Neeti

Tot tiättoo masa ubâ Euroopist sehe uásild Aldanuorttân, Kaukasusist já Siberia viestâroosijn. Neeti iälá maaŋgâlágánijn meecijn. Neeti lii miäcástum vuohâdis tälvituurhâ tiet. 1900-lovvoost neeđijd šoddâdii čevđikaardijn.

Neeti 'Martes martes (Linnaeus, 1758)
Tile	LC (eellimvuáimálâš)
Tile Suomâst	LC (eellimvuáimálâš)
Tieđâlâš luokittâllâm
Doomeen	Sellâvááimusliih Eucarya
Kodde	Elleekodde Animalia
Uáiviráiđu	Savosuonâsiih Chordata
Vyeliráiđu	Čielgitávtáliih Vertebrata
Luokka	Njomâtteijeeh Mammalia
Lahko	Piätuelleeh Carnivora
Hiäimu	Netielleeh Mustelidae
Vyelihiäimu	Mustelinae
Suuhâ	Neđeh Martes
Šlaajâ	Martes

Neeti lii koskâstuárusâš piärguporree, já tot lii suulân kisá stuárusâš. Rummâš kukkodâh lii 45–48 cm, já seeibi kukkodâh lii 16–28 cm. Neeti tiäddá suulân 500–1 800 g. Oráseh láá 12–30 % lussâduboh ko niŋálâsah.

Neđe soksâmeh láá ruškâdeh, já tälviv toh láá vuohâdeh já timáseh. Keessiv turkkâ lii uánihâš já ruávis. Tälviturkkâ šadda čohčâmáánust, já nuorâ ohtâgâsah finnejeh rävis soksâmijd vuosmuu täälvi ääigi. Čudduu kuávlu lii ooraans, čuávji lii häälleh, já kepilijn lii tevkkâdub ivne. Seibi lii kukke já vuohâd, já peeljih láá stuárráh já kulmâhâšhámásiih. Neeti iälá táválávt 8–10 ihheed.

 

Neeti tiättoo masa ubâ Euroopist, Anatoliast, Irak já Iran taveoosijn, Kaukasusist já Siberia viestâroosijn. Euroopist tot ij tiettuu stuorrâ uásist Iberia njargâenâmist já Kreikkaast sehe motomijn oosijn Belgiast já Vuáládâhenâmijn. Suomâst neeti iälá masa ubâ enâmist, mutâ ij aaibâs tavemuu Säämist.

Neeti iälá sehe lostâ-, siähálâs- ete kuácceevuovdijn.

Neeti pivdá táválávt tuše iho. Peiviv tot piso sajestis já vuoiŋâst ovdâmerkkân källeevuágust, juovâst, vuovdân muorâst, kozzâlode piervâlist já távjá uárree tâi lädikuávská piervâlist, mii lii táválávt kuosâst. Neeti molso vuoiŋâstemsaje távjá. Nievris šooŋâst tot sáttá pisottâllâđ sajestis motomijd peeivijd. Tállân stoormâ maŋa neeti vuálgá vajâldiđ. Netiniŋálâs čivgá njuhčâ-vyesimáánust 2–5 čiivgâ. Piäju lii távjá vuovdân muorâst teikkâ juovâst.

Raavâd

Neeti lii puohporree, mutâ tot pivnohist piärgupurrâmuš jis tot lii fáállun, eromâšávt uccâ njomâtteijeid. Tot totká iho puoh vuáguid usâdijnis purrâmâššân muoldâgijd, jursseid, luudijd, cuobbuid sehe tiivrijd. Meid luudij maneh, myerjih, heđâlmeh já mietâ kuleh ton purrâmâšliiston. Motomin neeti kuállee meid ovdâmerkkân sorvâellei rááđuin. Eeđeest neeti porá meid kuobbârijd.