Villa Castidde (jndr'à 'u tagliàne Villa Castelli) je 'nu comune tagliàne de 9 030 crestiane d'a Provinge de Brinnese jndr'à Pugghie.
Villa Castidde comune | |
---|---|
Villa Castidde – Stemme | |
Localizzazione | |
State | Itaglie |
Reggione | Pugghie |
Provinge | Brinnese |
Amministrazione | |
Sinnache | Giuanne Barletta (lista civica Diventerà bellissima) da 'u 30-5-2019 |
Territorie | |
Coordinate | 40°35′N 17°29′E / 40.583333°N 17.483333°E |
Altitudine | 251 m s.l.m. |
Superficie | 35,15 km² |
Crestiàne | 9 030 (31-10-2021) |
Denzetà | 256,9 ab./km² |
Fraziune | Monde Scotane, Pezza Petrose, Antoglie, Battagghie, Sciaiani, Monde Fellone, San Barbate Lamie |
Comune 'nzeccate | Vurtàgghie (TA), Martina Franghe (TA), Frangaville Fundane, Ceglie Messapeche |
Otre 'mbormaziune | |
Cod. postale | 72029 |
Prefisse | 0831 |
Fuse orarie | UTC+1 |
Codece ISTAT | 074020 |
Cod. catastale | L920 |
Targhe | BR |
Cl. sismiche | zone 4 (sismicità assaije vasce) |
Nome javetande | Castellane |
Patrone | Sacre core de Gesù e Madonne d'a Fundane |
Sciurne festive | 2 ottommre |
Cartografije | |
Posizione d'u comune de Villa Castidde jndr'à pronvinge de Brinnese | |
Site istituzionale | |
'U territorie sue corresponne 'a vanne sud-occidendale de l'altepiane de le Murge a 'u confine 'mbrà 'u Salende e 'a Valle d'Itrie. Jè vanne d'a Murge de le trulle, d'u Parche naturale Terre de le Gravine, de l'arche ioniche tarandine e d'a soglie messapeche.
'U territorie comunale se stenne pe 34,58 km² jndr'à vanne sud-occidendale de l'altepiane de le Murge, 'mbrà 'a Valle d'Itrie e 'u Salende, jndr'à 'na zone colinare a 'u confine cu 'a pianure salendine.
'U comune se iacchie a 30 km da Tarde a cchiù o mene 45 km da Brinnese; confine cu l'Isole amministrative d' cetate de Tarde 1 E (distanze 3 km), Vurtàgghie (distanze 5 km), Ceglie Messapeche (8 km), Frangaville Fundane (12 km) e Martina Franghe (16 km).
'Na bbona parte d'u cendre javetate se iacchie jndr'à 'n'arèe collinare e pogge sus a 'n'orle de scarpate, 'mbrà le colle Fellone, Scotano e Castelle, ca arrivane a l'85% d'u territorie.
Le colle fanne parte de l'altepiane de le Murge e cumme quiste, furmate da calcare de Altamure alternate a formaziune limitate de calcare dolomitece e de deposite de rene calcarèe picche cemendate, soprattute pe le zone ca scennene.
Le fraziune ca stonne jndr'à zone pianegggiande sò San Barbate Lamie e Pezze de le Monache Cendrale, vecine vecine a Vurtàgghie e cupriscene 'u 15% d'u territorie comunale.
Stonne de le grotte naturale: 'a grotte de Mondescotano, 'a grotte de Facceasckuate, le grotte de Barcari e de Malecantone, 'a grotte Cuoche, 'a grotte Monde Fellone javetate da 'u Neoliteche a 'u III sechele e 'a grotte d'u Sacramende..
Jndr'à grotte de Mondescotano avenèrene acchiate 'nu sbuènne de lucerne de età romane, ca onne fatte penzà 'a presenze de rituale releggiose 'mbrà 'u III e 'u II sechele n.C.
