Giù La Testa

A Fistful of Dynamite abo Duck, You Sucker!, niym. Todesmelodie, pol. Garść dynamitu, fran. Il était une fois la révolution) – film ze 1971 roku, kery reżiserowoł Sergio Leone, a do kerego muzykã skōmpōniyrowoł Ennio Morricone. Gyszichta kerõ ôzprawiŏ film je ô meksykańskim bandycie Juanie Mirandzie (groł go Rod Steiger) a irlandzkim imigrancie Johnie H. Mallory'u (groł go James Coburn), kery uciek z Irlandyje, beztōż co ôstoł wykryty bez brytyjske dinsty bezpiyczyństwa iże je ôn wojŏkym Irlandzkij Armije Republikańskij, kerzi napadli na bank we fikcyjnym sztadzie Mesa Verde a niyskorzij walczyli we meksykańskij rewolucyji.

• James Coburn – John H. Mallory
• Rod Steiger – Juan Miranda
• Rik Battaglia – Santerna
• Franco Graziosi – gubernatōr Jaime
• Romolo Valli – dŏchtōr Villega
• Antoine Saint-John – oberst Günther Reza
• Vivienne Chandler – Coleen (dzioucha ôd Johna H. Mallory'ego, ino w retrospekcyjach)
• David Warbeck – Nolan (kamrat ôd Johna H. Mallory'ego, ino w retrospekcyjach)

Na anfangu produkcyje filmu Sergio Leone mioł być ino producyntym filmu, a reżiserym mioł być Peter Bogdanovich. Atoli Peter Bogdanovich zrezygnował z reżiserowaniŏ, bo woloł robić film The Last Picture Show. Sergio Leone prōbowoł uwiyść reżisera Sama Peckinpaha coby pōmōg przi produkcyji filmu, atoli tyn tymu abszlagowoł. Dopiyro szauszpilery James Coburn a Rod Steiger uwiyścili, coby film reżiserowoł Sergio Leone.

Biny kere podug filmu pokazowały gōry Meksyku nagrano we Andaluzyji, a biny z banhofym we fikcyjnym sztadzie Mesa Verde nagrano we sztadzie Almería. Bank jak tyż pobliske chałpy we Mesa Verde stawianŏ ôd podstaw. Szynk w kerym bōły biny ze retrospekcyje Mallory'ego to Toner's pub we Dublinie. Zabytkowe budowle ze brōnnygo kamiynia kere sōm we filmie znajdujōm sie we szpanijskij prowincyji Soria.