Diego Milito: Futbollist argjentinas

Diego Alberto Milito (lindur më 12 qershor 1979) është një ish-futbollist profesionist argjentinas i cili luante si sulmues.

Diego Milito

Milito me Interin në 2009
Të dhënat vetjake
Emri i plotë	Diego Alberto Milito
Datëlindja	(1979-06-12) 12 qershor 1979 (44 vjeç)
Vendlindja	Bernal, Argjentinë
Gjatësia	1.83 m (6 ft 0 in)
Pozicioni	Sulmues
Karriera me të rinjtë
1987–1999	Racing Club
Karriera me klube*
Vitet	Klubi	Ndeshje	(Golat)
1999–2003	Racing Club	137	(34)
2003–2005	Genoa	59	(33)
2005–2008	Zaragoza	108	(53)
2008–2009	Genoa	31	(24)
2009–2014	Internazionale	128	(62)
2014–2016	Racing Club	50	(18)
Gjithsej		513	(224)
Karriera ndërkombëtare
2003–2011	Argjentina	25	(4)
*Ndeshjet dhe golat me klubet llogariten vetëm për ligën vendase

Milito e nisi karrierën e tij si profesionist në vitin 1999 në Primera División me Racing. Në vitin 2003, ai u transferua në Itali te Genoa, ku ai luajti për dy sezone. Në verën e vitit 2005, pasi Genoa ra në Serie C, Milito u transferua te klubi elitar Zaragoza, ku shkëlqeu për tre sezonet e ardhshme. Ai shfaqi aftësi shënimi të shkëlqyera në Spanjë, duke bërë që në verën e vitit 2008 të rikthehej sërisht te Genoa, këtë herë në Serie A, elita e futbollit italian.

Pas një sezoni si protagonist te Genoa, Milito u transferua te klubi kampion në fuqi Inter. Ai ishte lojtari më i rëndësishëm i ekipit në sezonin 2009–10, ku Interi arriti një Tripletë historike, duke shënuar 32 gola në të gjitha kompeticionet, përfshirë dy në finalen e Ligës së Kampioneve. Ai u rikthye në Argjentinë te Racing në vitin 2014, ku dhe fitoi kampionatin. Dy vite më pas, Milito i dha fund futbollit të luajtur, duke mbyllur një karrierë 17 vjeçare. Ai është konsideruar si një nga sulmuesit më të mirë të gjeneratës së tij.

Në nivel ndërkombëtar, Milito luajti 25 ndeshje me kombëtaren argjentinase, duke shënuar 4 gola. Ai ka marrë pjesë në dy edicione të Copa Américas, duke arritur finalen në vitin 2007, si dhe ka luajtur në Kupën e Botës 2010. Ai ka pseudonimin "El Príncipe" ("Princi" në shqip) për shkak të ngjashmërisë fizike me lojtarin uruguajan Enzo Francescoli, që gjithashtu kishte këtë pseudonim.

Racing Club

1999–2003: Vitet e para në Argjentinë

Milito u bashkua me akademinë e Racing Club që në moshën 8 vjeç, duke ngjitur rangjet me kalimin e viteve. Ai u bë pjesë e ekipit të parë për herë të parë në sezonin 1999–2000, duke debutuar si profesionist më 11 dhjetor në barazimin 3–3 kundër Unión de Santa Fe. Goli i tij i parë erdhi në disfatën 3–1 ndaj Colon de Santa Fe në Clausura. Për Racing ishte një sezon i vështirë, duke e mbyllur kampionatin Clausura në vendin e 18të; Milito regjistroi 11 paraqitje dhe një gol. Në janar 2001, drejtori i ri teknik Reinaldo Merlo i ofroi Militos kontratën e tij të parë si profesionist. Racing vazhdoi me rezultatet negative edhe në sezonin 2000–01; ekipi e mbylli Torneo Aperturën në vendin e fundit, por megjithatë arriti një vend të pestë në Torneo Clausura. Në ndeshjen e fundit të kampionatit kundër Club Atlético Colón, Milito luajti edhe pse ishte me ethe, duke shënuar golin që i dha Racing barazimin dhe mundësinë për të qëndruar në elitën e futbollit argjentinas. Ai e mbylli sezonin me 35 ndeshje dhe dy gola.

Milito ishte një nga lojtarët më të rëndësishëm të Racing gjatë sezonin 2001–02, ku klubi do të fitonte kampionatin Apertura. Para fillimit të sezonit, sulmuesi numëronte vetëm 3 gola në 46 ndeshje zyrtare; i pyetur rreth kësaj, Milito deklaroi: "Jam duke pasur një kohë të vështirë për të shënuar gola. Nuk e konsideroj veten golashënues dhe as nuk e marr me mend atë, por më duhet të shënojë më shumë. Ndonjëherë nxitoj në prekjen e fundit." Në ndeshjen e tij të 50të, Milito i dha fitoren 2–1 Racing ndaj Newell's Old Boys duke shënuar dy gola. Më 21 tetor, ai do të shënonte edhe në fitoren 2–1 kundër Colón de Santa Fe. Në Clausura, Milito do të bënte më mirë, duke shënuar 6 gola, përfshirë një dopietë në fitoren 2–1 kundër Boca Juniors. Ai, sëbashku me Francisco Maciel dhe Martin Vitali ishin lojtarët e vetëm që luajtën të gjitha ndeshjet në Apertura.

Gjatë kësaj kohe, vëllai i tij Gabriel Milito luante si mbrojtës për Independienten, skuadra rivale e Racing. Më pas të dy klubet u ndeshën në Derbin e Avellaneda, ku të dy vëllezërit Milito ishin në formacionin e parë.

Genoa

2004–2005: Suksesi personal në Serie B

Në janar 2004, Milito u transferua te klubi italian Genoa që në atë kohë luante në Serie B për 8 milion £. Ai mori fanellën me numrin 9 dhe debutoi zyrtarisht më 1 shkurt, duke shënuar golin e vetëm të ekipit në barazimin 1–1 kundër Ascolit. Goli i tij i dytë erdhi më 7 mars në fitoren minimale 1–0 kundër Venezias; goli i tij erdhi në minutën e 76të me penallti, e cila riktheu Genoan te fitorja pas dy humbjesh rresht. Më 22 maj, Milito shënoi një tripletë në suksesin 4–2 kundër Cagliarit; ai e mbylli gjysmën e dytë të sezonit 2004–05 me 12 gola në 20 ndeshje. Golat e tij ishin vendimtar për ekipin që arriti të sigurojë mbijetesën në Serie B.