'U corse d'acque cchiù 'mbortande nasce da 'a sorgende ca se iacchie jndr'à contrade Antoglie, jndr'à l'agre d'u paese, dette Fonde Strabone, ma canusciute jndr'à documendazione andiche cumme Fonde de le Grane. 'A sorgende dèje origgene a 'u Canale Reale ca iesse a nord d'a chiesere da Sanda Marije de le Grane, jndr'à 'u territorie de Frangaville Fundane e apprisse 'nu percorse de quase 40 km passanne pe le territorie de le comune de Orie, Latiane, San Vito de le Normanne e Carovigne sfoce jndr'à l'oasi de Torre Guaceto.
'A gravine, ca face parte d'u parche naturale reggionale Terre de le Gravine, costituisce 'u giardine botaneche comunale, ricche de macchie mediterranèe e de otre chiande endoggene.
'U clime d'u territorie comunale jè, cumme pu reste de l'arche ioneche-tarandine e de le Murge, tipicamende mediterranèe, cu vernate mite e staggiune temberate. Jndr'à 'u mese de scennare se reggistrane minime negative e nevicate.
Nella tabella sottostante sono riportati i valori medi che si registrano a Villa Castelli.
VILLA CASTIDDE | Mise | Staggiune | Anne | ||||||||||||||
---|---|---|---|---|---|---|---|---|---|---|---|---|---|---|---|---|---|
Sce | Feb | Mar | Abb | Mas | Sci | Lug | Agu | Set | Ott | Nov | Dec | Inv | Pri | Est | Aut | ||
Temb. max. medie (°C) | 11.8 | 12.8 | 14.9 | 18.3 | 23.1 | 27.5 | 30.4 | 30.5 | 26.5 | 21.4 | 16.8 | 13.4 | 12.7 | 18.8 | 29.5 | 21.6 | 20.6 |
Temb. min. medie (°C) | 4.6 | 4.9 | 6.5 | 8.7 | 12.5 | 16.4 | 19.0 | 19.2 | 16.5 | 12.8 | 9.0 | 6.2 | 5.2 | 9.2 | 18.2 | 12.8 | 11.4 |
Piogge (mm) | 59.0 | 58.0 | 54.0 | 36.0 | 33.0 | 23.0 | 22.0 | 23.0 | 37.0 | 73.0 | 73.0 | 63.0 | 180 | 123 | 68 | 183 | 554 |
Umidità relative (%) | 77.8 | 76.6 | 75.4 | 72.9 | 70.2 | 65.7 | 61.8 | 63.6 | 70.0 | 76.0 | 78.9 | 78.9 | 77.8 | 72.8 | 63.7 | 75 | 72.3 |
'U toponime Castellum Caeje jè documendate da l'XI sechele cumme territorie confinande cu Ostune, combrensive de Ceglie Messapeche e de granne parte de Villa Castidde. Jndr'à 'u XIV sechele 'a presenze de strutture fortificate giustifeche 'a qualifeche de Castellum. Da 'u XVII sechele iesse da le fonde 'u toponime Monte Castelli e jndr'à 'u XVIII sechele li Castelli, a 'u quale avène aggiunde Villa, referennese a 'u borghe, ggià apprime de l'indipendenze da Frangaville Fundane da 'a quale ere frazione.
Pe approfondimende, 'ndruche 'a vôsce Pezze Petrose. |
Sus a le origgene d'a presenze umane avere state teorizzate 'nu stanziamende jndr'à 'u territorie de gruppe de Arii e de Ligure. Pa preistorie onne state accertate ninde ninde ttre nuclée inzediative jndr'à 'u territorie, une a Monde Scotano, 'n'otre a Monde Fellone e 'n'urteme, a Pezze Petrose.
Jndr'à 'u case de Monde Fellone, l'allevamende de cavaddere resale a 'u neoliteche, fenomene abbastanze rare pu Sud Itaglie e quase uneche jndr'à Pugghie.. 'U territorie presende, pure, 'nu sacche de specchie, in corrispondenze de confine 'mbrà le territorie messape e tarandine.
