Iḍ Innayr

Ɣ 2018, tga d tfugla ad tamaddudt g Dzayr.

Ɣ 3 May 2023. issuded ugllid Muḥmmad Wiss Ṣḍiṣ tafugla ad, tg d ilmma yat zɣ tfugliwin timaddudin ɣ Lmɣrib.

Dar iclḥiyn

Ass nna igan Iḍ innayr, iggru ɣ dujambir. Da ttidunt tmɣarin, ẓdnt ibawn. Ddun ijijan s igran, awin d gisn tammayt d zzitun d uḍaṛ n utbir t tmẓẓuɣt n tili d lfṣṣa d txsayt d uqurr. Awin tammayt d zzit, gnt i lɛtbat n tgmmi. Asin aqurr d lfssa d xizzu d uḍaṛ n utbir d tmẓẓuɣt n tili, fkn tn i tmɣarin.

Asint tmɣarin ɣayann kullu, zaydnt gis yan waqqa, gnt nn ɣayann ɣ tgdurt, ntta d ibawn. Gnt fllas aman ẓidrnn, ar inggʷa. Ar tassaɛt nna inwa, asin t daɣ tifiyya d zgzaw mis, gn t stt inn ɣ tgdurt ula nttat.

Tassaɛt nna iraḥ imnsi, asin t d talxca, ar tt cttan kullu ayt tgmmi. Wanna gitsn yufan aqurr ɣ tlxca, nnan as : « Iqqur uxsas nnk ! » Wa nna yufan aqqa, nnan as : « Iḥla yak ssɛd nnk ! »

Tassaɛt nna ccan, asin yat tmṭṭust n uɣrum. Mmun tt inn ɣ tlxca, gn tt inn dar tḍart n tflut, ad gis tns.

Asin daɣ tagdurt ann n uṣgaḍ. Ccn t, ssarn ɣayann ɣ udis nns, gʷn, rɣn. Zikk, iɣ d nkrn, qllbn tamṭṭust, da gan ɣ dar tḍart n tflut. Nnan, iɣ nn gis ufan kra n ccɛr n wulli, nnan ak : « Ran t ad darsn zaydnt wulli ɣ usggʷas ann. » Iɣ mi gis ufan inẓḍ n imugayn, nnan : « Ran t ad darsn zaydnt lbhaym. » Iɣ nn gis ufan inẓḍ n uɣyul, nɣ asrdun, nnan : « Ran ad darsn zaydn ɣ usggʷas ann. » Iɣ nn gis ufan kra n ccɛr izggʷaɣn nɣ izgzaw, nɣ awraɣ, nnan : « Ira ad darnɣ izayd kra n lfrac asggʷas ad. » Iɣ nn gis ufan kra n tsttixt, nnan : « Ira a immt kra gisn ɣ usggʷas ann. »

Ilin daɣ wida iskrn lqaɛida yaḍnin. Da ttasin ibawn d yirdn d tmzin d umṣri d ikikr d tniltit. Ssarn tn, ar tn cttan ɣ yiḍ n nnayr. Rɣn s lktrt n ɣayann ssan. Nnan : « Ha nn asggʷas ibddl, irɣa lḥal, tkka d trɣi akal. » Illa gis lbɛḍ n isggʷasn, dda d nkkrn, afn d tilist, tqqn asn imi n tgmmaw.