ᱫᱟᱨᱮ ᱫᱚ ᱢᱮᱱ ᱞᱮᱠᱷᱟᱱ ᱵᱩᱫᱟᱹ, ᱯᱩᱨᱩ ᱦᱚᱸ ᱢᱤᱢᱤᱫᱴᱟᱹᱝ ᱫᱟᱨᱮ ᱜᱮ ᱾ ᱟᱫᱚ ᱵᱟᱹᱲᱛᱤ ᱞᱮᱠᱟ ᱛᱮᱫᱚ ᱫᱟᱨᱮ ᱢᱮᱱ ᱞᱮᱠᱷᱟᱱ ᱢᱟᱨᱟᱝ ᱢᱟᱨᱟᱝ ᱫᱟᱨᱮ ᱜᱮ ᱵᱩᱡᱷᱟᱹᱣᱜᱼᱟ ᱾ ᱫᱟᱨᱮ ᱫᱚ ᱚᱱᱟ, ᱡᱟᱦᱟᱸ ᱠᱷᱚᱱ ᱫᱚ ᱰᱟᱹᱨ ᱪᱟᱸᱜᱽᱲᱟ ᱚᱰᱚᱠ ᱠᱚᱜᱼᱟ, ᱠᱟᱹᱡ ᱠᱷᱚᱱ ᱠᱟᱹᱡ ᱵᱟᱨ ᱥᱮᱨᱢᱟ ᱫᱷᱟᱹᱵᱤᱡ ᱡᱤᱣᱤᱫ ᱛᱟᱦᱮᱸᱱᱟ, ᱟᱨ ᱡᱟᱦᱟᱸ ᱠᱷᱚᱱ ᱠᱟᱴ ᱧᱟᱢᱚᱜᱼᱟ ᱾
ᱫᱟᱨᱮ ᱨᱮᱭᱟᱜ ᱢᱤᱫ ᱨᱮᱦᱮᱫ, ᱡᱟᱦᱟᱸ ᱫᱚ ᱚᱛ ᱵᱷᱤᱛᱨᱤ ᱨᱮ ᱛᱟᱦᱮᱸᱱᱟ ᱾ ᱚᱛ ᱵᱷᱤᱛᱨᱤ ᱨᱮᱜᱮ ᱚᱱᱟ ᱫᱚ ᱜᱚᱴᱟ ᱯᱟᱲᱟ ᱟᱹᱛᱤᱧ ᱟᱛᱮ ᱯᱟᱥᱱᱟᱣ ᱠᱚᱜᱼᱟ ᱾ ᱟᱨ ᱚᱛ ᱠᱷᱚᱱ ᱪᱮᱛᱟᱱ ᱨᱮᱫᱚ ᱰᱟᱹᱨ ᱟᱨ ᱥᱟᱠᱟᱢ ᱛᱟᱦᱮᱸᱱᱟ, ᱡᱟᱦᱟᱸ ᱫᱚ ᱦᱚᱭ ᱨᱮ ᱛᱟᱦᱮᱸᱱᱟ ᱾ ᱡᱟᱦᱟᱸ ᱫᱚ ᱵᱟᱹᱲᱤᱡ ᱦᱚᱭ ᱦᱤᱥᱤᱫ ᱥᱟᱯᱷᱟᱭ ᱞᱟᱹᱜᱤᱫ ᱠᱟᱹᱢᱤ ᱨᱮ ᱛᱟᱦᱮᱸᱱᱟ ᱾ ᱤᱠᱷᱟᱹᱱ ᱠᱟᱴ ᱟᱨᱵᱟᱝ ᱚᱛ ᱦᱟᱥᱟ ᱨᱮᱭᱟᱜ ᱞᱟᱹᱠᱛᱤ ᱠᱷᱟᱹᱛᱤᱨ ᱜᱮ ᱦᱚᱲ ᱱᱚᱣᱟ ᱫᱚᱠᱚ ᱢᱟᱜ ᱪᱟᱵᱟᱭᱮᱜᱼᱟ ᱾
ᱥᱤᱨᱡᱚᱱ ᱨᱮᱭᱟᱜ ᱢᱤᱫ ᱟᱹᱰᱤ ᱜᱮ ᱫᱟᱢᱟᱱ ᱥᱤᱨᱯᱷᱟᱹ ᱠᱟᱱᱟ ᱫᱟᱨᱮ, ᱱᱟᱹᱬᱤ ᱫᱚ ᱟᱵᱚ ᱠᱚ ᱞᱟᱹᱜᱤᱫ ᱾ ᱱᱚᱣᱟ ᱫᱚ ᱟᱵᱚ ᱡᱚ, ᱵᱟᱦᱟ, ᱥᱟᱠᱟᱢ, ᱠᱟᱴ, ᱢᱟᱫ, ᱥᱟᱦᱟᱱ, ᱨᱟᱱ ᱥᱟᱶᱛᱮ ᱟᱹᱰᱤ ᱞᱮᱠᱟᱱ ᱡᱤᱱᱤᱥ ᱮ ᱮᱢᱟ ᱵᱚ ᱠᱟᱱᱟ ᱾ ᱫᱟᱨᱮ ᱱᱟᱹᱬᱤ ᱵᱮᱜᱚᱨ ᱢᱟᱱᱣᱟ, ᱡᱟᱱᱣᱟ ᱡᱤᱵᱚᱱ ᱫᱚ ᱚᱦᱚᱣᱟᱱ ᱜᱮᱭᱟ ᱾ ᱫᱟᱨᱮ, ᱱᱟᱹᱬᱤ ᱠᱷᱟᱹᱛᱤᱨ ᱜᱮ ᱪᱮᱦᱮᱧ ᱱᱚᱶᱟ ᱥᱚᱝᱥᱟᱨ ᱨᱮ ᱦᱟᱹᱨᱭᱟᱹᱲ ᱢᱮᱱᱟᱜᱼᱟ ᱾ ᱟᱨ ᱱᱚᱣᱟ ᱠᱷᱟᱹᱛᱤᱨ ᱜᱮ ᱟᱵᱚ ᱦᱚᱸ ᱡᱤᱣᱤᱜ ᱵᱚᱱ ᱛᱟᱦᱮᱸᱱ ᱠᱟᱱᱟ ᱾ ᱢᱟᱹᱱᱢᱤ ᱡᱤᱭᱚᱱ ᱥᱟᱶ ᱥᱟᱶᱛᱮ ᱡᱟᱱᱣᱟ, ᱪᱮᱬᱮ ᱪᱤᱯᱨᱩᱜ, ᱱᱩᱠᱩᱣᱟᱜ ᱡᱤᱭᱚᱱ ᱦᱚᱸ ᱫᱟᱨᱮ ᱱᱟᱹᱬᱤ ᱪᱮᱛᱟᱱ ᱨᱮᱜᱮ ᱞᱟᱫᱮ ᱛᱟᱦᱮᱸᱱ ᱠᱟᱱᱟ ᱾ ᱡᱟᱱᱣᱟ ᱛᱟᱥᱟᱫ ᱟᱨ ᱫᱟᱨᱮ ᱨᱮᱭᱟᱜ ᱥᱟᱠᱟᱢ ᱡᱚᱢ ᱠᱟᱛᱮ ᱜᱮ ᱡᱤᱭᱚᱱ ᱠᱚ ᱠᱷᱮᱢᱟᱣᱮᱜᱼᱟ ᱾ ᱢᱟᱹᱱᱢᱤ ᱞᱟᱹᱜᱤᱫ ᱡᱚᱢᱟᱜ ᱦᱚᱸ ᱱᱚᱣᱟ ᱠᱷᱚᱱ ᱜᱮ ᱡᱚᱜᱟᱲ ᱦᱩᱭᱩᱜ ᱠᱟᱱᱟ ᱾ ᱟᱨ ᱡᱚᱢᱟᱜ ᱵᱟᱝᱠᱷᱟᱱ ᱟᱵᱚᱣᱟᱜ ᱡᱤᱭᱚᱱ ᱦᱚᱸ ᱚᱦᱚᱣᱟᱱ ᱜᱮᱭᱟ ᱾
ᱢᱮᱱᱮᱛ ᱫᱚ ᱱᱚᱣᱟ ᱠᱟᱱᱟ, ᱫᱟᱨᱮ, ᱱᱟᱹᱬᱤ ᱵᱮᱜᱚᱨ ᱟᱵᱚᱣᱟᱜ ᱡᱤᱭᱚᱱ ᱚᱦᱚᱣᱟᱱ ᱜᱮᱭᱟ ᱾ ᱫᱟᱨᱮ ᱜᱮ ᱟᱵᱚ ᱫᱚ ᱡᱤᱣᱤᱡᱤ ᱦᱚᱭ ᱮ ᱮᱢᱟ ᱵᱚᱱ ᱠᱟᱱᱟ ᱡᱟᱦᱟᱸ ᱫᱚ ᱟᱵᱚᱣᱟᱜ ᱡᱤᱭᱚᱱ ᱡᱤᱣᱤᱫᱚᱜ ᱨᱮ ᱞᱟᱹᱠᱛᱤ ᱢᱮᱱᱟᱜᱼᱟ ᱾ ᱚᱱᱟ ᱥᱟᱶᱛᱮ ᱟᱸᱜᱽᱨᱟ ᱜᱮᱥ ᱦᱚᱸ ᱟᱡ ᱜᱮᱭ ᱟᱯᱱᱟᱨᱮᱜᱼᱟ ᱾ ᱟᱹᱰᱤ ᱦᱚᱲ ᱟᱠᱚᱣᱟᱜ ᱡᱤᱭᱚᱱ ᱠᱷᱮᱢᱟᱣ ᱞᱟᱹᱜᱤᱫ ᱛᱮ ᱠᱟᱹᱣᱰᱤ ᱨᱩᱯᱛᱮ ᱫᱟᱨᱮ ᱱᱟᱹᱬᱤ ᱪᱮᱛᱟᱱ ᱨᱮᱜᱮ ᱞᱟᱫᱮ ᱢᱮᱱᱟᱜ ᱠᱚᱣᱟ ᱾ ᱫᱟᱹᱭᱠᱟᱹ ᱞᱮᱠᱟᱛᱮ ᱡᱩᱫᱤ ᱵᱚᱱ ᱧᱮᱞᱟ : ᱠᱟᱜᱚᱡᱽ, ᱫᱮᱭᱟᱥᱤᱞ ᱨᱮᱭᱟᱜ ᱵᱮᱱᱟᱣ ᱦᱚᱸ ᱫᱟᱨᱮ, ᱵᱩᱫᱟᱹ ᱪᱮᱛᱟᱱ ᱨᱮᱜᱮ ᱪᱟᱞᱟᱜ ᱠᱟᱱᱟ ᱾ ᱫᱟᱨᱮ, ᱱᱟᱹᱬᱤ ᱛᱮᱜᱮ ᱟᱵᱚ ᱵᱟᱹᱲᱤᱡ ᱥᱟᱰᱮ, ᱵᱟᱹᱲᱤᱡ ᱦᱚᱭ ᱦᱤᱥᱤᱫ ᱵᱚᱱ ᱟᱠᱚᱴ ᱫᱟᱨᱟᱢ ᱫᱟᱲᱮᱭᱟᱜᱼᱟ ᱾ ᱚᱱᱟ ᱥᱟᱶᱛᱮ ᱫᱟᱨᱮ ᱱᱟᱹᱬᱤ ᱦᱚᱛᱮᱛᱮ ᱜᱮ ᱫᱟᱜ ᱡᱟᱹᱲᱤ ᱦᱚᱸ ᱦᱩᱭᱩᱜ ᱠᱟᱱᱟ ᱾ ᱫᱟᱨᱮ ᱱᱟᱹᱬᱤ ᱟᱵᱚ ᱴᱷᱮᱱ ᱠᱷᱚᱱ ᱫᱚ ᱪᱮᱫ ᱦᱚᱸ ᱵᱟᱝ ᱠᱷᱚᱡᱽ ᱠᱟᱛᱮ ᱥᱮᱨᱢᱟ ᱥᱮᱨᱢᱟ ᱟᱵᱚᱣᱟᱜ ᱥᱮᱵᱟ ᱡᱚᱛᱚᱱ ᱨᱮᱭ ᱛᱟᱦᱮᱸᱱ ᱠᱟᱱᱟ ᱾ ᱱᱚᱣᱟ ᱫᱟᱨᱟᱭ ᱛᱮ ᱟᱵᱚ ᱴᱟᱴᱠᱟ ᱦᱟᱹᱡᱩᱜ ᱠᱟᱱ ᱵᱟᱱ ᱫᱟᱜ ᱠᱷᱚᱱ ᱵᱚᱱ ᱚᱣᱟᱨ ᱫᱩᱜ ᱫᱟᱲᱮᱭᱟᱜ ᱠᱟᱱᱟ ᱾ ᱵᱤᱨ ᱡᱟᱱᱣᱟ ᱠᱚ ᱞᱟᱹᱜᱤᱫ ᱦᱚᱸ ᱫᱟᱨᱮ ᱜᱟᱡᱟᱲ ᱫᱚ ᱟᱹᱰᱤ ᱜᱮ ᱞᱟᱹᱠᱛᱤ ᱢᱮᱱᱟᱜᱼᱟ ᱾ ᱵᱤᱨ ᱨᱮ ᱢᱮᱱᱟᱜ ᱠᱚ ᱡᱟᱱᱣᱟ ᱨᱟᱵᱟᱝ, ᱞᱚᱞᱚ, ᱡᱟᱹᱯᱩᱫ ᱠᱷᱚᱱ ᱫᱩᱜᱚᱜ ᱞᱟᱹᱜᱤᱫ ᱫᱟᱨᱮ ᱴᱷᱮᱱ ᱜᱮ ᱦᱤᱨᱞᱟᱹ ᱠᱚ ᱦᱟᱛᱟᱣᱟ ᱾
This article uses material from the Wikipedia ᱥᱟᱱᱛᱟᱲᱤ article ᱫᱟᱨᱮ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.