Le iacchiamiende jndr'à grotte de Facceasckuate a le inizie de le anne settande confermane 'a frequendazione umane jndr'à l'epoche neoliteche e jndr'à l'età d'u bronze. Otre iacchiamiende databbele 'mbrà 'u III sechele n.C. e 'u II sechele n.C. se onne avute vecine 'a grotte de Mondescotano, combrese 'na sale de le lucerne, 'nu luèche possibbele de culte romane-pagane.
'U site archeologgeche cchiù studiate d'u territorie comunale se iacchie jndr'à località Pezze Petrose addò ha state acchiate 'na necropoli, fatte da cchiù de trenda chiaute, datate a 'u IV-III sechele n.C., cu correde funerarie fatte da reperte de cerameche decorate, statuette dea de l'agricolture Demetre, oggette de bronze, osce a die stipate 'nu picche jndr'à 'u Musée nazionale archeologgeche de Tarde ed 'nu picche jndr'à 'u musée civeche comunale.
Le scave onne acchiate, vecine a 'u site, de le reste de 'nu javetate, cu tracce possibbele de mure difensive in blocche, datate a apprisse 'a metà d'u IV sechele n.C. 'U javetate fortificate pò referirse a 'nu villagge de le Messape devendate, apprisse 'a conguiste da vanne de Tarde, 'nu phrourion, avamboste militare, d'u sisteme difensive tarandine.
In passate avere state ipotizzate 'n'idendificazione de le reste archeologgece cu 'a cetate de Rudiae patrie de Quinde Ennie. Picche metre a nord d'a necropoli, onne state acchiate tracce de 'na cisterne de età iertemedievale.
Pe approfondimende, 'ndruche 'a vôsce Storie de Orie. |
Durande 'u Medioeve 'u fortilizie, addò nasceve 'nu casale piccele, se acchiave a 'u limite 'mbrà le territorie longobbarde e bizzandine, costandemende in uerre 'mbrà de lore, e apparteneve 'a gualde d'u feude de Orie.
Jndr'à 'u 1055 Orie avenìe conguistate da le Normanne guidate da 'u conde Umbfrede d'Altaville e 'u territorie de quedde ca osce a die jè Villa Castidde trasìe a fà parte d'a signorie normanne d'u Pringipate de Tarde.
'A presenze de opere de fortificazione jndr'à 'u territorie de quedde ca osce a die jè 'u paese, costruite e devendate 'mbortande sulamende partenne da 'u periode angioine e da quidde aragonese, spieghe 'a qualifeche de Castella.
A sud de Monde Castelle nasceve 'u casale de S. Marije de le Grane, addò pò se ave 'nzippate 'a Chiesere de Sanda Marije de le Grane. 'U casale ere tenute durande 'u regne de Federiche II condrebuì 'a manutenzione d'u castelle de Orie.
Jndr'à 'u XIV sechele 'u tessute urbane de quedde ca osce a die jè 'u paese ere divise jndr'à nuclée 'nzediative piccele 'mbrà le quale Mondescotano, Mondefellone, 'u casale ca nasceve atturne 'a Torre de le Antogliette e 'u nuclèe de Castidde.
Jndr'à 'u 1455 Giacome Dell'Antoglietta avere date 'u casale, 'nzieme a Frangaville Fundane, a Giuanne Andonije Del Balzo in cambie de possedemiende larije a Fragagnane.
'U 7 settemmre 1500 Federiche d'Aragone congedìe 'u possesse d'u marchesate de Orie a Robberte Bonifacio, ca aggiungìe cu l'accattamende de dope d'u 1517 Frangaville e Casalnove (Mandurie). 'U duche de Orie Giuanne Bernardine Bonifacio, umaniste tagliàne vecine a 'u penziere de Erasme da Rotterdam avenìe pò preseguitate da l'Inguisizione e costrette a refuggiarse apprime jndr'à Frange, pò jndr'à l'Inghilterre e spicciò jndr'à Prussie, e murìe a Danziche jndr'à 'u 1597.
'A famigghie genovese de le Imperiali jndr'à 'u XVII sechele accattò 'nzieme 'a torre de l'Antoglie pure 'a fortezze medievale de Monde Castidde, cangiannele jndr'à 'na residenze d'a staggione e chiandanne jndr'à 'u territorie 'na stazione pe l'allevamende de cavaddere de razze murgese. Jndr'à 'u 1755 Mechele Imperiali Juniore affide temboraneamende a Andonije d'Arco le castidde in qualitate de castellane.
'U diche de Mundejase e 'ndendende de Terre d'Otrande, Giuacchine Ungaro, economiste e letterate, jndr'à l'anne 1793 accattò le massarie Pezze d'a Corte e Antoglie, 'nzieme 'a zone de le Castidde. Le terrene avenèrene congesse jndr'à lotte piccele a le vrazzande de le pajesere vecine e se scì ccrejanne 'nu belle nuclèe javetate atturne a 'u castelle nate sus a l'andiche fortificazione, ca avenìe restrutturate e adibbite a palazze ducale.. 'U 20 febbrare 1799 le cannune ca stavabe a Castidde avenèrene pigghiate da 'na truppe de 39 crestiàne armate pe organizzà 'a difese andirivoluzionarie de Frangaville, cetate monarchiche, condrarie 'a Repubbleche Napuletane proclamate 'u 23 scennare.
Cu l'influenze rivoluzionarie apprime e quedda napoleoneche pò, l'aristocrazije perdìe totte 'a vanne de le privilegge sue e jndr'à 'u 1808 avenèrene approvate le Legge eversive d'a feudalità da vanne de Gesèppe Bonaparte. 'U duche Ungaro condinuò l'attivitate de reorganizzazzione d'u borghe e cangiò 'a stalle d'u castelle jndr'à 'na cappelle dedicate a 'u S. Crocefisse, ca jndr'à 'u 1830 avenìe 'nzippate a parrocchie succursale.
L'economije d'u borghe 'mbrà 'u XVI e 'u XVIII sechele se funnave soprattutte sus 'a pastorizie e sus a l'agricolture e girave atturne a le massarie fortificate.
Fenomene 'mbortande pe le attivitate commerciale ere 'a transumanze, cu 'u spustamende de gregge e mandrie da 'a Valle d'Itrie a 'u Salende passanne pe le Murge. In occasione d'u passagge de le mandriane se organizzavane fiere annuale. Jndr'à 'u territorie comunale stonne angore 'na serie de andiche tratture e 'nu note carrare de le vacche a 'u confine.
L'arme comunale aprrisse l'indipendenze |
---|
'U stemme araldiche comunale ha state ufficializzate cu regge decrete d'u 6 settemmre 1928. d'azzurre e verde, a 'u castelle d'argende finestrate de gnure merlate e turrite de doje, addestrate da Olive a 'u naturale. Le doje fronde, une d'ulive e l'otre de l'arvule d'a ghiande”.. |
Pe totte 'a durate d'u Regne de Napule, 'a vanne cchiù larje d'u paese ere territorie de pertinenze de Frangaville Fundane mendre Monde Fellone ere frazione de Martina Franghe e Monde Scotano de Ceglie Messapeche.
'U 12 scennare 1818 jndr'à 'u territoie de le Castidde 'u prevete brigande Ciro Annicchiarico, canusciute pure cumme Papa Ciro, promotore de 'na Repubbleche salendine e funnatore d'a sette sette de le decise, 'na suggettate armate in veste repubblecane e massoneche, disarmò le fuciliere reale ca ste scevane a Ostune.
'U 22 masce 1830 'u paese avèneve nnomenate jndr'à 'na lettere d'u vicarie generale, l'arcidiacone Gesèppe Lombardi, purcé, 'a parrocchie, succursale d'a Matrice de Frangaville, ere l'uneche case diocesane de chiesere de cambagne fatte pe fà fronde a le esiggenze spirituale de 'nu belle numere de crestiàne ca s'avèrene stabbilite jndr'à 'u territoie 'mbrà Ceglie e Frangaville 'nzigne a devendà 'n u vere cendre urbane.
Jndr'à 'u 1871 'na attane cappuccine nomenate parroche presendò richieste presse 'a provinge de Terra d'Otrande d'u passagge d'a frazione de Villa Castidde da 'u comune de Frangaville Fundane a quidde de Vurtagghie.
Jndr'à 'u censimende d'u 1871 se condane 116 fochere. 'A strutture economeche d'u territorie apprisse l'Unità d'Itaglie se base sus a produziune agricole e manifatturiere, fatte soprattutte da contadine (probbietarie piccele e vrazzande) e da filatrice.
Le richieste de formazione de 'nu comune indipendende partirene da 'u 1919 cu 'a formazione de 'nu comitate, cu 'a guide le "Democratici e Liberali". Le scondre verbale durande le sedute d'u consiglie comunale de Frangaville devendarene sembre cchiù 'ngazzuse. Apprisse a' delibbere d'a Camere de le deputate d'u Regne d'Itaglie 'u 25 masce 1923 partìe ufficialmende l'iter pe l'autonomije comunale.
'A tenzione cu 'u capeluèche arrevò a manifestaziune de chiazze d'u sciurne de Carsuniedde d'u 1925. Le residende de Monde Fellone e de Specchie Tarandine, osce a die fraziune d'u comune de Martina Franghe, e de Mannare, frazione ca segne 'u confine cu Vurtàgghie, permetterene de arrevà a 4.000 votande. L'istituzione d'u comune nuève avenìe ufficializzate jndr'à 'u 1926 cu 'a conzegne d'u stemme araldeche comunale. Avenìe nnomenate prime amministratore Rafaele Ostillio de Tarde.
'U 17 luglie 1980, durande 'na manifestazione condre a 'u caporalate, le caporale apprisse diverse minacce de morte pruvarene a 'nvestì le fatiature e le sindacaliste e 'u 21 luglie uette caporale armate de pestole aggredirene le sindacaliste d'a CGIL e assaltarene 'a sede d'u sindacate.
Pe approfondimende, 'ndruche 'a vôsce Castelle de Villa Castidde. |
'A torre cchiù andiche de età medievale jè attrebbuibbele a 'u processe de fortificazione d'u feude sotteposte a 'u condrolle de Orie, promosse da 'a famigghie Dell'Antoglietta (ca all'epoche se chiamave de Nantoil o de Nanteuil) da 'u 1307.
'U castelle domine da sus a l'urteme colle de le Murge, 'a pianure salendine. Se tratte de 'na residenze castellane de tufe cchiù vote rimaneggiate. 'A torre ha state restrutturate e adibbite a fortificazione jndr'à 'u 1450 da 'u pringipe Giuanne Andonije Orsini Del Balzo.
Passò pò a 'u marchese de Orie Giuanne Bernardine Bonifacio, jndr'à 'u XV sechele. Jndr'à 'u XVIII sechele 'a famigghie Imperiali accattò 'a fortificazione, abbandunate ggià jndr'à 'u XVI sechele, cangiannele jndr'à 'na residenze d'a staggione e mettènne 'nu allevamende de cavaddere de razze murgese. Cu 'u passagge a' famigghia Ungaro 'a fortificazione avenìe adibbite a palazze ducale. Pò 'u castelle avenìe affidate a 'u castellane Andonije d'Arco..
Se 'ndrucane angore caratteristeche de età tarde-medievale e rinascimendale. Stipò 'mbonde a' fine d'u XVIII sechele le merlature e le cannune, cchiù nnande luate. Jndr'à 'u 1822 'na vanne de le scuderie avenìe ausate pe ffà 'na cappelle, dedicate a 'u Sandissime Crugefisse. Jndr'à 'u 1830 'a chiesere avenìe elevate a parrocchie e consacrate da 'u vescove de Orie.