Milito e nisi sezonin e ri duke shënuar me penallti në barazimin 1–1 kundër Modenës në javën e parë të Serie B. Më 10 tetor, ai mori kartonin e kuq të parë në karrierë (dy të verdhë) në fitoren 1–0 në transfertë ndaj Barit. Milito ishte një nga protagonistët më të rëndësishëm të ekipit gjatë sezonit 2004–05, të cilën e mbylli me 21 gola, duke humbur çmimin e golashënuesit për vetëm një gol ndaj Gionatha Spinesit (22 gola). Genoa e mbylli sezonin në vendin e parë me 76 pikë, duke u shpallur kampione dhe duke siguruar rikthimin në elitën e futbollit italian për herë të parë pas 10 vitesh.

Megjithatë, klubit ju hoq titulli dhe u rrëzua nga kategoria pas zbulimit të një skandali të quajtur Caso Genoa; më 11 qershor 2005, Genoa fitoi ndeshjen e javës së fundit kundër Venezias me rezultatin 3–2, me Militon i cili shënoi dy gola. Tre ditë pasi ndeshja kishte përfunduar, u zbulua se Stefano Capozucca, drejtori sportiv i Genoas, i kishte dhënë 250,000 € Giuseppe Pagliarës, drejtorit sportiv të Venezias, për të humbur ndeshjen qëllimisht. Më vonë u zbulua se personat mbrapa këtij skandali ishin presidentët e dy klubeve. Më 8 gusht 2005, Federata Italiane e Futbollit vendosi që Genoa do të rrëzohej në Serie C si dhe do të merrte një penalitet me tre pikë.

Pas rënjës nga kategoria të Genoas, Milito u largua nga klubi për t'u transferuar në Spanjë te Real Zaragoza. Pavarësisht kësaj, ai pati një periudhë të suksesshme në aspektin personal, duke shënuar 33 gola në 59 ndeshje.

Real Zaragoza

2005–2006: Debutimi në La Liga dhe finalja e kupës

Më 31 gusht 2005, në ditën e fundit të merkatos verore, Milito u tansferua te Real Zaragoza fillimisht në formë huazimi për dy vite për 2 milion € me të drejtë blerje për 5 milion €. Te Zaragoza ai gjeti vëllain e tij Gabriel i cili ishte kapiten i ekipit.

Milito mori fanellën me numrin 22 dhe bëri debutimin e tij në La Liga më 11 shtator në barazimin 2–2 në shtëpi kundër Valencias, duke luajtur 90 minuta të plota. Dhjetë ditë më pas, ai shënoi golin e parë me klubin në suksesin 3–1 kundër Osasunës në javën e 4të të La Ligas. Gjatë periudhës dhjetor/janar, Milito shënoi pesë gola në katër ndeshje, duke ndihmuar ekipin të merrte 10 pikë.

Në ndeshjen e parë të raundit të 16-tave të kupës, Milito shënoi një dopietë në fitoren 4–2 kundër Barcelonës në shtëpi. Pavarësisht humbjes 2–1 në ndeshjen e kthimit, Zaragoza u kualifikua në gjysëm-finale, ku u përball me Real Madridin; ishte pikërisht kjo ndeshje ku Milito do të fitonte famë botërore, duke i shënuar klubit kryeqytetas katër gola në fitoren 6–1 në ndeshjen e parë më 8 shkurt 2006. Zaragoza pësoi një humbje në ndeshjen e kthimit, por arriti në finale, ku u mposht nga Espanyol me rezultatin 4–1, duke humbur mundësinë të kualifikohej në Kupën UEFA për sezonin e ardhshëm.

Ai e mbylli sezonin e tij në parë në elitën e futbollit spanjoll si golashënuesi më i mirë i skuadrës me 15 gola.

2006–2008: Debutimi në Evropë dhe shiriti i kapitenit

Në nëntor 2006, u raportua se Real Zaragoza kishte vendosur për ta blerë përfundimisht kartonin e tij, pasi huazimi dy vjeçar ishte gati për të përfunduar. Milito ishte një nga golashënuesit më të mirë në sezonin 2006–07 në La Liga, duke shënuar 23 gola, dy më pak se golashënuesi me i mirë Ruud van Nistelrooy dhe tre mbrapa nga fituesi i Këpucës së Artë, Francesco Totti. Ai shënoi 21 gola në kampionat, duke ndihmuar Zaragozën që të kualifikohej në Kupën UEFA pas një vendi të gjashtë.

Në fillim të sezonit 2007–08, Milito u bë kapiteni i ri i ekipit, duke trashëguar shiritin nga vëllai i tij Gabriel, i cili ishte transferuar te Barcelona gjatë merkatos verore. Ai gjithashtu kishte firmosur një kontratë të re katër-vjeçare me klubin, i cili i kishte vendosur një klauzolë lirimi 100 milion €.

Më 8 mars 2008, Milito luajti ndeshjen e tij të 100të në La Liga, duke shënuar një penallti në fitoren 2–1 në shtëpi kundër Atlético Madrid. Ai e mbylli sezonin me 15 gola në kampionat; Zaragoza e përfundoi sezonin në vendin e 18të duke rënë në Segunda División.

Genoa

2008–2009: Rikthimi në Itali

Më 1 shtator 2008, vetëm disa minuta para mbylljes së merkatos verore, Genoa mbylli transferimin e Militos nga Zaragoza pasi ekipi spanjoll kishte rënë nga kategoria; klubi italian sipas raportimeve pagoi 6 milion €. Pavarësisht ofertave nga klube si Tottenham Hotspur dhe Real Madrid, Milito i kishte refuzuar të gjitha vetëm për t'u rikthyer te Genoa, kjo e konfirmuar edhe nga agjenti i tij Fernando Hidalgo.

