Etna:Na spittaculari erruzzioni accuminciau dû tardu pumiriggiu di oggi ntâ l'Etna: ntô ciancu urientali dû crateri di sud-est ci sunnu funtani di lava àuti cintinara di metri. Ntô vurcanu si furmau na nùvula di cìnniri longa quarchi dui chilòmitri, ca lu ventu manna agghiri Furnazzu e Milu. Pri pricauzzioni, a partiri di l'una di stanotti, si dicisi di chiùdiri pâ cìnniri l'airoportu di Catania.
Etna:Di stamatina terminau l’erruzzioni di l’Etna, ca durau accussì menu di gn’ jornu. Nzèmula a l’erruzzioni, spirdenu macari li trimori nterni dû vurcanu e la nisciuta dê nùvula di cìnniri. Picciò pari ca ss’eruzzioni si cuncrudiu, ma, dìciunu li vurcanòlughi, ca cci po’ èssiri la pussibilità di àutri erruzzioni.
Catania: Dû 20 ô 24 di sittèmmiru ê Ciminèri si svolgi lu Festival dû folclori sicilianu. Duminicadìa è puru privista na missa 'n sicilianu, lingua già usata nti diversi banni dâ Sicilia nti certi rituali tradizziunali comu la ricostruzzioni di via crucis o li prisepi viventi.
Myanmar - A sta jurnata, a Yangon, mìnimu quattru pirsuni (tri di chisti èrunu mònichi buddisti) foru ammazzati dê forzi di l’òrdini e n’ àutru cintinaru arristau firutu (na cinquantina di st’àutri sunu, macari iddi, mònichi); chissu pi riprìmiri li manifistazzioni di prutesta, ca s’hannu vistu nta st’ùrtimi jorna nta ssu paisi, contra a la giunta militari. - Lu Cunsigghiu di Sicurizza di l'Onu, oggi fà na riunioni ê tri di pumiriggiu (urariu di Nova York) pi cunzultazzioni urgenti sùpira l’ex Birmania.
Myanmar - Oggi ntô Myanmar nn'hann'ammazzatu n'àutri novi (ottu manifistanti e nu giurnalista giappunisi) e cu oggi sunu agghicati a 15 li morti (e cintinara d'arresti) pi manu dê militari, ca vòlunu accussì riprìmiri li manifistazziuni pacìfichi pupulari. - Â Mèrica ci manna a diri a ssa giunta militari di frimmari sùbbutu la viulenza cuntru a li manifistanti, ma la riazzioni dâ Mèrica e dû munnu uccidintali pari tanticchia dèbbuli pi chiddu ca sta succidennu, e ca ancora nun sapemu comu finisci, nta ssa parti dû munnu (tantu, a cu cci ntiressa ? ddocu pitroliu nun ci nn'è.)
This article uses material from the Wikipedia Sicilianu article Sittèmmiru 2007, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Stu cuntinutu è dispunìbbili sutta â CC BY-SA 4.0 quannu nun veni spicificatu diversamenti. Images, videos and audio are available under their respective licenses. ®Wikipedia is a registered trademark of the Wiki Foundation, Inc. Wiki Sicilianu (DUHOCTRUNGQUOC.VN) is an independent company and has no affiliation with Wiki Foundation.