Бере́гово, укр.
Варош Украины
|
Варош зоз сѣвера и сѣверовостока прикрытый грунами вулканичной природы, засадженыма винницями. Тоты груны суть выбѣжками Вигорлат-Гутинского пасма. Канал Верке, перетинаючый варош доставать воду з рѣкы Боржава коло ровноменного села. Берегово лежить на желѣзничной линии Чоп-Солотвино, и на асфалтцѣ Ужгород-Рахово. Од областного центра Ужгород оддаленый о 70 км., од пограничного перехода до Мадярщины о 6 км.
В року 1063 умер краль Бейла І. и лишив Бережску околицю свому найменшому сынови, Ламперту, котрый, подля легенды, заложив ту осаду Лампертгаза. Понеже Ламперт умер в року 1095, варощане поважують тот датум за рок основаня Берегова. На стѣнѣ римокатолицкого храма умѣщена памятна табла, зображуюча кральовича Ламперта, з надписом:
В року 1241 татаро-монголска орда знищила цѣлу околицю, и краль Бейла ІV. в року 1247 заселив Бережску околицю Сасами, нѣмецкыма колонистами, котры на мѣстѣ старой осады заложили колонию Берегсас. Краль основав жупу Берег з центром в Мункачу. Назва Берег походить од лѣсного масива Silvia Beregu, споминаного в Великоварадинском регеструмѣ. Од року 1247 захранила ся грамота, котров краль Бейла IV. даровав привилегии Берегсасу, а од року 1271 уже суть познаты имена жупанох. Зоз часом ся Сасы цѣлком помадярили.
Берегово много раз мѣняло свого властителя. Краль Лайош І. Великый в року 1359 даровав Берегово князю Федору Кориатовичу, котрый став ся и жупаном, Берегово пак было во властництвѣ его фамилии до року 1484.
Од року 1635 властником Берегова быв Юрий І. Ракоци, а од року 1726 гроф Лотар Франц Шенборн. Понеже в януарѣ року 1657 Юрий ІІ. Ракоци пустив ся зоз шведскым кральом громити Польщу, в юну тогож року польске войско заяло и спалило Берегово, обывательох, укрывшых ся до церкви вынищило.
По Трианонѣ Берегово стало ся частьов Чехословакии. В Береговѣ была реална русинска гимназия з мадярскым оддѣлѣньом, горожанска школа русинска з 9 класами мадярскыма и 4 чешскыма, чешска народна школа (5 клас), мадярска хлопчача (7 клас) и дѣвоча (6 клас) з русинскым оддѣлѣньом, мадярска римокатолицка школа дѣвоча (3 класы) и хлопчача 2 класы) и грекокатолицка (1 клас).
26. октобра 1944 з приходом Червеной армады зачав ся украинскый совѣтскый период истории вароша. Было фундаментално змѣнене школство. Намѣсто горожанкы, народных школ и гимназии од септембра 1945 фунгуе середня и 7-рочна школа з украинскым выуковым языком, и двѣ зачаточны школы, една з них - з мадярскым языком выукы.
В року 1910 з цѣлого числа 12933 обывательох были Мадяре — 12432, Русины – 221, Нѣмцѣ – 140.
В року 1930 в Береговѣ были 19007 обывателе, з того Мадяре – 9190, Евреи – 3759, Чехы и Словаци – 2034, Русины – 1954, Нѣмцѣ – 405, иншы –261, чужоземцѣ – 1404. Подля вѣры: юдеи – 5680, евангелисты – 4992, римокатоликы – 4475, грекокатоликы – 3202.
В року 2001 зоз 26,6 тыс. обывательох вароша были Мадяре – 12,8 тыс., Украинцѣ – 10,3 тыс., Ромы – 1,7 тыс., Русы – 1,5 тыс.
This article uses material from the Wikipedia Русиньскый article Берегово, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Обсяг є доступный під CC BY-SA 4.0, кідь не є вказане інше. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Русиньскый (DUHOCTRUNGQUOC.VN) is an independent company and has no affiliation with Wiki Foundation.