Milito e nisi sezonin më 14 shtator duke shënuar dhe asistuar në fitoren 2–0 kundër Milanit në ndeshjen e javës së dytë të kampionatit; goli i tij erdhi nga penalltia të cilën e fitoi vetë në minutën e 90të pas një ndërhyrje të gabuar nga Paolo Maldini. Ky ishte gjithashtu goli i tij i parë me Genoan pas 1,191 ditësh. Dhjetë ditë më pas, në takimin e javës së katërt, Milito regjistroi dopietën e parë sezonale në suksesin mbreslënës 3–1 kundër Romës. Më 2 tetor, në ndeshjen e raundit të katërt të kupës kundër ekipit të Lega Pro Ravenna, Milito hyri si zëvëndësues në minutën e 59të dhe shënoi dy gola në tetë minutat e fundit të ndeshjes për t'i dhënë Genoas fitoren 2–1 dhe kualifikimin në raundin e 16-tave të fazës finale. Më 9 nëntor, ai shënoi tregolëshin e parë të sezonit në fitoren bindëse 4–0 në shtëpi kundër Regginës; të tre golat erdhën në pjesën e dytë. Kjo fitore e ngjiti ekipin në vendin e shtatë në renditje me 20 pikë. Milito vazhdoi formën e tij të shkëlqyer, duke shënuar golin e vetëm në ndeshjen derbi kundër rivalëve të qytetit Sampdoria, duke e dërguar Genoan në zonën evropiane; ky ishte goli i 12të i tij në 14 ndeshje të luajtura, duke u bërë edhe kryegolashënuesi i kampionatit. Genoa fitoi për herë të parë në Derby della Lanterna që nga nëntori 2001. Pas ndeshjes, Milito deklaroi: "Do ta kujtoj përgjithmonë".

Milito e nisi vitin 2009 duke shënuar dy gola në dy ndeshjet e para të vitit respektivisht kundër Catanias dhe Milanit; në të dyja rastet golat e tij ndihmuan Genoan që të barazonte rezultatin dhe të merrte nga një pikë. Gjatë merkatos dimërore, ai refuzoi një ofertë për t'ju bashkuar Interit, duke shprehur dëshirën për të përfunduar sezonin në Stadio Luigi Ferraris. Më 22 mars, pas katër ndeshjesh pa shënuar, Milito shënoi në minutën e 93të të fitores 2–0 kundër Udineses. Më 3 maj, në derbin e dytë të sezonit, Milito regjistroi tregolëshin e dytë sezonal duke i dhënë ekipit fitoren 3–1 ndaj Sampdorias. Po në atë muaj, Milito konfirmoi se do të largohej nga Genoa në përfundim të sezonit, duke i shkruar tifozëve një letër të hapur. Më 17 maj, ai regjistroi golin e 20të në kampionat në barazimin 2–2 kundër Chievos. Milito luajti ndeshjen e fundit me Genoan më 31 maj në fitoren 4–1 kundër Lecces, duke shënuar dy gola në pjesën e dytë. Falë 24 golave të tij në kampionat, Genoa arriti një vend historik të pestë me 68 pikë, duke u kualifikuar në fazën play-off të Ligës së Evropës; klubi u rikthye në kompeticionet evropiane për herë të parë pas 17 vitesh. Ai humbi çmimin Capocannoniere ndaj Zlatan Ibrahimović për vetëm një gol.

Internazionale

2009–2010: Tripleta historike në sezonin e parë

 

Më 20 maj 2009, La Gazzetta dello Sport komfirmoi se Diego Milito sëbashku me Thiago Mottën ishin transferuar te klubi i Milanos Inter. Nga ky transferim, Genoa kishte marrë lojtarët Robert Acquafresca, Riccardo Meggiorini, Francesco Bolzoni, Ivan Fatić dhe para në këmbim.

Milito u përshtat shumë shpejt me skuadrën duke bërë një debutim të përkryer me dy gola në fitoren 2–0 kundër rivalëve të Milanit në turnamentin miqësor World Football Challenge. Më pas, më 29 gusht 2009, në derbin e parë zyrtar për sezonin 2009–10, Milito dhuroi dy asiste dhe shënoi një gol me penallti duke ndihmuar Interin të arrinte një fitore historike 4–0; ky ishte goli i tij i parë kompetitiv për klubin. Më 13 shtator 2009, ai shënoi golin e tij të dytë në kampionat në fitoren 2–0 në San Siro kundër Parmës. Në ndeshjen e rradhës, Milito shënoi të dy golat e fitores së Interit në transfertë ndaj Cagliarit. Këto gola e bënë Militon me lojtarin me mesataren më të mirë të shënimit të të gjitha kohërave në Serie A, duke regjistruar 0.8 gola për ndeshje; deri në atë kohë, ai kishte shënuar 28 gola në 35 ndeshje. Pas kësaj, ai shënoi në fitoren komode 3–1 në shtëpi ndaj Napolit.

