Саха Тылын Дьыл5Ата

      Олохпут сайдан иһэр. Ону кытта туттар тылбытыгар сана тыллар эбиллэ тураллар.       Олох сайдан илиинэн оттообот, сүөһү көрбөт, оһох оттубат буоллубут. Онон, өбүгэлэрбит туттубут тылларын умнан, сүтэрэн иһэбит. Холобур, кыдама, бурҕалдьы, оллоон диэн тыллары аныгы ыччаттан ыйыттахха сорохтор билбэттэрэ чахчы. Оттон аны 10-20 сылынан хайдах буолуой? Аҕа саастаах дьоммут онтон долгуйаллар. Биhиги ыччаттар онно кыһанабыт дуо? Үксүбүт аныгы тылы сахалыы тылбытыгар муора уутун курдук киллэрэ турабыт. Кэпсэтэр тылбыт аҥара нууччалыы, омуктуу буолан эрэр.    Куоракка, киин сирдэргэ сахалыы иитиини тутуһар дьон, саха оскуолаларын туруорсар төрөппүттэр бааллар эрээри, баһыйар өттүтэ оҕото ханнык тылынан саҥарарыгар болҕомтотун уурбат дии саныыбын. Мин санаабар, хас биирдии саха киһитэ оҕотун  кыра эрдэҕиттэн төрөөбүт тылынан саҥарда, кэпсэтэ сатыахтаах. Оччоҕо тылбыт-өспүт сүтүө суоҕа этэ. Бу туһунан толкуйдуохха. Эбэлэрбит, эһэлэрбит, өбугэбит тылын сүтэрбэккэ кэнчээри ыччаппытыгар тыыннаах тириэрдэри ытык иэспитинэн ааҕыахха.    Биһиги саха омуга диэн туспа култууралаах күүстээх омуктарбыт. Ырыабыт-тойукпут, таҥаспыт-саппыт, айылҕабыт аан дойду дьонун хараҕар олох атыннык, уратытык көстөр. Саамай улахан күүспүт-төрөөбүт тылбыт, ийэ тылбыт, сахалыы саҥабыт буолар! Ону сыаналыахха, ытыктыахха, толкуйдуохха!