ᱥᱟᱱᱛᱟᱲ ᱵᱟᱯᱞᱟ

ᱵᱟᱯᱞᱟ ᱨᱮᱱᱟᱜ ᱞᱮᱠᱟᱱ

ᱵᱟᱯᱞᱟ ᱫᱚ ᱵᱟᱨ ᱞᱮᱠᱟᱱᱟ - ᱑ - ᱥᱟᱹᱜᱩᱱ ᱵᱟᱯᱞᱟ ᱾ ᱒ - ᱮᱨᱮᱲ ᱵᱟᱯᱞᱟ ᱾ ᱠᱩᱲᱤ ᱠᱚᱲᱟ ᱟᱭᱳ ᱵᱟᱵᱟ ᱢᱟᱺᱡᱷᱤ ᱢᱟᱸᱯᱟᱧᱡᱤ ᱠᱚᱣᱟᱜ ᱥᱩᱦᱤ ᱨᱮᱵᱮᱱ ᱛᱮ ᱡᱩᱨᱤᱜ ᱫᱚ ᱥᱟᱹᱜᱩᱱ ᱵᱟᱯᱞᱟ ᱵᱚ ᱢᱮᱛᱟᱜᱼᱟ ᱾ ᱟᱭᱳ ᱵᱟᱵᱟ ᱢᱟᱺᱡᱷᱤ ᱢᱟᱸᱯᱟᱧᱡᱤ ᱠᱚᱣᱟᱜ ᱵᱟᱝ ᱵᱟᱰᱟᱭ ᱨᱮ ᱠᱩᱲᱤ ᱠᱚᱲᱟ ᱥᱩᱢᱩᱝ ᱛᱮ ᱡᱩᱨᱤᱜ ᱫᱚ ᱮᱨᱮᱲ ᱵᱟᱯᱞᱟ ᱵᱚ ᱢᱮᱛᱟᱜᱼᱟ ᱾ ᱵᱟᱱᱟᱨ ᱞᱮᱠᱟᱱ ᱵᱟᱯᱞᱟ ᱜᱮ ᱥᱟᱶᱛᱟᱨᱮ ᱦᱟᱛᱟᱣᱜ ᱜᱮᱭᱟ ᱾ ᱱᱚᱶᱟ ᱠᱤᱱ ᱦᱚᱸ ᱦᱟᱹᱴᱤᱧ ᱟᱠᱟᱱᱟ ᱡᱟᱞᱮᱠ -

ᱥᱟᱹᱜᱩᱱ ᱵᱟᱯᱞᱟ ᱠᱚ

᱑ - ᱥᱟᱸᱜᱮ ᱵᱟᱹᱨᱭᱟᱹᱛ ᱾ ᱒ - ᱠᱩᱲᱤ ᱵᱟᱹᱨᱭᱟᱹᱛ/ᱫᱩᱣᱟᱹᱨ ᱵᱟᱯᱞᱟ ᱾ ᱓ - ᱴᱩᱝᱠᱤ ᱫᱤᱯᱤᱞ ᱾ ᱔ - ᱫᱩᱣᱟᱹᱨ ᱞᱮᱵᱮᱫ ᱾ ᱕ - ᱯᱟᱲᱟᱢ ᱵᱟᱹᱨᱭᱟᱹᱛ ᱾ ᱖ - ᱥᱟᱸᱜᱷᱟ ᱵᱟᱯᱞᱟ ᱾ ᱗ - ᱡᱚᱦᱟᱨ ᱢᱤᱫ ᱾ ᱘ - ᱦᱤᱨᱚᱢ/ᱪᱷᱩᱴᱠᱤ ᱡᱚᱝ ᱾

