Galileo Galilei

Anjeunna nyaéta budak cikal ti tujuh duduluran. Bapana nyaéta saurang musisi jeung padagan wol, anu miharep anak-anakna pikeun diajar kadokteran sabab bakal meunang leuwih loba duit tina widang kadokteran mah. Nalika umut sabelas taun, Galiléo dikirim pikeun diajar di sakola Jesuit.

Sabada opat taun, Galiléo tuluy ngabéjaan bapana yén anjeunna mutuskeun jadi pendéta. Hal ieu tangtu lain anu dipikahayang ku bapana, jadi Galiléo kudu kaluar ti sakolana. Dina taun 1581, nalika umur 17 taun, anjeunna asup ka universitas di Pisa pikeun diajar kadokteran, saperti anu dipikahayang ku bapana.

Hasil timuan Galiléo anu paling kawentar nyaéta dina widang astronomi. Téori pabéntangan dina awal taun 1600-an aya dina kaayaan anu teu tangtu. Aya rupa-rupa sawangan anu paguntreng antara nu milu kana téori Copernicus anu panon poé-séntris jeung anu milu kana téori nu leuwih kolot, bumi-séntris. Kira-kira taun 1609 Galiléo nyatakeun kapercayaanana yén Copernicus aya dina pihak anu bener, tapi harita anjeunna teu nyaho cara ngabuktikeunana. Dina taun 1609, anjeunna ngadéngé kabar yén aya anu hasil nyieun téléskop di Walanda. Sanajan anjeunna ngan saukur ngadéngé kalawan teu pati jelas éta kabar, tapi bakat ku jeniusna anjeunna mampuh nyiptakeun sorangan téléskop. Ku alat anyar ieu anjeunna mindahkeun perhatianana ka langit jeung ngan ukur sataun anjeunna bisa hasil nyieun timuan gedé kalawan gedé.