ್.

ಉಮಾಬಾಯಿ ಕುಂದಾಪುರ
ಪುಟ್ಟಿನ	ಭವಾನಿ ಗೋಳಿಕೇರಿ ೨೫ನೇ ಮಾರ್ಚ್ ೧೮೯೨ ಕುಂದಾಪುರ
ಮರಣ	೧೯೯೨ ಹುಬ್ಬಳ್ಳಿ
ರಾಷ್ಟ್ರೀಯತೆ	ಭಾರತೀಯ
ವೃತ್ತಿ(s)	ಸಮಾಜಸೇವಕಿ, ಸ್ವಾತಂತ್ರ್ಯ ಹೋರಾಟಗಾರ್ತಿ
Organisation(s)	ಭಗಿನೀ ಮಂಡಲ, ಹಿಂದೂಸ್ತಾನಿ ಸೇವಾ ದಳ, ತಿಲಕ್ ಕನ್ಯಾ ಶಾಲೆ
Known for	ಮಹಿಳಾ ಸಬಲೀಕರಣ
ಸಂಗಾತಿ	ಸಂಜೀವರಾವ್ ಕುಂದಾಪುರ
ಪಾಲಕರುs	ಗೋಳಿಕೇರಿ ಕೃಷ್ಣರಾವ್ (father) ತುಂಗಾಬಾಯಿ (mother)

 

 

ಉಮಾಬಾಯಿ ಕುಡ್ಲದ ಕುಂದಾಪುರೊಡು, ಬ್ರಾಹ್ಮಣ ಕುಟುಂಬೊಡು ೨೫ನೇ ಮಾರ್ಚ್ ೧೮೯೨ನೇ ಇಸವಿಡ್ ಪುಟ್ಟಿಯೆರ್. ಎಲ್ಯ ಇಪ್ಪುನಗ ಆರೆನ ಪುದರ್ ಭವಾನಿ ಗೋಳಿಕೇರಿ. ಅಮ್ಮೆರ್ ಗೋಳಿಕೇರಿ ಕೃಷ್ಣರಾವ್, ಅಪ್ಪೆ ತುಂಗಾಬಾಯಿ. ಐನ್ ಜನ ಆಣ್‌ಜೋಕುಲು, ಒರ್ತಿ ಮಗಲ್. ಉಮಾಬಾಯಿ ಕಡೆತ ಮಗಲ್. ೧೮೯೮ನೇ ಇಸವಿಡ್ ಮೆಗ್ಯಪಳಾಯನಕುಲೆನ ಒಟ್ಟಿಗೆ ಬೊಂಬಾಯಿ ಸೇರಿಯೆರ್. ೧೯೦೫ನೇ ಇಸವಿಡ್ ೧೩ನೇ ಪ್ರಾಯೊಡು ಸಂಜೀವರಾವ್ ಕುಂದಾಪುರ ಮೆರೆನೊಟ್ಟುಗು ಮದ್ಮೆ ಆಂಡ್. ಉಮಾಬಾಯಿಯೆರೆನ ಸಮ್ಮಲೆ ಆನಂದರಾವ್ ವಿಶಾಲ ಮನೋಭಾವದಾರ್, ಪೊಂಜವುಲೆನ ಸಬಲೀಕರಣೊದ ಬಗ್ಗೆ ಮಸ್ತ್ ಬೇಲೆ ಮಲ್ತೊಂದು ಇತ್ತಿನಾರ್. ತನ್ನ ಮರ್ಮಲ್ ಎಡ್ಡೆ ಕಲ್ಪೊಡು ಪಂಡ್‌ದ್ ಉಮಾಬಾಯಿನ್ ಪೂನಾದ ಅಣ್ಣಾಸಾಹೇಬ್ ಕಾರ್ವೆ ಶಾಲೆಡ್ ಸೇರಾಯೆರ್. ಕಲ್ಪುನೆಕ್ ಸಮ್ಮಲೆ ಮಸ್ತ್ ಬೆರಿಸಾಯ ಕೊರಿಂಡಲಾ, ಉಮಾಬಾಯಿನ ಆರೋಗ್ಯದ ಸಮಸ್ಯೆಡ್ದಾವರ ತನ್ನ ೨೫ನೇ ಪ್ರಾಯಮುಟ್ಟಲಾ ದಿಂಜ ದುಂಬರಿಪಾವರ ಆಯಿಜಿ. ಅಂಚಾದ್ ಮೆಟ್ರಿಕ್ಯುಲೇಶನ್ ಮುಗಿನಗ ಉಮಾಬಾಯಿಗ್ ೨೭ ವರ್ಷ ಪ್ರಾಯ ಆದಿತ್ಂಡ್. ಅಪಗದ ಕಾಲೊಡು ಪೊಣ್ಣುಲು ಮೆಟ್ರಿಕ್ಯುಲೇಶನ್ ಕಲ್ಪುನನೇ ಮಲ್ಲ ವಿಸಯ ಆದಿತ್ಂಡ್. ಈ ಕಾರಣಡ್‍ದಾವಾರ, ೨೭ನೇ ಪ್ರಾಯೊಡು ಮೆಟ್ರಿಕ್ ಕಲ್ತಿನ ಉಮಾಬಾಯಿಗ್ ಬೊಂಬಾಯಿದ ಸಾರಸ್ವತ ಮಹಿಳಾ ಸಮಾಜದಕುಲು ಲೆತ್ತ್‌ದ್ ಸಮ್ಮಾನ ಮಲ್ತೆರ್. ಅತ್ತಂದೆ ಆ ಸಂಘದ ಗೌರವ ಕಾರ್ಯದರ್ಶಿಯಾದ್ ಆಯ್ಕೆ ಮಲ್ತೆರ್.

