y’aya ni’an na Tayal (泰雅人的器皿)
kwara y’aya na gaga nni’an ta maki llyung Klesan hiya, kwara y’aya klayan ga piyang innagan ta sobih alang ta nanak, yani khoni’ ga klayan ta sklwan, siyu ro luhung, kuluk ga klayun ta taku ro hogan ta ’sya, ruma ga klayan ibu ro hogan iyung.
gaga na skbaley sklwan kwe ga gmwayow ta tyaba khoni’ na labing, khuyan ta iyik nya, tanux nya ga hoban ta pkita rekyasan na taku, cntman na iyik sklwan ga sblingan pwahun suna, yaca ini pgey tanux suna nya pnhapuy ta. siyu ro luhung ga y’aya scxu ta rhkey, krryax ga gnwyow ta tyaba ro khtu na khoni skbaley, siyu ga kruyux na ’bo, luhung ga skiyu ta iyik nya yani skayu rekyasan nya, tna’ naha sklwan ha’iy.
taku ro ibu hiya ga klayan ta ruma ro bkon ta ruma ro lhmi’ s’agan ta ro how mami’ lmyun ro hogun ta iyung, kuluk klayan ta hogan ta ’sya hiya ga myasa tegan rekyasan nya, musa ci tna’ tyaba nya, tna’ ci kiyey nya uy. kihuy ro galun ta kwara puri ro hi nya, ro skbaley taku hogan ta ’sya. ptna’ kya how ta ’sya hiya ga gmwyow ta kuluk, tunux nya ga kutun ta ro twangan umuk, nanu yaca ba’un posa ’sya, maki binah lwey, ruma hiya ga ba’un sreran utux utux hkuy nya ssyan ta ’sya, yani yakang micu.
sklwan hiya ga hpuyan ta sumu ru lmyun ita Tayal, kbaley ta rhkey ga, lmon posa iyik sklwan kya bwax na lmyun rnrang ro mhoyin sumu laga krum ta iyik luhung kya, sa’ing mlikuy pssyuk cxu, binah utux cyoli’ hiya ga skr’un rhkey knaley, tugan hi naha mrrow scxu ro kbaley rhkey. rhkey na Tayal baley hiya ga spgluw ta bu’ na heying mani’. ana ga micu ini ptna’ smogan nni’an cyoli’, iyik rhkey hiya ga twangan naha benux, cbing, nya kilux rhkey ro ni’un ga myasa ci ni’un baley.
This article uses material from the Wikipedia Tayal article y’aya ni’an, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 除非另有註明,否則頁面內容均以 CC BY-SA 4.0 條款授權。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Tayal (DUHOCTRUNGQUOC.VN) is an independent company and has no affiliation with Wiki Foundation.