Durande 'u Noveciende l'edificie ha state ausate cumme caserme e scole. Resturtturate pe 'nu picche, jè osce a die, sede d'u municipie, d'a gallerie d'arte comunale e d'u musée archeologgeche municipale. 'Na vanne piccenne d'a strutture jè de probbietà private, mendre 'a parrocchie tène 'n'ale d'u castelle in fase de restaure. 'A facciate settendrionale ha state cchiù vote rimaneggiate, mendre quedde meridionale stipe, totalmende sckaffate jndre a 'u comblesse architettoneche, l'endiche mastie, osce a die sede d'a Sale d'u Conziglie.
Jndr'à chiazze Municipie sus a 'u late 'mbronde a 'u castelle ste 'nu monumende jndr'à 'u stile libberty, ca raffegure Nike dea d'a Vittorie, in memorie de le cetadine muèrte a 'u frode durande 'a prime uerre mundiale.
Se tratte de 'na torre merlate d'u XIV sechele prutette da mure ierte de corte. Avenìe 'nzippate da 'a famigghie feudatarije de le de Nanteuil, addò 'u rame pugghiese pigghiò pò 'u nome de le Antoglietta, cumme vanne d'u comblesse sisteme difensive de Orie e Frangaville Fundane. 'A torre avenìe allariate durande 'u XVIII sechele cu 'a costruzione de stalle indipendende, de 'na porta nove, de 'na ville rusteche e de 'na massarie.
'Nzippate jndr'à 'u 1823 e dedicate a Sanda Filumene de Rome, ste lunghe 'u corse Vittorie Emanuele II. Cu l'istituzione d'u dogme d'a 'Mmaculate Congezione de Marije, proclamate da Pape Pio IX jndr'à 'u 1854, nascìe jndr'à 'u 1893 pure jndr'à stu paese, 'a confraternite d'a 'Mmaculate, a' quale se aggiungerene 'u terz'ordene Frangescane e l'istitute de le Figghie d'u Sacre Core de Gesù. ?a chiesere avenìe accattate da le confratelle jndr'à 'u 1894 e ddunate a' diocesi de Orie.
Jndr'à 'u 1896 stavane 'nu sole altare e ttre statue dedicate a San Frangische d'Assise, Sanda Filumene de Rome e Sanda Marije 'Mmaculate. Jndr'à 'u 1917 'a cappelle laterale avenìe dedicate a Sand'Andonije da Padove cu 'a costruzione de 'n'otre altare e 'a collocazione de 'na statue d'u sande de Padove.
L'edificie jè fatte de murature de petre calcarèe. 'A chiesere tène 'nu portale uneche dominate da 'nu rosone circolare e de 'nu cambanile a vele cu sus 'nu timbane. 'A chiande jè a croce latine, cu 'na sole navate cuperte da volte a crociere. Le caratteristeche architettoneche jndr'à 'u comblesse richiamae 'u stile de le chiesere de le Murge e d'a Valle d'Itrie.
Le fatìe pa Chiesera nove accumenzarene jndr'à 'u 1898, 'a costruzione avenìe fatte cu de le donaziune private cu 'nu belle condrebbute de tre raziunale addò pò se aggiungerene de le cifre piccele offerte da 'u reste d'a popolazzione e fatìe volondarije.
'A costruzione avìe belle retarde e se reggistrarene 'na serie de disavanze de funne. Pruggettate da l'ingegnere Luche di Castri jndr'à 'u stile ecletteche e 'nditolate a San Vecinze de Paoli jndr'à 'u 1938.
'A vanne 'nzippate jè fatte de tufe e de petre de mazzare, cu ornaminde de petra vianghe. 'A facciate è divise da contrafforte, ca seguone 'a divione 'nderne jndr'à tre navate, e tène ttre purtale. Jndr'à vanne ierte a 'u cendre ste 'nu rosone affiangate da trifore. 'A chiande jè 'a corce latine, cu ttre navate, quedde cendrale e 'u trasette cuperte da 'na volte a botte, invece volte a crociere cupriscene le navate de late, puggianne sus a pilune a forme de corce. 'U cambanile ste sckaffate sus a 'u late oriendale cu cuspide accenduate e richiame le forme d'u gotiche. 'A cupole jè rivestite de mattonelle cu cchiù culure.