೧೯೨೦ನೇ ಇಸವಿ ಅಗೋಸ್ತು ೧ನೇ ತಾರೀಕ್‍ಗ್ ಬಾಲಗಂಗಾಧರ ತಿಲಕೆರ್ ತೀರಿಯೆರ್. ತಿಲಕೆರ್‌ನ ದೇಹದ ಮೆರವಣಿಗೆ ತೂದು ಉಮಾಬಾಯಿಯೆರೆಗ್ ಸ್ವಾತಂತ್ರ್ಯ ಹೋರಾಟೊಗು ಜಪ್ಪರ ಪ್ರೇರಣೆ ಆಂಡ್. ಆ ಕಾಲೊಡು ಸ್ವಾತಂತ್ರ್ಯ ಹೋರಾಟೊಗು ಜಪ್ಪುನಕಲೆಗ್ ಕಾಂಗ್ರೆಸ್ ಸಂಘಟನೆ ಬೊಕ್ಕ ಐತ ಬೇಲೆಲು ಎಡ್ಡೆ ಉದಾರ್ಮೆ ಆದಿತ್ಂಡ್. ಉಂದೇನ್ ಮಾತ ತೂದು, ಸ್ವಾತಂತ್ರ್ಯ ಹೋರಾಟೊಗು ಸೇರಿಯೆರ್.

೧೯೨೦ನೇ ಇಸವಿ ಸೆಪ್ಟೆಂಬರ್ ೪ನೆ ತಾರೀಕ್‌ಗ್ ಮಹಾತ್ಮಾ ಗಾಂಧೀಜಿ ಅಸಹಕಾರ ಚಳುವಳಿಗ್ ಲೆಪ್ಪು ಕೊರಿಯೆರ್. ಅಪಗ ಉಮಾಬಾಯಿ ತನ್ನ ಕಂಡನಿ ಸಂಜೀವರಾವ್ ಒಟ್ಟುಗ ಸೇರ್‌ದ್ ಬೇಲೆ ಮಲ್ತೆರ್, ಖಾದಿ ಕುಂಟುದ ಬಗ್ಗೆ ಪ್ರಚಾರೊ ಮಲ್ತೆರ್. ಇಲ್ಲ‍ಇಲ್ಲಗ್ ಪೋದು ಪೊಂಜವುಲೆನ್ ಸ್ವಾತಂತ್ರ್ಯ ಹೋರಾಟೊಗು ಜಪ್ಪರೆ ಲೆಪ್ಪು ಕೊರಿಯೆರ್. ಅತ್ತಂದೆ ಸ್ವಾತಂತ್ರ್ಯ ಹೋರಾಟೊದ ವಿಷಯೊಗು ಸಂಬಂಧಿಸಾದ್ ನಾಟಕೊಲೆನ್ ಬರೇದ್ ಪ್ರದರ್ಶಿಸಾಯೆರ್.

