بقراط

بقراط 460 قبل مسیح اچ یونان دے شہر کوس وچ پیدا تھیا۔ بقراط دے والد دا ناں رافیس ہئی۔ بقراط دا استاد اسقلینوس ثانی ہئی۔ بقراط نے علم حاصل کرݨ وچ 16 سال صرف کیتے تے باقی عمر تحریر و تصنیف وچ گزاری۔ بقراط دا شمار وی یونان دے مشہور و معروف وچ حکماء وچ تھیندے۔ طب دی باقاعدہ ترویح دا سہرا بقراط دے سر ہے۔ اڄ وی ہزاراں سال گذرݨ دے باوجود بقراط دا ناں بطور محاورہ استعمال تھیندے۔ بقراط کوں ذہانت تے عقل و دانش وچ سبھے حکماء افضل منیندن۔ بقراط نے طبابت وچ بہت کم کیتا تے ناں پیدا کیتا۔ بیماری وچ تعویذ گنڈے دے علاج دی بجائے سائنسی علاج دی بنیاد سٹی تے اینہی وجہ توں بقراط کوں بابائے طب دا درجہ وی ݙتا ویندے، بقراط دی ابتدا کردہ اساساں تے بعد وچ جالینوس تے ابن سینا جیہے عالماں دے کاوشاں نال طب یونانی دی بنیاد قائم تھئی۔ 70 سال دی عمر وچ یونان دے شہر لاریزا وچ وفات پتی۔ بقراط دی بہت ساری کتب دا ترجمہ تھی چکا ہے۔

"'بقراط دے چند حکیمانہ اقوال ملاحظہ تھیون

1. اپݨے دوستاں توں اوں قدر اخلاص روا رکھو کہ تھوڑی جیہی تبدیلی دوستی ختم نہ کر سٹے۔
2. اگر تساں خواتین دے مشوریاں دے محتاج نہ بݨسو تاں پوری زندگی مصائب توں بچے رہسو۔
3. جیہڑا شخص حسد کوں قائم رکھے اوندا نفس قائم نی رہ سڳدا تے اوندی حاسدانہ روش اونکوں قبل از وقت موت دے منہ اچ پہنچا ݙیندی ہے۔
4. عقلمند اوہ ہے جیہڑا میانہ روی کوں اپݨی زندگی دا شعار بݨائے رکھے۔
5. سنجیدگی کوں برقرار رکھو، گھٹ ڳالھ کرو تے اپݨی ڳالھ کوں بُرے لوگاں توں بچائی رکھو۔
6. اگر کوئی تہاݙے بد افعال دی نشان دہی کرے تاں اونکوں بُرا مت آکھو بلکہ اوں بُرے عمل کوں ترک کر ݙیو۔
7. تہاکوں چاہیدا اے کہ لوگاں دے عیوب دے متلاشی نہ رہو، کیونکہ تہاݙے عیب وی کوئی تلاش کر سڳدے۔
8. جیہڑے لوگ حکام بالا دے نال تعلق رکھدن انہاں کوں ذلت و اہانت وی برداشت کرݨی پوندی ہے۔
9. ایں دنیا کوں مہمان خانہ سمجھو تے موت کوں میزبان۔
10. اگر تہاکوں ٻہوں دولت مل ونڄے تاں رب دا شکر کرو تے چھکیج ونڄے تاں ناشکری نہ کرو۔
11. مخلوق دے فیصلیاں وچ انصاف برقرار رکھو۔
12. جیہڑا تہاکوں مندے کڈھے تساں اونکوں مندے نہ کڈھو، بلکہ حسن اخلاق نال اوندی اصلاح کرو۔
13. جیہڑا شخص اپݨے عیوب توں آگاہی حاصل نی کریندا اوندے تے کہیں دی نصیحت دا اثر نی تھی سڳدا۔
14. تحمل مزاجی قائدین تے نیک لوگاں دی اولین نشانی ہے۔
15. عبرت حاصل کرݨ دے شوقین کیتے ہر نویں چیز وچ عبرت پنہاں ہے۔
16. تہاکوں ہر اوں ڳالھ دا علم ہووݨا چاہیدا اے جیندے بغیر تساں کݙہیں وی شرمندگی نال دوچار تھی سڳدے ہو۔