Xhemal Pashë Zogolli

I biri i tij, Ahmeti do të bëhej mbret i Shqipërisë. Më 1932 u botua një përmbledhje me këngë patriotike e titulluar Xhemal Pashë Zogu dhe patriotizma dibrane punuar nga Hajdar Gjeloshi.

U lind në kështjellën e Burgajetit, i biri Xhelal pashë Zogollit dhe Ruhije hanëmit, e bija e Zyhdi bej Alltunit. Nga lisi i gjakut rrjedhte nga oxhaku i bejlerëve të Matit, të njohur prej 2-3 shekujsh si bajraktarë të fiseve të atjeshme dhe, prej 2 shekujsh, edhe si kajmekamë të trashëguar si mëkëmbës vendorë të sanxhakbeut të Ohrit dhe pas 1840 të valiut të Shkodrës. Nga e ëma, ishte nip i një familjeje të fuqishme feudale që qendrën tradicionale të pushtetit e kishin në qytezën e Kavajës.

Qe djali i tretë i çiftit, pas Rizait dhe Ziait, u edukua me mësues privatë dhe pasoi në postin e kajmekamit të Matit pas vdekjes së vëllait të madh.

Në mbledhjen e mbajtur në Kuvendin e Dibrës më 1880, Xhemal Pasha mbajti një qëndrim centralist dhe besnikëri ndaj Portës, duke qenë kundër përpjekjes për autonomi të vilajeteve shqiptare.

U martua me Meleqe hanëmin, kushërirë e parë e tij afërsisht e të njëjtës moshë, por vdiq duke lindur më 1884. Më pas u martua me Sadije hanëmin e bija e Salih ose Emin bej Toptanit.