ಉಮಾಬಾಯಿ ೩೧ ವರ್ಷ ಪ್ರಾಯೊಡು ಉಪ್ಪುನಗ ಕಂಡನಿ ಸಂಜೀವರಾಯೆರೆಗ್ ಕ್ಷಯ ಸೀಕ್ ಬತ್ತ್‌ದ್ ತೀರಿಯೆರ್. ಕಂಡನಿ ತೀರಿಬೊಕ್ಕ ತನ್ನ ಸಮ್ಮಲೆನೊಟ್ಟುಗು ಹುಬ್ಬಳ್ಳಿಗ್ ಬತ್‌ದ್ ಉಂತಿಯೆರ್. ಸಮ್ಮಲೆ ಆನಂದರಾಯೆರ್ ಹುಬ್ಬಳ್ಳಿಡ್ ಕರ್ನಾಟಕ ಪ್ರೆಸ್ ಸುರು ಮಲ್ತೆರ್.

ಅಮೇರಿಕಾ ದೇಸೊಗು ಕಲ್ಪರೆ ಪೋದಿತ್ತಿನ ನಾ. ಸು. ಹರ್ಡೀಕರ್ ಸಾರ್ವಜನಿಕ ಆರೋಗ್ಯ ವಿಸಯೊಡು ಎಂ.ಎಸ್. ಪದವಿ ಕಲ್ತ್‌ದ್ ಹುಬ್ಬಳ್ಳಿಗ್ ಬತ್ತೆರ್. ಮೇರ್, ನಮ ದೇಸೊದ ಜವನೆರೆನ್ ಸ್ವಾತಂತ್ರ್ಯ ಹೋರಾಟೊಗು ಸೇರ್ಪಿಲೆಕ ಪ್ರೇರೇಪಿಸಾವರೆಗಾದ್ ಹಿಂದೂಸ್ತಾನಿ ಸೇವಾ ದಳ ಹುಬ್ಬಳ್ಳಿಡ್ ಸ್ಥಾಪಿಸಾಯೆರ್. ಈ ಸಂಘೊಡು ಉಮಾಬಾಯಿ ಸೇರಿಯೆರ್, ಆ ದಳತ್ತ ಮಹಿಳಾ ವಿಭಾಗೊದ ಮುಖ್ಯಸ್ತೆ ಆದ್ ನೇಮಕವಾಯೆರ್. ನೆತ್ತ ಒಟ್ಟುಗ ತಿಲಕ್ ಕನ್ಯಾ ಶಾಲೆದ ಜಬದಾರಿಕೆ ವಹಿಸೋಂದೆರ್.

