Urow Knkyan Ta Ro Alang Tayal Bih Llyung Klesan

skura hlxun ro krayas llyung Turu kya ga maki gluw na cyoli’ Toca ro cyoli Tyuku, skura tl’tu ga sobih b’bu rgyax na Alisay bih Sansego ro alang b’nux nya. cyoli’ llyung Klesan ga nya si ngyut mwah maki alang ta klhangan Taytogow micu, si gluw llyung Turu, gong Moheng, gong Bsyuwan ro skura hlxun bih tyaba llyung Klesan, kya sobih utux kbhul kawas wayal ro mpuw magan kwara alang cn’rux knkyan haca.

cyoli’ nya maki bih llyung Klesan kwe ga iyat utux nanak ke kayan nya ro cyoli’ Tayal nanak maki kya, iyik kya ga maki skayan na ke squliq, nya mubuy Kinhakun ro skayan ke na cyoli’, nya mubuy Mb’ala, ro skura htgan wagi na S’ciq Tosa. kwara gluw naha pisa kawas wayal mso’un maki kya laga, smungus yow na k’asuw nlyakan ro mso’un naha musa mtiri’ lingey paris ro wa pmumu pkyalan ro c’rux ptna’ gluw, “utux llyung Klesan”, iyik na utux llyung Klesan kwe ga maki tugan tipik ps’un utux lhuyan na t’ara utux llyumg ro ptna’ nya maki utux llyung kya kwara: 1. nya tbcyan skura bih llyung Turu ga gluw gaga na Mkkwang, utux gluw kya ga, maki alang Pyahow, maki alang Kmuyow, maki alang B’bu Kaykay, maki alang na Kinngyang, ro alang na Kbabow, magan kwara alang maki kya. 2. nya tbcyan skura bih gong Bsyawan kya ga gluw gaga na Tnbunan. utux gluw kya ga, maki alang na Ryohen, maki alang na Kukut, maki alang na Rkinos, maki alang na Rgyax, maki alang na Haga paris, ro maki alang na Tbula’, tiyu kwara alang nya maki skura gong Bsyawan kya. 3. skura hlxun kya llyung Klesan kya ga gluw na utux bkis gaga Buta, utux gluw kya ga tugan kwara alang nya, maki alang Buta, ini ga alang Tlangan san ta kamayan uy, maki alang Tpyahan, maki alang Btunux nya maki alang Kasto kya micu.

ryax klhangan na Nipun Taywan lela ga knahul cnpngan biru mniru na Nipun, Tayal bih llyung Klesan ga t’ara sa’ing llyung nya, utux ’ara ga skura iyik llyung Klesan, utux ’ara ga nya skura hogan llyung Klesan kya. tbcyan skura ssyow na llyung Turu kya ga iyik na llyung Klesan san naha, bkgan kwara alang ga, maki alang Pyahow, ro maki alang Kinngyang, maki alang Kngayang, maki alang Kbabow, maki alang Klmwan. maki alang Kmuyow, ro alang B’bu Kaykay, cka na skura hogan llyung Klesan ro gong Bsyawan kya ga, payat kwara alang nya kya, bkgan kwara alang nya maki kya ga maki alang Buta, maki alang Tpyahan, maki alang Tbula’, maki alang rgyax, maki alang Ryoheng, maki alang Kukut, maki alang Rkinos, maki alang Haga Paris, payat kwara alang nya kya, tna’an kmayan lalu nya ga skura Hogan llyung Klesan san ta kmayan.

utux seng spat kbhul mesuw pgan kawas wayal khulun Nipun cinbwanan Taywan. utux seng ro spat kawas mpuw sa’ing byating mpuw spat ryax, gluw Hogan llyung Klesan ga wa rema msromun skapah klhangan na Nipun, gluw iyik na llyung Klesan kya, kwara alang na Tayal ga utux seng mesuw kbhul ro utux byating pusan mesuw ryax ga wa msromun klhangan na Nipun uy. ryax na aring utux seng mesuw kbhul mpuw sa’ing kawas knahul mnhut ro cnpxan Soto Xuku Taywan, wa si ngyut shiri’ knhulan ta ro mwah mbiya’ alang ta micu kwara gluw ta cyoli’ Tayal la.