Wachtyrz.eu

Wachtyrz.eu
Typ strōny	Cajtōng
Kōmercyjnŏ	Ja
Data powstaniŏ	2018-01-30
Posiedziciel	Silesia Progress
Wersyje jynzykowe	Wielogŏdkowŏ, nojwiyncyj po ślōnsku
Plac we Alexa	893,693
Strōna internetowŏ

Portal bōł ôtwarty we 2018 roku. Nojczyńścij pŏrŏ sie cołkim regiōnym Gōrnego Ślōnska, tak jego polskij, jak tyż czeskij tajle. Czas ôd czasu zajmuje sie tyż tymatami, co sie tykajōm Dolnego Ślōnska.

Wachtyrz je znōmy z byciŏ ôbiektym zainteresowań naukowcōw, co badajōm myńszości we postrzodkowyj Ojropie, i jejich jynzyki. Strōna je dostympnŏ za darmo i je financowanŏ ôd reklamodŏwcōw i bez crowdfunding. Wiyncyj jak połowa artykułōw na portalu je ôpublikowanych po ślōnsku.

 

Wachtyrz buł ôtwarty ôd Pejtra Długosza, posiedziciela Silesia Progress, Grzegorza Kulika, pisŏrza i tumacza, i Rafała Szymy, blogra i pisŏrza. Artykuł, co ôgłosiōł ôtwarcie strōny bōł ôpublikowany 30 stycznia 2018 roku, a kolegium redakcyjne napisało ô sztarcie Niy bydymy ścigać sie na nowiny ze srogimi agyncyjami, bo niy chcymy zastympować inkszych zdrzōdeł informacyji. Naszym cylym je zaistnieć za nowe nŏczynie ślōnskigo byciŏ w necu naszych używŏczy.

Portal stoł sie partnerym medialnym wielu społecznych i kulturalnych wydarzyń, kōnferyncyji naukowych i ksiōnżek zwiōnzanych ze ślōnskōm kulturōm, jak bez przikłŏd ślōnskigo przekładu Małego Princa, powieści Sprawa Salzmanna. Trup, którego nie było ôd Moniki Kassner, i tōmiku ślōnskij poezyje Cebulowŏ ksiynga umartych ôd Mirosława Syniawy.

Podle niykerych naukowcōw portal stoł sie placym moc ciekawych dyskusyji ô prziszłości ślōnskigo jynzyka. Niykerzi używali materyji ôpublikowanych na portalu we swojich badaniach ô ślōnskim separatyźmie. Inksi naukowcy ôbrali strōnã na platformã publikowaniŏ swojich podszukowań na ślōnske tymaty.

Portal przizwŏlŏ społeczności na publikowanie artykułōw. Po zaregistrowaniu idzie pisać włŏsne artykuły. Bez piyrszy rok fungowaniŏ, ôkrōm trzech czōnkōw redakcyje, 56 inkszych autorōw ôpublikowało swoje artykuły.

Bez piyrszy rok fungowaniŏ bez połowa artykułōw była ôpublikowanŏ po ślōnsku, 47% po polsku, a 2% było ôpublikowane abo po niymiecku, czesku, abo angelsku. Artykuły napisane po ślōnsku weszły we skłŏd Korpusu Ślōnskij Mŏwy ôpublikowanego we 2018 roku.

Portal je dostympny za darmo i je financowany ôd reklamodŏwcōw. Ôkrōm tego czytŏcze sōm zachyncani do financowego spiyraniŏ strōny.