೧೯೨೪ನೇ ಇಸವಿಡ್ ಕಾಂಗ್ರೆಸ್ ಸಂಘಟನೆದ ರಾಷ್ಟ್ರೀಯ ಸಮ್ಮೇಳನೊ ಬೆಳಗಾವಿಡ್ ಆಯೋಜನೆ ಆಂಡ್. ಕಾಂಗ್ರೆಸ್ ಸಂಘಟನೆದ ಇತಿಹಾಸೊಡು, ನಡತ್ತಿನ ಮಾತ ಸಮ್ಮೇಳನೊಡು ಮಹಾತ್ಮಾ ಗಾಂಧೀಜಿಯೆರ್ ಅಧ್ಯಕ್ಷೆರಾದ್ ಇತ್ತಿನ ಏಕೈಕ ಸಮ್ಮೇಳನ ಅವು ಆದಿತ್ಂಡ್. ಉಮಾಬಾಯಿ ಈ ಲೇಸ್‌ಡ್ ನಾ ಸು ಹರ್ಡೀಕರೆರ್‌ನ ಒಟ್ಟುಗು ಮಸ್ತ್ ಉತ್ಸಾಹೊಡು ಪಾಲ್ ದೆತೊಂದೆರ್. ಮಾತ್ರ ಅತ್, ಮೈಸೂರು ರಾಜ್ಯೊಡು ಮಾತ ತಿರ್ಗ್‌ದ್ ೧೫೦ ಜನ ಪೊಂಜವುಲೆನ್, ಐಟ್‌ಲಾ ಕಂಡನಿದಾಂತಿನ ಪೊಂಜವುಲೆನ್ ಒಟ್ಟು ಸೇರಾದ್ ಸ್ವಾತಂತ್ರ್ಯ ಸಂಗ್ರಾಮೊಡು ಪಾಲ್ ದೆತೊಂದಿಲೆಕ ಮಲ್ತೆರ್. ಸಮ್ಮಲೆ ಆನಂದರಾಯೆರೆನ ಪ್ರೆಸ್ ಬೊಕ್ಕ ಇಲ್ಲ್ ಕಾಂಗ್ರೇಸ್ ಸಂಘಟನೆದ ಬೇಲೆದ ತಾಣ ಆಂಡ್. ಕಾಂಗ್ರೇಸ್ ಸಂಘಟನೆದ ಬೆಳಗಾವಿ ಸಮ್ಮೇಳನೊಡ್ದಾವರ ಉಮಾಬಾಯಿ ರಾಷ್ಟ್ರಮಟ್ಟೊದ ಬಿನ್ನೆರೆನ ಸಂಪರ್ಕೊಗು ಬರ್ರೆ ಸಾಯ ಆಂಡ್. ಅತ್ತಂದೆ, ಈ ಸಮ್ಮೇಳನೊಡು ಉಮಾಬಯಿಯೆರ್ ಮಲ್ತಿನ ಬೇಲೆ ತೂದು, ೧೯೨೭-೨೮ನೇ ಇಸವಿಡ್ ಕಾಂಗ್ರೆಸ್ ಸಂಘಟನೆದ ಕರ್ನಾಟಕ ವಿಭಾಗೊದ ಉಪಾಧ್ಯಕ್ಷೆ ಆದ್ ಆರಿಸಾಯೆರ್.