Jè 'a strutture releggiose cchiù andiche d'u cendre javetate. Jndr'à 'u 1822 'nu stuèzze de le scuderie avenìe ausate pe ffà 'na cappelle, dedicate a 'u Sandissime Crugefisse. Jndr'à 'u 1830 'a chiesere avenìe promosse a parrocchie e consacrate da 'u vescove d'a Diocesi de Orie.
L'ale d'u castelle ca 'a cerconne avène congesse a l'ause da 'u duche Carle Ungaro a l'Arcidiocesi de Tarde pe ffa fà 'a celebbrazione de le messe in suffragge de le andenate sue jndr'à Cattedrale de San Catavete. Jndr'à 'u periode de attivitate cundave a parte a l'altare maggiore otre cinghe altare e dece statue. 'A chiesere mesure 21x10,5 m. e tène doje cappelle piccele e 'na sagrestie. Osce a die jè chiuse a 'u culte, ospite quacche vote attivitate socie-culturale.
A le pide d'u Mondecalvarie, addò nasce 'u palazze ducale, ste 'nu sanduarije ca ospite 'na statue d'u Criste jndr'à 'u sepolcre.
'U comune jè attraversate da 'na gravine parte d'u Parche naturale Terre de le Gravine, oggette de condinue fatìe de revalutazione e recupere partenne da 'u 1990 'mbonde a 'u 2010 e arèe prutette da 'u 2005. Osce a die jè 'u giardine botaneche comunale. A 'u cendre d'a gravine, sus 'a vanne occidendale, se iacchie 'nu frandoije ipoggèe, 'u frandoije ducale ca resale a 'u XVIII sechele e fatte jndr'à le grotte d'a gravine.
Jndr'à l'anne trende 'a gravine avenìe superate da 'nu ponde a nove arcate de petre, fatte da le maestranze locale. L'obiettive ere quidde de aprì 'nu fronde nuève de urbanizzazzione pu comune. 'A zone de l'allariamende, Lizzite, avìe subbete 'na scole elemendare e 'na caserme.
Già a l'inizie d'u '900, sus a 'u modelle de Alberobbelle, 'u cendre javetate de Villa Castidde ere fatte soprattutte da trulle. 'U Vorghe de le Trulle, d'u quale osce a die rumanene sulamende picche costruziune e le oltre trulle, avenèrene scettate 'nderre pe dà spazie a case e palazzine moderne, stessa cose ca ave successe, de mene però, a Alberobbelle, se sveluppave jndr'à Vie Masaniello (osce a die Vie de le Rose) e Larije Chiesera Vecchie, a chiste se aggiungeve 'nu seconde nuclèe jndr'à Vie d'a Rupe tarpea 'nguedde a' gravine e 'nu terze a nord d'u Rione Belvedere jndr'à Vie Alfieri e Vie Seneca. L'assette urbanisteche, 'nzigne a le prime d'u Noveciende, jè completamende diverse da osce a die Corse Vittorie Emanuele e Chiazze Municipie erane zone agricole e 'u borghe se arroccave sus a 'u Monde Castelle.
Stonne de le cappelle rupestre e 'nu sbuènne de cappelle votive costruite sus a 'u ciglie de le strade, quase totte 'nzippate 'mbrà l'inizie d'u Uetteciende e le inizie d'u sechele apprise.
Se stipane pure de le specchie, 'mbrà le quale "specchie Puledre" e 'a "specchie Facceasckuate".
