Astrologie

Die Noome "Astrologie" is oulat fon dät griechiske αστρολογια, "astrologia", ne Touhoopestaalenge fon άστρον (astron, Stiern of Stiernbielde) un λογος (logos, wät toun Biespil Theorie betjut. Dät honnelt sik foarallen uum dän Ferbeend twiske ju Bewäägenge fon Sunne, Moune un Planete, do bie do Antike uk as Stierne goolten.

Ju Bewäägenge fon Luchtpunkte as ju Sunne, ju Moune un do Planete un do Stierne an dän Heemel häd do Ljuude altied betöäwerd. Die Moanske häd Räägelmäitegaid in do Bewäägengen äntdäkt un fersoacht do tou beskrieuwen, wiertruch nit bloot do Luchtpunkte Noomen kriegen hääbe, man uk skienboare Touhoopestaalengen deerfon - do Stiernbielden un Stiernteekene. Truch ju Orientierenge an do Stierne äntwikkelden do arabiske Nomaden hiere Kunde fon Astronomie und Astrologie. Ieuwenske ju Beskrieuwenge fon do Heemelsköärpere in hiere Bewäägengen, ju Astronomie, hääbe Ljuude in Babylon un leeter uk Ägypten, China un uur Steeden Betjuudenge touspreeken an hiere Positione an dän Heemel, uum deeran toun Biespil ju Toukumst fon dän Stoat, ju Gratte fon dän Aaden, ju Stiegenge fon dän Nil of dät Skiksal fon n Härsker foaruuttoutällen. So is ju Astrologie äntsteen.

Dät apfaalendste Element fon ju Astrologie is dät Gebuurthoroskop. Uut ju Position fon ju Sunne in dän Diertekring un fon do Planete unner wäls Gebuurt wäide sien Oainskuppe un sin Toukumst oulat. Do maaste Wietenskuppere betrachtje Astrologie as ne Skienwietenskup of as Uurgloowe. Daach is dät heel un aal nit striedich, dät düssen Uurgloowe in ju Wietenskupsgeskichte fuul biedrain häd tou ju Äntwikkelenge fon ju iedenste Wietenskup Astronomie.

• Nomadismus
• Astrologie in dät 'Lesebouk'