ಸ್ವಾತಂತ್ರ್ಯ ಹೋರಾಟೊಡು ಮಸ್ತ್ ಉಮೇದ್‍ಡ್ ಪಾಲ್ ದೆತೊನೊಂದು ಇತ್ತಿನ ಉಮಾಬಾಯಿಯೆರೆನ್ ೧೯೩೨ನೇ ಇಸವಿಡ್ ಬ್ರಿಟೀಷ್ ಸರ್ಕಾರೊ ಬಂಧಿಸಾದ್ ೪ ತಿಂಗೊಲು ಯೆರವಾಡ ಜೈಲ್‌ಡ್ ದೀಂಡ್. ಜೈಲ್‌ಡ್ ಇಪ್ಪನಗನೇ ಸಮ್ಮಲೆ ಆನಂದರಾಯೆರ್ ತೀರಿನ ವರ್ತಮಾನ ಬತ್ಂಡ್. ಮದಿಮೆ ಆಯಿಬೊಕ್ಕ, ತನ್‍ಕ್ ಮಾತ ವಿಸಯೊಡ್ ಬೆರಿಸಾಯ ಮಲ್ತೊಂದಿತ್ತಿನ ಸಮ್ಮಲೆ ತೀರಿನ ವರ್ತಮಾನ ತೆರೀದ್ ಉಮಾಬಾಯಿಯೆರೆಗ್ ತೆಡಿಲ್ ಹಾಕಿಲೆಕ ಆಂಡ್. ಅವ್ವೇ ಜೈಲ್‌ಡ್ ಇತ್ತಿನ ಸರೋಜಿನಿ ನಾಯ್ಡು ಉಮಾಬಾಯಿಯೆರೆಗ್ ಧೈರ್ಯ ಪಂಡೆರ್. ಅತ್ತಂದೆ, ಸ್ವಾತಂತ್ರ್ಯ ಹೋರಾಟೊಗು ಸಂಬಂಧಿಸಾಯಿನ ಮಾತಾ ಬೇಲೆನ್ ಗುಪ್ತವಾದ್ ಮಲ್ಪುಲೆ ಪಂಡ್ದ್‍ ಸಲಹೆ ಕೊರಿಯೆರ್. ಉಮಾಬಾಯಿ, ಜೈಲ್‌ಡ್ದ್ ಪಿದಾಯಿ ಬನ್ನಗ, ಆನಂದರಾಯೆರ್ ಸ್ಥಾಪಿಸಾದಿತ್ತಿನ ಕರ್ನಾಟಕ ಪ್ರೆಸ್‍ನ್ ಬ್ರಿಟೀಷ್ ಸರ್ಕಾರೊ ವಶ ಮಲ್ತ್ಂಡ್, ತಿಲಕ್ ಕನ್ಯಾ ಶಾಲೆನ್ ಮುಚ್ಚಿಂಡ್. ಬೊಕ್ಕ ಸ್ವಯಂ ಸೇವಾ ಸಂಘಟನೆ ಭಗಿನಿ ಮಂಡಲೊ ಕಾನೂನುಗು ವಿರುದ್ಧವಾಯಿನ ಸಂಘಟನೆ ಪಂಡ್‌ದ್ ಘೋಷಣೆ ಮಲ್ತ್ಂಡ್. ಈತ್ ಮಾತ ಆಂಡಲಾ, ಉಮಾಬಾಯಿ ಸ್ವಾತಂತ್ರ್ಯ ಹೋರಾಟೊಡು ಪಾಲ್ ದೆತೊಂಬುನ ಉಂತಾಯಿಜೆರ್. ಬೇತೆ ಬೇತೆ ಬರೀಡ್‍ದ್ ಬರೋಂದು ಇತ್ತಿನ ಸ್ವಾತಂತ್ರ್ಯ ಹೋರಾಟಗಾರೆರೆಗ್ ತನ್ನ ಇಲ್ಲಡ್ ಉಂತರ ಸಾಯ ಮಲ್ಪರೆ ಸುರು ಮಲ್ತೆರ್.

೧೯೨೪ನೇ ಇಸವಿಡ್ ಭಾರತ ಬಿಟ್ಟು ತೊಲಗಿ ಚಳುವಳಿದ ಸಮಯೊಡು, ಸುಮಾರ್ ಜನ ಭೂಗತವಾದ್ ಇತ್ತ್‌ದ್ ಸ್ವಾತಂತ್ರ್ಯ ಹೋರಾಟೊಡು ಭಾಗವಹಿಸೋಂದು ಇತ್ತೆರ್. ಅಕುಲು ಬ್ರಿಟೀಷೆರೆನ ಕಣ್ ತಪ್ಪಾದ್, ಉಮಾಬಾಯಿಯೆರೆನ ಇಲ್ಲಗ್ ಬತ್ತ್‌ದ್ ಉಂತೊಂದಿತ್ತೆರ್. ಅಕಲೆಗ್ ವನಸ್, ಜೆಪ್ಪರೆ ಜಾಗೆ ಕೊರ್ಪುನ ಜಬದಾರಿ ಉಮಾಬಾಯಿ ಮಲ್ತೊಂದಿತ್ತೆರ್.