Vazhdimsia që Milito kishte shfaqur ndër vite me klubet e tjera si dhe në ndeshjet e para me Interin e bënë atë një nga lojtarët më të rëndësishëm të ekipit. Më 29 tetor, në fitoren 5–3 në shtëpi ndaj Palermos, ai u rikthye nga dëmtimi dhe shënoi golin e pestë të ekipit. Në ndeshjen e rradhës në Livorno, Milito shënoi golin e parë të fitores 2–0, duke arritur në kuotën e shtatë golave në nëntë ndeshje. Tre ditë më pas, ai regjistroi edhe golin e tij të parë në UEFA Ligën e Kampioneve, duke shënuar në fitoren 2–1 në transfertë ndaj Dynamo Kyiv; goli i tij solli barazimin e përkohshëm që i hapi rrugë golit të fitores nga Wesley Sneijder në minutën e 89të. Më 24 shkurt 2010, në ndeshjen e parë të raundit të 16-tave të Ligës së Kampioneve, Milito shënoi tre minuta pasi nisjes së ndeshjes me Interin që mposhti Çelsin 2–1 në San Siro. Pas kësaj, në ndeshjen e rradhës në kampionat, Milito rezuloi sërisht vendimtar për ekipin, duke shënuar golin e tretë dhe të fitores në suksesin 3–2 në transfertë ndaj Udineses. Më 27 mars, pasi nuk u aktivizua në ndeshjen ku Interi fitoi 3–0 kundër Livornos për shkak të një problemi muskulor, Milito u rikthye në formacion dhe shënoi golin e vetëm të ekipit të tij në disfatën 2–1 në Stadio Olimpico kundër ekipit rival për titull Romës. Në Ligën e Kampioneve, pasi Interi eliminoi Çelsin, u përball në çerek-finale kundër CKSA Moskës, ku në ndeshjen e parë Milito shënoi golin e fitores 1–0 në shtëpi. Interi fitoi përballjen me rezultatin e përgjithshëm 2–0, duke u rikthyer në gjysëm-finalen e kompeticionit për herë të parë që nga sezoni 2002–03. Në gjysëm-finale, Inter u përball kundër Barcelonës, e cila ishte kampionja në fuqi; në ndeshjen e parë në San Siro, Milito fillimisht asistoi dy golat e parë të ekipit të tij para se të shënonte të tretin vetë me kokë për t'i dhënë Interit një fitore historike 3–1.

 

Gjatë ndeshjeve të fundit të sezonit 2009–10, Milito tregoi sërisht që ishte lojtari më vendimtar i Interit që do të fitonte tripletën e parë në historinë e futbollit italian. Më 5 maj, argjentinasi shënoi golin e vetëm të fitores 1–0 ndaj Romës në finalen e Kupës së Italisë në Stadio Olimpico, duke i dhënë Zikaltërve trofeun e parë të sezonit. Njëmbëdhjetë ditë më pas, ishte një tjetër gol i Militos që i dha Interit fitoren 1–0 në ndeshjen e javës së fundit kundër Sienës; me këtë fitore, Interi e mbylli kampionatin në vendin e parë dy pikë para Romës, duke siguruar Scudetton e 18të në histori. Goli i Militos erdhi në minutën e 55të, duke e rikthyer sërisht Interin në krye, pasi Roma, e cila po luante kundër Chievos, po fitonte 2–0 me të dy golat e shënuar në pjesën e parë; në intervistën pas ndeshjes, Milito deklaroi se goli kundër Sienës ishte "më i rëndësishmi i karrierës së tij". Më 22 maj, në finalen e UEFA Ligës së Kampioneve kundër Bayern München, Milito shënoi një gol në çdo pjesë për t'i dhënë Interit fitoren 2–0 në Stadiumin Santiago Bernabéu. Si rezultat, Inter u bë kampion Evrope për herë të parë pas 45 vitesh, duke fituar titullin e tretë në histori, si dhe duke arritur edhe Tripletën historike. Milito e mbylli sezonin e parë në Milano me 35 ndeshje dhe 22 gola në Serie A, 5 ndeshje dhe 2 gola në kupë, 11 ndeshje dhe 6 gola në Ligën e Kampioneve dhe 1 ndeshje në superkupë.

2010–2011: Dëmtimet e shumta dhe tre trofe të tjera

Më 9 gusht 2010, Milito firmosi një kontratë të re katër-vjeçare me klubin. Ai e nisi sezonin e ri më 21 gusht duke luajtur 90 minuta të plota në ndeshjen e Superkupës Italiane kundër Romës, ku Inter fitoi 3–1 në San Siro, duke koleksionuar një tjetër trofe. Pesë ditë më pas, në ceremoninë për ndarjen e çmimeve të UEFA-s, Milito u nderua me çmimet Sulmuesi i Vitit dhe Lojtari i Vitit i Ligës së Kampioneve. Në ndeshjen e UEFA Superkupës Evropiane më 27 gusht, Inter u mposht nga Atlético Madrid 2–0 në Stade Louis II, me Militon i cili humbi një penallti në minutën e 90të. Ai gjithashtu luajti në ndeshjen e parë të kampionatit më 30 gusht, ku Inter e nisi mbrojtjen e titullin me një barazim pa gola kundër Bolonjës.

Më 14 shtator, ai shënoi një autogol aksidental në barazimin 2–2 në transfertë kundër Twentes në ndeshjen e parë të fazës së grupeve të Ligës së Kampioneve; ky ishte autogoli i tij i parë në karrierë. Megjithatë, tetë ditë më pas, Milito regjistroi golat e parë të sezonit, duke shënuar një dopietë në fitoren komode 4–0 kundër klubit të sapongjitur në elitë Barit, duke rikthyer Interin në vendin e parë në kampionat. Pas kësaj, Milito u godit nga një dëmtim muskular që e mbajti jashtë fushave të lojës për katër ndeshje, duke bërë që të pësonte edhe rënje në formë. Atij ju desh të priste datën 10 nëntor për të shënuar golin e rradhës; ai shënoi në barazimin 1–1 në transfertë ndaj Lecces. Gjatë festimit të golit, Milito shfalosi fanellën e shokut të skuadrës Walter Samuel, i cili tre ditë më para kishte pësuar një dëmtim të rëndë dhe kishte mbyllur sezonin. Katër ditë më pas, në humbjen në derbi ndaj Milanit, Milito u zëvëndësua para fillimit të pjesës së dytë pasi kishte pësuar një tjetër dëmtim muskular, që do ta mbante jashtë deri në fund të muajit nëntor. Në dhjetor, Interi fitoi edhe FIFA Kupën e Botës për Klube, duke e mbyllur vitin 2010 me pesë trofe të fituar; Milito, tashmë i rikuperuar nga dëmtimi, shënoi si dhe asistoi golin e kapitenit Javier Zanetti në ndeshjen gjysëm-finale kundër Seongnam Ilhwa Chunma, duke ndihmuar Interin të fitonte 3–0.

