Turkki: Jiečânâs staatâ Euroopist já Aasiast

Ton uáivikaavpug lii Ankara.

Tuurki täsiväldi Türkiye Cumhuriyeti (tuurkikielân)
lippu	vaakun
Staatâhäämi	täsiväldi
President	Recep Tayyip Erdoğan
Uáivikaavpug	Ankara
Eres kaavpugeh	Istanbul, İzmir, Bursa, Antalya, Konya, Adana, Gaziantep, Diyarbakır, Mersin, Kayseri, Eskisehir, Şanlıurfa, Denizli, Samsun
Vijđodâh	783 356 km²
– sisčääci	2,03 %
Ässeeloho (2019)	83 154 997
– ässeesaahâdvuotâ	105 ässed/km²
Virgáliih kielah	tuurkikielâ
Vaaluut	Tuurki liira (TRY)
Äigi	UTC+3
Uánádâs	TR
– fiävruin	TR
– kirdemmašinijn	TK
Jotolâh	uálgispiälásâš
Sundenummeer	+90
Internet TLD	.tr
Aalmuglâšlaavlâ	İstiklâl Marşı

Turkki seervâi Tave-Atlant piäluštemliiton ive 1952.

Sajadâh já rääjih

Turkki lii Aasia viestârumos riijkâ, já tot olá ucánjáhháá meiddei Euroop pel. Tuurki taavaabeln lii Čapismeerâ já máddáábeln Koskâmeerâ. Tuurki ránnjástaatah láá Bulgaria já Georgia tavveen, Kreikka viestârist, Syyria já Irak mäddin sehe Armenia, Azerbaidžan já Iran nuorttân. Kuhemus rääji lii rääji Syyriain, mii lii 899 km kukke. Uánihumos rääji vist lii 17 km rääji Azerbaidžanáin. Merâriddo lii ohtsis suulân 7 200 km kukke.

Ránnjástaatâ	Rääji kukkodâh	Kárttá
Armenia	311 km
Azerbaidžan	17 km
Bulgaria	223 km
Georgia	273 km
Irak	367 km
Iran	534 km
Kreikka	192 km
Syyria	899 km

Morfologia

Tuurki alemus vääri lii Ararat, mii paijaan 5 165 meetter alodâhân.

Turkki kaavpâš eromâšávt Euroop unionáin mut meiddei Ovtâstum statâiguin, Ruoššáin, Japanáin já Kiinain. Tuurki teháliih tuálvumpyevtittâsah láá eennâmtuálupyevtittâsah, tekstiileh já tubbáák. Tuurki čuolmân lii eennâm kievhivuotâ, mii uáinoo stuorrâ pargottesvuottân. Miljovneh turkkiliih láá karttâm vyelgiđ siirdâpargen Saaksan já eres kuávloid Euroopân.

Iäláttâsah

Anatolia pajoseh lii kärjituálukuávlu. Ton narces aroin kuáđuttuvvojeh saavzah, kaaicah já čäcipuhveleh. Tain finnee mielhi, piärgu já ulloid. Angorasaavzâst peskidum timmâ mohairullo lii maailmpegâlmâs turkkilâš pyevtittâs. Tobdosumos turkkilâs purrâmâš lii saavzâpiärgust rahtum kebab.

Kuálmádâs Tuurki aalmugist eelih táálunkuávlu uccâ sijdijn uáli oovtkiärdánávt. Enâmist láá meiddei stuorrâtááluh, main viljâluvvojeh eromâšávt valjeh tegu riisi, niisu, ohra, ruuvâš já maissâ. Toi lasseen Tuurkist viljâluvvojeh meiddei potákkeh, sukkârruottâseh, pumbul já tubbáák. Čapismeerâ já Koskâmeerâ kezis riddostielâsijn šoddâduvvojeh maaŋgâlágáneh heđâlmeh, hasselpähkineh já teejâ. Tobbeen láá meiddei motomeh viiniviljelmeh.

Tuuriism

Turkki lii pivnohis mađhâšemeennâm, já tobbeen tuuriism lii šoddâm jotelávt 1990-lovo loopâ rääjist. Turisteh mađhâšeh eromâšávt Istanbulân já Koskâmeerâ rido luámučuosâttuvváid tegu İzmirân. Ive 2022 Tuurkist ellii 44,6 miljovn olgoeennâmlâš turistid, kiäh kuođđii enâmân 46 miljard dollarid. Turisteh puátih eromâšávt Saksaast já Ruošâst.

Kaavpugeh

Tuurki uáivikaavpug lii Ankara, mii lii Anatolia pajosijn. Stuárráámus kaavpug vuod lii Istanbul. Tot lii Aasia já Euroop rääji alne Bospornyere kuábbáá-uv peln.

•   Wiki Commonsist láá koveh teikkâ eres tiätuvuárháh fáádást Turkki.