Drina
Ju Drina is ne Äi ap dät wäästelke Balkan-Hoolichailound.
Ju lukt Woater uut ne Flakte fon 19.926 km² un häd touhoope mäd ju Wäl-Äi Tara een Loangte fon 486 Kilomeetere.
Ferloop
Ju Drina äntstoant in do Dinoariske Bierge bie Hum an dät suudelke bosnisk-herzegowiniske Skeed, wier Tara un Piva, do uut Montenegro kuume, touhoopefljoote.
Besunners do bee Wäl-Äien ferloope in joop iensniedene Doale, fon ju Drina sälwen kon me dät uk mongs kweede, uumdät ju truch Karst-Loundskup, also besunners kalk-hooldich Rebät fljut. Dät rakt oaber uk Ousniede fon ju Äi, wier dät n sachter Ouger rakt, wier goud siedeljen is un al loange waas. Deeruum wuuden in't Drina-Doal uk Siedelengen uut ju Jungsteentied fuunen. Fääre is uur dät Drina-Doal tou tällen, dät dät moorere Moale skäärp ouknikket, wät uk typisk is foar ne Äi in ne Karst-Loundskup.
Die Bupperloop fljut truch Bosnien un Herzegowina. Oun't Ouger lääse do Stääde Foča, Goražde un Višegrad.
Die Middelloop bieldiget bolde dät Skeed tou Serbien. Ap ju serbiske Siede lait bolde deer ätter Bajina Bašta. Die Middelloop gungt bit Zvornik.
Uk die Unnerloop känteekent noch dät Skeed twiske Serbien un Bosnien un Herzegowina. Ap ju serbiske Siede lääse dan noch Banja Koviljača un Loznica. Bie Sremska Rača fljut ju Drina fon gjuchts in ju Save, wier ju ju grootste Ieuwen-Äi fon is. Uur ju Save un ju Donau fljut dät Woater ou in ju Swotte See.
This article uses material from the Wikipedia Seeltersk article Drina, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Der Inhalt ist verfügbar unter CC BY-SA 4.0, sofern nicht anders angegeben. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Seeltersk (DUHOCTRUNGQUOC.VN) is an independent company and has no affiliation with Wiki Foundation.