Më 24 janar 2011, në mbëmjen gala të Oscar del Calcio, Milito u nderua me çmimet "Lojtari më i mirë" dhe "Lojtari i huaj më i mirë" për përformancat e tij në sezonin e kaluar. Në shkurt, ai pësoi një tjetër dëmtim, këtë herë në kofshë, që e mbajti jashtë fushave të lojës për më shumë se një muaj, duke humbur plot nëntë ndeshje (përfshirë edhe dy ndeshjet e raundit të 16-tave të Ligës së Kampioneve kundër Bayern München, ku Inter u kualifikua me rregullin golit jashtë fushe). Më 5 prill, Milito shënoi golin e avantazhit të përkohshëm 2–1 kundër Schalke 04 në një humbje 5–2 në San Siro në ndeshjen e parë të çerek-finales së Ligës së Kampioneve; Interi u eliminua me rezultatin e përgjithshëm 7–3, duke humbur titullin. Pas kësaj, më 29 maj, në finalen e Kupës së Italisë në Romë kundër Palermos e cila ishte ndeshja e fundit e sezonit, Milito hyri në fushë si zëvëndësues dhe shënoi golin e tretë të ekipit të tij pas një pasimi të Goran Pandev për të ndihmuar Interin të fitonte ndeshjen 3–1 dhe trofeun. Milito e mbylli sezonin 2010–11 me vetëm 8 gola në 34 ndeshje në të gjitha kompeticionet, në një sezon të kushtëzuar nga rënja në formë dhe dëmtimet e shumta.

2011–2012: Rekordi personal i golave në Serie A

 

Milito e nisi sezonin 2011–12 duke shënuar një dygolësh në ndeshjen hapëse të Serie A ku Interi u mposht në mënyrë surprizë 4–2 nga Palermo në transferë. Më 24 shtator, ai regjistroi golin e rradhës në kampionat në suksesin 3–1 në transfertë ndaj Bolonjës, në ndeshjen debutuese të trajnerit të ri Claudio Ranieri, i cili kishte zëvëndësuar të shkarkuarin Gasperini pasi ekipi nuk kishte fituar ende asnjë ndeshje. Më 2 nëntor, në fitoren 2–1 kundër Lille në San Siro në fazën e grupeve të Ligës së Kampioneve, Milito shënoi golin e tij të 200të në nivel klubesh.

Më 27 nëntor, Milito luajti ndeshjen e tij të 400të si profesionist në fitoren minimale 1–0 në transfertë ndaj Sienës, kur më 18 dhjetor, në fitoren 1–0 kundër Cesenës, ai zhvilloi ndeshjen e tij të 100të në Serie A. Më 21 dhjetor, në ndeshjen e fundit të Interit për vitin 2011, Milito shënoi në fitoren 4–1 kundër Lecces, duke mposhtur portierin kundërshtar pas një vertikalizimi nga Ricardo Álvarez. Më 7 janar 2012, Milito e nisi vitin e ri me një dopietë në fitoren bindëse 5–0 kundër Parmës në shtëpi. Në ndeshjen e javës së ardhshme, Interi u ndesh kundër Milanit në Derby della Madonnina; Milito ishte vendimtar në këtë ndeshje, duke shënuar golin e vetëm në minutën e 54të pas një pasimi të Zanettit dhe një gabimi të mbrojtësit kundërshtar Ignazio Abate. Ai tashmë kishte shënuar shtatë gola në nëntë derbi të luajtura në Itali:, katër gola në katër ndeshje në Derby della Lanterna për Genoan kundër Sampdorias si dhe tre gola në pesë ndeshje në Derby della Madonnina kundër Milanit.

Më 1 shkurt, Milito shënoi katër gola në barazimin 4–4 në San Siro kundër Palermos; kjo ishte ndeshja e dytë që ai shënonte katër gola, që nga ndeshja kundër Real Madridit më 8 shkurt 2006. Ai u bë lojtari i parë në Serie A që shënon katër gola në një ndeshje që nga Christian Vieri, i cili i shënoi Brescias katër gola si lojtar i Interit më 1 dhjetor 2002. Më 1 prill, Milito shënoi tre gola në fitoren 5–4 ndaj ish klubit të tij Genoa, kjo në ndeshjen debutuese të trajnerit të ri Andrea Stramaccioni, cili kishte zëvëndësuar të shkarkuarin Claudio Ranieri pas rezultateve negative të ekipit. Më 6 maj, në ndeshjen e parafundit të sezonit kundër Milanit, Milito shënoi një tjetër tregolësh duke i dhënë Interit fitoren 4–2 dhe dopietën e parë ndaj rivalëve të qytetit që nga sezoni 2009–10; goli i tij i tretë, i shënuar me penallti, ishte i 50ti i tij me Interin në Serie A, duke kaluar legjendën braziliane Ronaldo. Tregolëshi i tij ishte i katërti i shënuar në një ndeshje derbi, pas atyre të Amadeit më 6 nëntor 1949, Nyers më 1 nëntor 1953 dhe Altafinit më 27 mars 1960. Kjo humbje i hoqi shpresat e Milanit për të fituar titullin kampion për të dytin sezon rresht. Më 13 maj, në ndeshjen e fundit të sezonit, Milito shënoi golin e vetëm të ekipit të tij me penallti në humbjen 3–1 kundër Lazios në transfertë.

Ai e mbylli sezonin me 24 gola në kampionat, duke vendosur një rekord personal; ai u rendit i dyti në garën për çmimin Capocannoniere, duke pasur katër gola më pak se fituesi Zlatan Ibrahimović. Milito shënoi edhe dy gola në Ligën e Kampioneve, duke e mbyllur sezonin me 26 gola në 41 ndeshje në të gjitha kompeticionet. Pavarësisht formës së tij të mirë, Inter zhvilloi një sezon zhgënjyes, duke u renditur vetëm në vendin e 6të në Serie A, kurse në kupë dhe Ligën e Kampioneve u eliminua respektivisht në çerek-finale dhe në raundin e 16-tave.

