Asessualidade

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

S'asessualidade, a bortas narada no-sessualidade, in su sensu suo prus ampru, est sa farta de atraida sessuale cara a àteros èsseres o sa farta de interèssiu pro su sessu. Puru si podet cunsiderare comente una farta de orientamentu sessuale. Un'istùdiu comunemente tzitadu, publicadu in su 2004, carculaiat s'esistèntzia de asessualidade in unu 1% de sa populatzione. S'asessualidade est diferente de s'astinèntzia e de sa castidade, chi sunt temas de conduta e in generale motivados dae fatores comente is creèntzias personales o religiosas de un'indivìduu; s'orientamentu sessuale, a diferèntzia de su cumportamentu sessuale, est cunsideradu cundizione a dura. Calincuna persone asessuale tenet difatis atividade sessuale; mancari non tèngiat disìgiu de sessu nen atraida sessuale, pro more de resones diversas, comente pro esempru pro su disìgiu o s'abbisòngiu de acuntentare sa pariga sua, o pro su disìgiu de tènnere fìgios.

Isceti pagu tempus a imoe s'asessualidade at comintzadu a èssere atzetada in calidade de orientamentu sessuale ulteriore, e che a unu campu de chirca sientìfica, e s'est comintzadu a creare unu corpus creschende de chirca de prospetivas tantis sotziològicas comente psicològicas. Mentras chi carchi chircadore afirmat chi s'asessualidade est un'orientamentu sessuale, àteros sunt in disacòrdiu. In is ùrtimos tempos si sunt comintzados a formare comunidades vàrias de asessuales, gràtzias a sa cumparitzione de Internet e de is retzas sotziales. Sa prus connota de custas comunidades est istada sa giamada Asexual Visibility and Education Network (AVEN), fundada in su 2001.