Mahmud Ahmedinezhad (persisht: محمود احمدینژاد Mahmud Ahmadinežâd, IPA: mæhˈmuːd æhmædiːneˈʒɒːd), i njohur edhe si Mahmoud Ahmadinezhad, ishte kryetar, i gjashti me radhë, i Republikës Islamike të Iranit.
Ish-kryebashkiak i Teheranit, Ahmedinezhad fitoi mandatin e parë katërvjeçar në zgjedhjet presidenciale të Iranit në vitin 2005 dhe u rizgjodh më 2009 për katër vjet të tjera. Si kryetar, ai mbajti postin më të lartë të zgjedhur drejtpërdrejt nga qytetarët, si dhe kreu funksionet e kreut të qeverisë dhe disa funksione ceremoniale të kryetarit të shtetit. Kreu i vërtetë i shtetit në Iran është Udhëheqësi Suprem, i cili mban komandën e forcave të armatosura dhe ka tagër t'i rishikojë vendimet politike të ligjvënësve dhe ekzekutivit.
Ahmedinezhad mban titullin e doktorit të shkencave, ndërsa në politikë njihet si konservator i pikëpamjeve islamike shiite dhe një kundërshtar i madh i SHBA-ve dhe Izraelit. Telashet e Ahmedinezhadit janë dështimi i planit të tij ekonomik si dhe marrëdhëniet me botën e jashtme. Ai ka mbrojtur programin bërthamor të Iranit, me gjithë kundërshtimin e botës perëndimore. Njëherësh, gjendja e rëndë e të drejtave të njeriut dhe të grave nuk ka ndryshuar gjatë gati një mandati presidence të Ahmedinezhadit.
Kryetari iranian është figurë tejet kundërthënëse dhe komentet e tij kanë bërë që të njihet si njeri dhunshëm dhe luftëdashës. Së fundi, pohimi i tij në një konferencë të OKB-së se Izraeli është shtet i ndërtuar në baza raciste u përcoll nga braktisja e sallës ku ai po mbante fjalim. Izraelin e quan "Regjim Sionist", dhe pohon se janë kundër Sionizmit e jo kundër Hebrenjëve.
Në zgjedhjet presidenciale 2009, Ahmedinezhad u sfidua nga dy kandidatë reformistë, ish-kryeministri Mir Hosein Musavi dhe ish-kryeparlamentari Mehdi Karubi, dhe një konservator, ushtaraku dhe ekonomisti Mohsen Rezai. Ahmedinezadh u rizgjodh me mbi 60% të votave, ndonëse kandidati i dytë, Musavi, nuk e pranoi akoma disfatën, duke u thirrur në parregullsi zgjedhore. Më 2013, vendin e Ahmedinezhadit e zuni pasuesi i tij Hasan Ruhani.
This article uses material from the Wikipedia Shqip article Mahmud Ahmedinezhad, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Përmbajtja është në disponim nëpërmjet licencës CC BY-SA 4.0 nëse nuk shënohet ndryshe. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Shqip (DUHOCTRUNGQUOC.VN) is an independent company and has no affiliation with Wiki Foundation.