2012–2014: Dëmtimet e vazhdueshme dhe vitet e fundit

Milito filloi sezonin e katërt në Milano duke shënuar golin e dytë në fitoren 3–0 në transfertë kundër ekipit të sapongjitur Pescarës në javën hapëse të Serie A 2012–13. Më 28 tetor, ai festoi ndeshjen e tij të 100të në Serie A me fanellën e Interit, duke shënuar golin e katërt të sezonit në fitoren 1–3 kundër Bolonjës. Tre ditë më vonë, më 31 tetor, ai shënoi edhe golin e pestë të sezonit në fitoren 3–2 në San Siro kundër Sampodrias, duke regjistruar golin e 200të në nivel klubesh. Në ndeshjen e rradhës ndaj kryesuesve të Juventusit më 3 nëntor, Milito ishte sërisht protagonist duke shënuar një dopietë e cila rezultoi vendimtare për Interin, që përmbysi ndeshjen duke fituar 3–1; kjo ishte humbja e parë e Juventusit në stadiumin e ri pas 49 ndeshjesh.

Më 9 dhjetor, Milito festoi fitoren e tij të 100të në Serie A pas triumfit të Interit 2–1 ndaj Napolit në San Siro; ai ishte protagonist në këtë takim duke shënuar në pjesën e parë; kjo ishte fitorja e tij 100të në Serie A në 197 ndeshje të luajtura me Genoan dhe Interin. Ai u bë lojtari me më shumë gola në Serie A gjatë një viti kalendarik, duke regjistruar 28 gola për vitin 2012, një më shumë se Edinson Cavani dhe pesë më shumë se Antonio Di Natale.

Më 10 shkurt 2013, gjatë fitores 3–1 në shtëpi ndaj Chievos, Milito u rikthye në aksion pas një dëmtimi të pësuar në janar dhe shënoi golin e tretë të takimit; para kësaj, ai kishte asistuar golin e Esteban Cambiassos. Megjithatë, vetëm pesë ditë më pas, Miltio u godit nga një tjetër dëmtim, pasi në ndeshjen e Ligës së Evropës ndaj CFR Cluj ai u rrëzua dhe si pasojë këputi ligamentet e gjurit së majtë. Ai kaloi një operacion të suksesshëm dy ditë më pas dhe klubi njoftoi se koha e rikuperimit të tij do të ishte më shumë se gjashtë muaj. Kjo gjë bëri që Milito të mbyllte sezonin 2012–13 para kohe. Ai regjistroi 9 gola në 20 ndeshje në kampionat si dhe luajti 6 ndeshje në Ligën e Evropës.

Milito u rikthye të luajë ndeshjen e tij të parë me Interin pas dëmtimit më 22 shtator kundër Sassuolos, pasi kishte qënë në stol në ndeshjen e javës së kaluar kundër Juventusit. Ai u aktivizua si zëvëndësues dhe shënoi dy gola, me Interin që arriti një fitore rekord 7–0. Megjithatë, më 9 tetor, Milito pësoi një tjetër dëmtim të rëndë gjatë një seance stërvitore, duke qëndruar jashtë fushave për 12 ndeshje të tjera. Ai u rikthye sërisht në aksion më 6 janar 2014 në transfertën e humbur ndaj Lazios, duke u aktivizuar si zëvëndësues në minutat e fundit të ndeshjes. Gjatë vazhdimit të sezonit, u konfirmua se Milito do të largohej nga klubi në përfundim të sezonit.

Rikthimi te Racing

2014–2016: Titulli kampion dhe tërheqja nga futbolli

 

Në qershor 2014, në moshën 35 vjeç, Milito u rikthye te Racing Club, klubi ku ai u formua si lojtar dhe debutoi si profesionist. Ai mori fanellën me numrin 22 dhe shënoi në fitoren 3–1 kundër Defensa y Justicia në ndeshjen hapëse të kampionatit argjentinas më 10 gusht. Më 26 gusht, në javën e katërt të kampionatit, Milito shënoi golin e vetëm të takimit kundër Arsenal de Sarandí, duke mposhtur portierin kundërshtar me penallti. Pesë ditë më pas, ai regjistroi golin e tretë të sezonit në disfatën 2–1 ndaj Independiente; rrjeta e tij erdhi në minutën e 14të pas një asisti nga Ricardo Centurión. Asisti i tij i parë i sezonit ishte për sulmuesin Gustavo Bou në suksesin 2–1 kundër Boca Juniors më 25 shtator. Milito vazhdoi formën e tij të mirë, duke shënuar dhe asistuar në ndeshjet e ardhshme; një nga performancat e tij më të mira erdhi më 30 nëntor kundër Rosario Central, ku Milito shënoi dy gola. Kjo fitore e dërgoi Racing në vendin e parë në kampionat me vetëm një ndeshja nga fundi. Më 15 dhjetor, në ndeshjen e fundit të sezonit kundër Godoy Cruz, Milito mori pjesë në aksionin e golit të shënuar nga Ricardo Centurión. Racing fitoi ndeshjen 1–0 dhe u shpall kampion i Transición, duke u kualifikuar dhe në raundin e dytë të Kupës Libertadores 2015. Ky ishte titulli i parë i Racing pas 13 vitesh; Milito ishte i vetmi lojtar që gjithashtu kishte qënë pjesë e ekipit që fitoi titullin në vitin 2001, duke kontribuar kështu në titujt e vetëm të ekipit që nga viti 1966.

Milito nisi sezonin 2015 duke luajtur 90 minuta të plota në humbjen në shtëpi ndaj Rosario Central në ndeshjen hapëse të sezonit më 14 shkurt. Katër ditë më pas, Racing nisi aventurën e saj në Kupën Libertadores me një fitore spektakolare 5–0 në transfertë ndaj Deportivo Táchira në ndeshjen hapëse të fazës së grupeve; Milito ishte protagonist në këtë takim, duke regjistruar dy asiste dhe një gol, i pari i tij që nga viti 2003 në këtë kompeticion. Pas kësaj, Milito do të shënonte edhe në dy ndeshjet e ardhshme në grup, respektivisht ndaj Club Guaraní dhe Sporting Cristal; Racing pas tre ndeshjeve kryesonte grupin me pikë të plota. Në ndeshjet e dyta të grupit, Racing fillimisht regjistroi një fitore 4–2 ndaj Deportivo Táchira (ku Milito regjistroi golin e katërt në turnament), por humbi dy ndeshjet e fundit, megjithatë, u kualifikua për në fazën me eliminim direkt si fitues i Grupit 8 me 12 pikë. Në kampionat, Milito shënoi golin e tij të parë më 29 mars në suksesin 2–0 ndaj San Martín de San Juan, kurse i dyti erdhi me penallti në fitoren minimale 1–0 në derbin e Avellanedës ndaj Independiente më 24 maj. Ai e mbylli sezonin 2015 me 12 gola në 31 ndeshje në të gjitha kompeticionet; Racing e mbylli kampionatin në vendin e 4të, duke humbur titullin, kurse në Kupën Libertadores u eliminua në çerek-finale nga Club Guaraní. Gjatë këtij sezoni, Milito formoi një dyshe të suksesshme sulmi argjentinasin tjetër Gustavo Bou, duke shënuar sëbashku 31 gola dhe 8 asiste.

