Emmanuel Egbo: Futbollist nigerian

Egbo luajti si portier gjatë karrierës së tij si futbollist, ku ai u dallua për kohën e tij te Tirana, me të cilët fitoi tre trofe. Ai gjithashtu ka përfaqsuar kombëtaren nigeriane, duke luajtur 12 ndeshje. Ai ka marrë pjesë në dy edicione të Kupës së Kombeve Afrikane.

Gjatë karrierës së tij, Egbo ka luajtur me NITEL Vasco Enugu, NEPA Lagos dhe Julius Berger në Premier Ligën Nigeriane, për Moroka Swallows në Premier Ligën e Futbollit të Afrikës së Jugut, për El-Masry në Premier Ligën Egjiptiane, dhe për Tiranën dhe Bylisin në Kategorinë Superiore.

Egbo ka luajtur 12 ndeshje me kombëtaren nigeriane. Ai ishte pjesë e ekipit që luajti në edicionet 2000 dhe 2002 të Kupës së Kombeve Afrikane. Në edicionin e vitit 2002, Nigeria e mbylli turnamentin në vendin e tretë.

Më 17 tetor 2015, trajneri i Tiranës Shkëlqim Muça u shkarkua pas barazimit 1–1 kundër Flamurtarit në kampionat; dy ndihmësat e tij Egbo dhe Ivan Gvozdenović u vendosën trajner të përkohshëm.

Më 9 dhjetor 2019, pas shkarkimit të trajnerit Julian Ahmataj për rezultate negative, Egbo u vendos sërisht në rolin e trajnerit të përkohshëm. Në ndeshjen e tij të parë në krye, Tirana mposhti rivalët e Partizanit me rezultatin 2–1 në Air Albania Stadium, duke regjistruar fitoren e parë ndaj tyre pas plot 6 vitesh. Më 28 dhjetor, pasi arriti tre fitore në tre ndeshje, përfshirë edhe në derbi, Egbo u zyrtarizua si trajner i klubit deri në përfundim të sezonit 2019–20.

Tirana e nisi vitin e ri 2020 në një formë të mrekullueshme, duke fituar 13 nga 14 ndeshjet e rradhës midis kampionatit dhe kupës. Barazimi i vetëm erdhi kundër Skënderbeut më 15 shkurt. Gjatë kësaj kohe, Tirana arriti një fitore historike 5–1 kundër Partizanit më 28 shkurt, e cila ishte më e madhja që nga viti 2005. Egbo pësoi disfatën e parë si trajner i Tiranës më 15 qershor ndaj Teutës në ndeshjen e 18të të tij si trajner; kjo ishte humbja e parë e Tiranës pas më shumë se 6 muajsh. Tirana e siguroi titullin e 25të kampion pas përfundimit të javës së 34të, ku Tirana mposhti Flamurtarin dhe Kukësi, rivali i vetëm për titull, u mposht 1–0 nga Vllaznia. Egbo u bë trajneri i parë afrikan që fiton një kampionat në Evropë. Në kupë, ekipi arriti deri në finale por u mposht me rezultatin 2–0 nga Teuta.

Statistikat si trajner

Redaktuar më 19 gusht 2020

Si lojtar

Julius Berger

• Premier Liga Nigeriane: 1996

Al-Masry

• Kupa e Egjiptit: 1997–98

Tirana

• Kategoria Superiore: 2002–03, 2003–04
• Kupa e Shqipërisë: 2001–02
• Superkupa e Shqipërisë: 2002, 2003

Si trajner

Tirana

• Kategoria Superiore: 2019–20

• Emmanuel Egbo te National Football Teams