ಬಿಹಾರ ರಾಜ್ಯೊಡು ೧೯೩೪ನೇ ಇಸವಿಡ್ ಭೂಕಂಪ ಆಯಿನ ಸಂದರ್ಭೊಡು ಹರ್ಡೀಕರ್ರೆನ ಹಿಂದೂಸ್ತಾನಿ ಸೇವಾ ದಲೊತ್ತ ಸದಸ್ಯೆರೆನ ಒಟ್ಟುಗು ಭಗಿನೀ ಮಂಡಲೊದ ಸದಸ್ಯೆರೆನ್ ಸೇರಿಸಾದ್ ಬಿಹಾರಗ್ ಪೋದು ಔಲು ಜನಕುಲೆಗ್ ಬೆರಿಸಾಯ ಕೊರಿಯೆರ್. ಈ ಸಂದರ್ಭೊಡೇ ರಾಷ್ಟ್ರೀಯ ನಾಯಕೆರಾಯಿನ ಬಾಬು ರಾಜೇಂದ್ರ ಪ್ರಸಾದ್, ಜೀವತ್‌ರಾಮ್ ಭಗವಾನ್‌ದಾಸ್ ಕೃಪಲಾನಿ ಬೊಕ್ಕ ನನಲಾ ಮಲ್ಲ ಬಿನ್ನೆರೆನ ಸಂಪರ್ಕೊಗು ಬತ್ತೆರ್.

೧೯೩೮ನೇ ಇಸವಿಡ್ ಬಾಂಬೆ ಪ್ರಾಂತೀಯ ವಯಸ್ಕರ ಶಿಕ್ಷಣ ಮಂಡಳಿ, ಉಮಾಬಾಯಿಯೆರೆನ್ ಮಹಿಳಾ ಪ್ರತಿನಿಧಿಯಾದ್ ಆರಿಸಾಂಡ್. ಅಲ್ಪ ಪೂನಾದ ಸಮಾಜಸೇವಕೆ ಎಸ್ ಆರ್ ಭಾಗವತೆರ್‌ನ ಒಟ್ಟುಗು ಬೇಲೆ ಮಲ್ಪುನ ಅವಕಾಶ ಸಿಕ್ಕಿಂಡ್. ಅತ್ತಂದೆ, ಆರೆನೊಟ್ಟುಗೆ ಕರ್ನಾಟಕ, ಮಹಾರಾಷ್ಟ್ರ ಬೊಕ್ಕ ಗುಜರಾತ್ ರಾಜ್ಯಡು ತಿರ್ಗುನ ಬೊಕ್ಕ, ಆ ರಾಜ್ಯೊಡು ಗ್ರಾಮೀಣ ಪ್ರದೇಸೊದ ಪೊಂಜವುಲೆನ ಸಾಮಾಜಿಕ ಬೊಕ್ಕ ಆರ್ಥಿಕ ಪರಿಸ್ಥಿತಿಲೆನ್ ಕೈತಲ ಪೋದು ತೂಪುನ, ಅಧ್ಯಯನ ಮಲ್ಪುನ ಅವಕಾಶ ಸಿಕ್ಕಿಂಡ್.

ಆರ್ಥಿಕ ಬೊಕ್ಕ ಸಾಮಾಜಿಕವಾದ್ ಪಿರ ಒರಿಯಿನ ಪೊಂಜವುಲೆಗ್ ಬೆರಿಸಾಯ ಕೊರ್ರಗಾತ್ರ, ಮಹಾತ್ಮಾ ಗಾಂಧೀಜಿ ೧೯೪೫ನೇ ಇಸವಿಡ್ ಕಸ್ತೂರ್‌ಬಾ ಟ್ರಸ್ಟ್‌ನ್ ಸ್ತಾಪಿಸಾಯೆರ್. ಈ ಸಂಸ್ಥೆದ ಕರ್ನಾಟಕ ಶಾಖೆದ ಮುಖ್ಯಸ್ತೆ ಆದ್ ಉಮಾಬಾಯಿಯೆರೆನ್ ೧೯೪೬ನೇ ಇಸವಿಡ್ ನೇಮಕ ಮಲ್ತೆರ್. ಕರ್ನಾಟಕೊಡು ಸಂಸ್ಥೆ ಸುರುವಾಯಿನ ಸಂದರ್ಭೊಡು ಸರ್ಕಾರದ ಬರಿಡ್‌ದ್ ಒವ್ವೇ ರೀತಿದ ಪಣವುದ ಸಾಯ ಆವಡ್, ಬೆರಿಸಾಯ ಆವಡ್ ಈ ಸಂಸ್ಥೆಗ್ ಇತ್ತಿಜಿ. ಅಪಗ, ಉಮಾಬಾಯಿ ಇಲ್ಲಇಲ್ಲಗ್ ಪೋದು ನಟ್ಟ್‌ದ್ ಪಣವು ಒಟ್ಟು ಮಲ್ತ್‌ದ್ ಸಂಸ್ಥೆದ ಬೇಲೆನ್ ದುಂಬರಿಪಾಯೆರ್. ಆರ್ಥಿಕವಾದ್ ಸಾಮಾಜಿಕವಾದ್ ಮಸ್ತ್ ಕಷ್ಟೊಡು ಇತ್ತಿನ ಪೊಂಜವುಲೆನ್ ಲೆತೊಂದು ಬತ್ತ್‌ದ್, ಅಕಲೆಗ್ ಕರಕುಶಲ ವಸ್ತುಲೆನ ತಯಾರಿಕೆ, ಕಲೆ- ಇಂಚಿತ್ತಿನ ತರಬೇತಿ ಕೊರ್ದು, ಆರ್ಥಿಕವಾದ್ ಸ್ವತಂತ್ರವಾದ್ ಬದ್‌ಕೆರೆ ಸಾಯ ಮಲ್ತೆರ್.