Në dhjetor, pasi kishte marrë vendimin të tërhiqej në fund të vitit 2015 nga futbolli, Milito njoftoi se do të luante edhe për gjashtë muajt e ardhshëm, me qëllim për të ndihmuar ekipin në Kupën Libertadores, duke shtuar se në qershor 2016 do të tërhiqej përfundimisht nga futbolli.

Më 21 maj 2016, Milito luajti ndeshjen e tij të fundit si futbollist profesionist, duke shënuar me penallti në minutën e 17të kundër Temperley. Tre minuta më pas, ai kishte mundësi të shënonte sërisht me penallti, por tentative e tij u prit nga Federico Crivelli, megjithatë Óscar Romero shënoi pas kthimit të topit. Racing fitoi 2–0 duke e mbyllur sezonin me fitore. Më 12 nëntor, disa muaj pasi ishte tërhequr nga sporti, Racing organizoi një ndeshje miqësore në nder të Militos, ku morën pjesë shumë nga ish shokët e tij në ekipe ndër vite si dhe shokë dhe familjarë. Në moshën 37 vjeç, Milito shënoi dy gola në ndeshje, dhe gjatë momentit të zëvëndësimit u duartrokit në këmbë nga të gjithë tifozët e Racing në stadium, të cilët e konsiderojnë sulmuesin si një nga lojtarët më ikonik të klubit. Po në atë vit, Milito mori një rol drejtuesi në klub, duke u bërë sekretar teknik.

2003–2004: Debutimi dhe paraqitjet sporadike

Milito bëri debutimin e tij me Argjentinën më 31 janar 2003 kundër Hondurasit ku shënoi golin e parë në fitoren 3–1 të kombëtares së tij; kjo ishte humbja e parë për Hondurasin në ndeshjet miqësore në shtëpi që nga viti 1998. Ai shënoi golat e dytë dhe të tretë të tij më 16 korrik 2003 në një ndeshje tjetër miqësore, këtë herë kundër Uruguajit. Pas kësaj, ai u thirr vazhdimisht dhe luajti në raste të rralla me kombëtaren.

2006–2007: Rikthimi dhe Copa América 2007

 

Pavarësisht formës së mirë në sezonin debutues me Zaragozën, Milito u la jashtë ekipit që do të luante në Kupën e Botës 2006, me trajnerin José Pekerman i cili preferoi sulmuesin e Interit Julio Ricardo Cruz.

Në maj 2007, Alfio Basile e përfshiu Militon në listën me 22 lojtarë që do të luanin në Copa América 2007. Ai e nisi turnamentin fillimisht si rezervë, por fitoi minuta pas dëmtimit të Hernán Crespos në ndeshjen e dytë të fazës së grupeve kundër Kolumbisë; në këtë ndeshje, Milito hyri në fushë në minutën e 21të dhe shënoi golin e katërt të ekipit të tij në minutën e 92të, me Argjentinën që fitoi ndeshjen 4–2. Kjo ishte një nga dy ndeshjet që ai luajti turnament; ndeshja e tij e dytë ishte çerek-finalja kundër Perusë (fitore 4–0), ku Milito luajti vetëm në pjesën e parë. Argjentina arriti në finale ku u mposht nga Brazili 3–0.

2008–2011: Fushata e Kupës së Botës 2010 dhe Copa América 2011

Forma fantastike që Milito shfaqi në fillim të sezonit 2008–09 me Genoan bëri që ai të thirrej nga trajneri Alfio Basile për dy ndeshjet kualifikuese të Kupës së Botës 2010 kundër Uruguajit dhe Kilit. Ai luajti në ndeshjen e parë ndaj Uruguajit më 11 tetor, duke u aktivizuar si zëvëndësues në minutën e 71të në vënd të Sergio Agüeros, me Argjentinën që fitoi 2–1; kjo ishte ndeshja e parë e Militos me Argjentinën pas 14 muajsh. Pas kësaj, ai filloi të thirrej më rregullisht, por vazhdoi të ishte zëvëndësues.

Në maj 2010, Milito u thirr nga trajneri Diego Maradona për Kupën e Botës 2010 në Afrikën e Jugut, ku ai ishte zgjedhje e dytë në sulm. Ai bëri debutimin e tij në një Kupë Bote më 12 qershor në fitoren minimale 1–0 kundër Nigerisë në ndeshjen e parë të fazës së grupeve, duke u aktivizuar në minutat e fundit si zëvëndësues. Më 22 qershor, në ndeshjen e tretë dhe të fundit në grup, Milito luajti si titullar në fitoren 2–0 kundër Greqisë, duke marrë pjesë në golin e parë të shënuar nga Martín Demichelis. Argjentina u eliminua në çerek-finale nga Gjermania, në një ndeshje ku Milito nuk u aktivizua. Gjithsej, ai luajti 92 minuta në dy ndeshje.

Në qershor 2011, Milito mori pjesë në Copa América 2011 pasi mori ftesë nga trajneri Sergio Batista, duke ju bashkuar shokëve të ekipit te Interi Javier Zanetti dhe Esteban Cambiasso. Ai nuk u aktivizua në asnjë ndeshje gjatë turnamentit, me Argjentinën që u eliminua në çerek-finale nga Uruguaji pas gjuajtjeve të penalltive. Gjithsej, Milito luajti 25 ndeshje dhe shënoi 4 gola me Argjentinën.