ᱮᱨᱮᱲ ᱵᱟᱯᱞᱟ

᱑ - ᱠᱩᱲᱤ ᱠᱚᱲᱟ ᱜᱚᱨᱚᱡᱽ ᱛᱮ ᱾ ᱒ - ᱚᱨ ᱤᱛᱩᱫ ᱾ ᱓ - ᱥᱤᱠᱤᱲ ᱵᱟᱯᱞᱟ ᱾

ᱥᱟᱸᱜᱮ ᱵᱟᱹᱨᱭᱟᱹᱛ

ᱥᱟᱸᱜᱮ ᱵᱟᱹᱨᱭᱟᱹᱛ ᱵᱟᱯᱞᱟ ᱨᱮᱫᱚ ᱮᱠᱷᱮᱱ ᱠᱚᱲᱟ ᱥᱩᱢᱩᱝ ᱜᱮ ᱵᱟᱹᱨᱭᱟᱹᱛᱚᱜ ᱠᱚ ᱪᱟᱞᱟᱜᱼᱟ ᱾ ᱡᱟᱶᱟᱭ ᱠᱚᱲᱟ ᱫᱚ ᱵᱟᱠᱚ ᱤᱫᱤ ᱭᱮᱭᱟ ᱾ ᱠᱩᱲᱤ ᱚᱲᱟᱜ ᱯᱟᱦᱴᱟ ᱨᱤᱱ ᱠᱩᱞᱦᱤ ᱢᱩᱪᱟᱹᱫ ᱨᱮ ᱵᱟᱹᱨᱭᱟᱹᱛ ᱠᱚᱲᱟᱠᱚ ᱟᱛᱟᱝ ᱫᱟᱨᱟᱢ ᱠᱚᱣᱟ ᱾ ᱫᱚᱠᱛᱟ ᱯᱩᱸᱜᱤ ᱮᱢ ᱠᱟᱛᱮ ᱠᱚ ᱵᱮᱵᱷᱟᱨ ᱠᱚᱣᱟ ᱾ ᱵᱟᱨᱮᱛ ᱠᱚᱲᱟ ᱠᱚ ᱥᱟᱶ ᱢᱟᱯᱟᱧᱡᱤᱠᱚ ᱥᱟᱶᱛᱮ ᱵᱟᱹᱨᱭᱟᱛ ᱠᱚ ᱫᱚᱝ, ᱢᱟᱰᱣᱟᱨ, ᱠᱩᱫᱩᱢ, ᱜᱟᱢ ᱮᱢᱟᱱ ᱥᱮᱨᱮᱧ ᱨᱚᱯᱚᱲ ᱪᱷᱩᱛᱤ ᱨᱚᱲ ᱞᱟᱸᱫᱽ ᱠᱟᱛᱮ ᱠᱩᱲᱤ ᱚᱲᱟᱜ ᱠᱩᱞᱦᱤ ᱢᱩᱪᱟᱹᱫ ᱠᱷᱚᱱ ᱠᱚ ᱫᱟᱨᱟᱢ ᱤᱫᱤ ᱠᱚᱣᱟ ᱾ ᱟᱹᱛᱩ ᱢᱟᱰᱮᱨ ᱨᱮ ᱱᱟᱥᱮ ᱠᱚ ᱰᱮᱨᱟ ᱧᱚᱜ ᱠᱚᱣᱟ ᱾ ᱚᱸᱰᱮ ᱥᱮᱨᱮᱧ ᱠᱩᱫᱩᱢ ᱵᱤᱱᱛᱤ ᱮᱢᱟᱱ ᱠᱟᱹᱢᱤ ᱦᱩᱭᱩᱜᱼᱟ ᱾ ᱵᱟᱹᱨᱭᱟᱹᱛ ᱯᱟᱦᱴᱟ ᱨᱮᱱᱟᱜ ᱫᱟᱠᱟ ᱩᱛᱩ ᱠᱚᱦᱚᱸ ᱥᱟᱯᱲᱟᱣ ᱛᱚᱸᱜᱮ ᱠᱚᱜᱼᱟ ᱾ ᱛᱷᱩᱛᱤ ᱵᱤᱱᱛᱤ ᱪᱟᱵᱟ ᱞᱮᱱ ᱠᱷᱟᱱ ᱫᱟᱠᱟ ᱩᱛᱩ ᱡᱚᱢ ᱠᱟᱛᱮ ᱠᱩᱲᱤ ᱚᱲᱟᱜ ᱠᱚ ᱟᱹᱭᱩᱨ ᱤᱫᱤ ᱠᱚᱣᱟ ᱾ ᱚᱲᱟᱜ ᱨᱟᱪᱟ ᱨᱮ ᱯᱟᱴᱭᱟ ᱟᱴᱮᱫ ᱠᱟᱛᱮ ᱠᱚ ᱫᱩᱲᱩᱵ ᱠᱚᱣᱟ ᱾ ᱚᱸᱰᱮ ᱜᱚᱱ ᱯᱚᱱ ᱠᱚ ᱞᱮᱠᱷᱟᱭᱟ ᱾ ᱚᱱᱟ ᱛᱟᱭᱚᱢ ᱵᱟᱹᱦᱩ/ᱦᱚᱯᱚᱱ ᱮᱨᱟ ᱠᱚ ᱵᱤᱫᱟᱹᱭ ᱟᱠᱚᱣᱟ ᱾ ᱤᱛᱩᱫ ᱥᱤᱸᱫᱩᱨ ᱫᱚ ᱫᱚ ᱠᱚᱲᱟ ᱚᱲᱟᱜ ᱨᱮ ᱦᱩᱭᱩᱜᱼᱟ ᱾

ᱥᱟᱹᱠᱷᱭᱟᱹᱛ

This article uses material from the Wikipedia ᱥᱟᱱᱛᱟᱲᱤ article ᱥᱟᱱᱛᱟᱲ ᱵᱟᱯᱞᱟ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ᱥᱟᱱᱛᱟᱲᱤ (DUHOCTRUNGQUOC.VN) is an independent company and has no affiliation with Wiki Foundation.