ಭಾರತ ದೇಸೊ ಸ್ವತಂತ್ರ ಆಪಿನ ಪೊರ್ತುಗು ಉಮಾಬಾಯಿ ಪುಗರ್ತೆ ದೆತೊಂದಿತ್ತೆರ್. ಸ್ವತಂತ್ರಗು ದುಂಬು, ಸ್ವತಂತ್ರಡ್‍ದ್ ಬೊಕ್ಕ ಮಲ್ತಿನ ಸುಮಾರ್ ಬೇಲೆಡ್‍ದಾವರ ರಾಷ್ಟ್ರಮಟ್ಟೊದ ಬಿನ್ನೆರೆಗ್ ಉಂಬೇರೆನ ಗುರ್ತ ಆಂಡ್. ತನ್‍ಕ್ ಬತ್ತಿನ ಪುಗರ್ತೆನ್ ಗಲಸ್‍ದ್ ರಾಜಕೀಯೊಗು ಬರ್ಪುನ ಅವಕಾಶ ಉಂಬೇರೆಗ್ ಇತ್ಂಡ್. ಸ್ವಾತಂತ್ರ್ಯ ಹೋರಾಟಗಾರೆರೆಗ್ ಕೊರ್ಪಿನ ರಾಜ್ಯ ಬೊಕ್ಕ ರಾಷ್ಟ್ರಮಟ್ಟೊದ ಪಿಂಚಣಿ ಸೌಲಭ್ಯಲಾ ಇತ್ಂಡ್. ಆಂಡ ಉಂದೆನ್ ಮಾತೆನ್ ಬೊಡ್ಚಿ ಪಂಡ್‍ದ ದೂರ ಒರಿಯೆರ್. ಸ್ವಾತಂತ್ರ್ಯ ಹೋರಾಟಗಾರೆರೆಗ್ ಕೊರ್ಪಿನ ತಾಮ್ರಪತ್ರ ಪ್ರಶಸ್ತಿನ್‍ಲಾ ದೆತೊನರ ಒಪ್ಪಿಜೆರ್. ಇತ್ತಿನಾತ್ ದಿನಲಾ ಒರ್ತಿ ಸಾಮಾನ್ಯ ಸ್ವಯಂಸೇವಕಿ ಆದೇ ಉಪ್ಪುವೆ ಪಂಡ್‍ದ್ ಆರೆನ ನಿರ್ಧಾರ್ ಆದಿತ್ಂಡ್.

ಉಮಾಬಾಯಿ ತೀರಿನ ಬಗ್ಗೆ ಜಾಸ್ತಿ ಮಾಹಿತಿ ಇಜ್ಜಿ. ಆರ್ ೧೯೯೨ನೇ ಇಸವಿಡ್ ಹುಬ್ಬಳ್ಳಿಡ್ ತೀರಿಯೆರ್. ಆರೆಗ್ ೧೦೦ ವರ್ಷ ಆದಿತ್ಂಡ್.