Milito ishte një sulmues i shpejtë, dinamik dhe me dhunti teknike, i cili zotëronte një vizion të mirë, balancë dhe instikt goli. Ai gjithashtu njihej për lëvizjet sulmuese dhe aftësinë në ajër, duke qënë i aftë të finalizonte aksionet si me kokë ashtu dhe me të dy këmbët, pavarësisht se ishte këmbë-djathtë. Ai ishte gjithashtu një ekzekutues i saktë i penalltive, duke pasur një rekord 48–8 në karrierë.

Në lidhje me stilin e tij elegant të të luajturit por shumë efikas, si dhe aftësitë e tij të vazhdueshme të shënimit të golave, Goal.com shkruajti për Militon në vitin 2010: "Profesioni i tij është futbolli dhe specialiteti i tij janë golat. Ai është një nga sulmuesit më mbresëlënës në botën e futbollit sot. Ai nuk zotëron të njëjtat aftësi fizike si disa nga sulmuesit e tij të tjerë, por ai nuk ka nevojë për to - ai shënon gola me lehtësi dhe gjithmon është paraqitur në skuadrat më të mira. Milito është një numër 9 i pastër dhe vdekjeprurës në zonën e penalltisë." Pas arritjes së Tripletës në përfundim të sezonit 2009–10, shumë specialistë vunë re faktin se Milito kishte qënë përherë një sulmues efektive, por vazhdonte të ishte një nga lojtarët më të nënvlerësuar në botën e futbollit për shkak se sjelljes së tij dhe faktit se ai kishte zgjedhur ekipe më të vogla dhe më pak garuese para se t'i bashkohej Interit. Shënimi i golave në skenën e madhe për një ekip të madh më në fund i dha lojtarit njohjen që meritonte falë aftësive dhe rekordit të golave. Rreth tij dhe dy golave që shënoi në finalen e Ligës së Kampioneve, The Guardian shkruajti:

Vizion, kordinim, teknik të përsosur dhe gjakftohtësi – këto gola kishin gjithçka që një sulmuesi të madh i duhen, plus një sens lyristik në rrjedhshmërinë e lëvizjes së tij. 30 vjeçari Milito vështirë se është një sulmues i zbukuruar, nuk është një Messi që të merr frymën me ndonjë trik ose një Tevez që elektrizon stadiumin me forcën e tij elementare, por ekonomia e tij ka qënë po aq shkatërruese...

Pavarësisht aftësive si futbollist, karriera e Militos është penalizuar në disa raste nga dëmtime të rënda që kanë ndikuar në rendimentin dhe formën e tij.

 

Milito ka rrënjë italiane. Familja e tij ka emigruar në Argjentinë në vitet 1950' nga Terranova da Sibari e Kalabrisë. Ai është i martuar me Sofian dhe ka tre fëmijë: Leandro (lindur në tetor 2007), Agustina (lindur më 21 mars 2010) dhe Morena (lindur më 21 maj 2016). Vajza e tij lindi në ditën ku Milito luajti ndeshjen e tij të fundit si futbollist. Djali i tij Leandro është aktualisht pjesë e akademisë së të rinjëve të Racing Club.

Ai është vëllai i madh i Natali dhe Gabriel Militos, i cili është një ish futbollistit profesionist që ka luajtur si mbrojtës. Diego dhe Gabriel kanë që shokë skuadre te Real Zaragoza në periudhën 2005–2007 dhe Argjentina. Ata gjithashtu kanë qënë kundërshtar në disa raste, veçanërisht në kohën kur Gabriel luante me Barcelonën. Ata ishin në formacionet titullar të ekipeve të tyre (Inter & Barcelona) në ndeshjen e kthimit të gjysëm-finales së Ligës së Kampioneve në prill 2010.

Klube

Burimi:

Kombëtarja

Burimi:

Golat me kombëtaren

Rezultatet e Argjentinës të listuara të parat, kolonat e golave tregojnë rezultatin pas çdo goli të shënuar nga Milito.

Golat me kombëtaren sipas datës, vendit, ndeshjes, kundërshtarit, rezultatit dhe kompeticionit

Nr.	Data	Vendi	Ndsh	Kundërshtari	Goli	Rezultati	Kompeticioni
1	31 janar 2003	Estadio Olímpico Metropolitano, San Pedro Sula, Honduras	1	Hondurasi	1–0	3–1	Ndeshje miqësore
2	16 korrik 2003	Estadio Ciudad de La Plata, La Plata, Argjentinë	4	Uruguaji	1–0	2–2
3					2–0
4	2 korrik 2007	Estadio José Pachencho Romero, Maracaibo, Venezuelë	12	Kolumbia	4–2	4–2	Copa América 2007

Klube

Racing Club

• Primera División Argjentinase: Apertura 2001, Transición 2014

Internazionale

• Serie A: 2009–10
• Coppa Italia: 2009–10, 2010–11
• Supercoppa Italiana: 2010
• UEFA Liga e Kampioneve: 2010
• FIFA Kupa e Botës për Klube: 2010

Kombëtarja

Argjentina

• Copa América: finalist 2007

Personale

• Guerin d'Oro: 2008–09
• Oscar AIC Golashënuesi i Vitit i Serie A: 2009
• Oscar AIC Lojtari më i dashur i Serie A: 2009
• Finalja e UEFA Ligës së Kampioneve 2010: UEFA Lojtari i ndeshjes
• Sulmuesi i Vitit i UEFA-s: 2009–10
• Futbollisti i Vitit i UEFA-s: 2009–10
• Futbollisti i Vitit i Serie A: 2009–10
• Futbollisti i huaj i vitit i Serie A: 2009–10
• FIFA FIFPro World XI: I nominuar 2009, 2010

• Profili te uebfaqja zyrtare e Interit
• Profili te Football Database
• Diego Milito – Rekordi në kompeticionet e FIFA-s
• Diego Milito – Rekordi në kompeticionet e UEFA-s
• Profili dhe statistikat te ESPN FC