Jndr'à 'u territorie se iacchiane 'nu sbuènne de massarije, quacchedune fortificate:
Crestiane censite
Seconde a le date ISTAT a 'u 31 decemmre 2014 'a popolazzione furastiere residende ere de 293 crestiàne (119 maschele e 174 femmene), pare a 'u 3,16% d'a popolazzione residende. Le nazionalità cchiù rappresendate e 'a percenduale sus a 'u totale d'a popolazzione residende erane:
'A releggione cchiù rappresendate jè 'u cristianesime de confessione cattoleche, 'u paese tràse jndr'à giurisdizione d'a Diocesi de Orie. Jndr'à 'u 1847 avenìe nnomenate 'u prime parroche, invece 'nu vicarie curate jè documendate da 'u 1830, cu 'a 'ndroduzione de le reggistre parrocchiale.
Jè pure presende 'na chiesere de le Assemblèe de Die jndr'à l'Itaglie, de oriendamende evangeliche-pendecostale.
'U dialette castellane tràse jndr'à le dialette appule-barese tipece d'a Valle d'Itrie e d'a Murge, cu 'nfluenze forte d'u dialette ostunese, cegliese, barese e d'u dialette tarandine.
Caratteristeche tipeche sò: 'u richiame a forme volgare d'u spagnole e d'u frangese de età moderne (esembie d'a vicinanze a'u frangese jè 'a "ǝ"). Jndr'à 'u 2005, cu 'u patrocinie de l'Amministrazione Provingiale de Brinnese, ha state pubblecate 'u "Vocabolario del dialetto di Villa Castelli", a cure de Jangele Gesèppe Chirulli.
'A pizzeche jè 'na tradizione locale andiche, d'a quale avène recanusciute 'u valore culturale.
Diffuse jndr'à 'u passate pure jndr'à varianda soje a scherme ca, ballate cu 'n'arme, pareve 'nu duelle. Jndr'à variande tarandate costituive l'accombagnamende prengepàle d'u rite etnocoreuteche d'u tarandisme. 'U rappresendande cchiù famose d'a pizzeche de Villa Castidde jè 'u candore-pastore Vite Nigro.
'A feste patronale se face 'u 2 ottommre e pò avène fatte pure 'nu congerte 'u 3 ottommre.
L'1 ottommre se face 'a fiere d'u bestiame, jndr'à 'u rione Belvedere, e de sere sone 'a banne jndr'à Chiazze Municipie.
Fatte vecine a' gravine, ha state congepite cumme luèche de educazione a 'u respette de le resorse naturale e a l'approfondimende de le canoscenze relative a' biodiversità de l'ecosisteme mediterranèe in collabborazione cu 'u comune de Vurtàgghie e cu Legambiente.
Osce a die ospite jndre 'a bibblioteche comunale, ca conde cchiù o mene 2.000 volume, ca osce a die non ge tène orarie de aperture a 'u pubbleche.
Apirte jndr'à 'u 2009 jndr'à l'ex macelle comunale, jè 'na strutture de accoglienze e cure de le femmene violate.
'A cucine castellane se base sus a pietanze d'a tradizine contadine d'a cucine pugghiese.
Jndr'à 'u paese non ge stonne colture de uve da vine, le candine locale vinificane uve ca avènene da le territorie atturne.
L'economije d'u paese jè soprattutte basate sus a 'u settore primarie, in particolare sus a l'oliviculture e de arvule da frutte, specialmende amennele. A parte l'allevamende de cavaddere de razze murgese, ca se face da 'u XVII sechele pure ca osce a die ha state quase abbandunate ste purequidde de ovine e caprine. Jndr'à 'u settore artiggianale se condinue 'a tradizionale costruzione de murature a secche e de le trulle.
Jndr'à 'ndustrie stonne le oleifice e le stabbileminde vinicole. Pa produzione de elettricità jndr'à 'u paese se iacchiane 'nu 'mbiande eoleche belle gruèsse installate jndr'à contrade Renne, e pò ste pure 'na cendrale idroelettreche jndr'à contrade Battagghie. Queste face parte de l'Acquedotte Pugghiese, ste 'mbonda 'mbonde a 'u Canale Prengepàle e a l'inizie d'u Granne Sifone Leccese e ha state aperte jndr'à 'u 1939, disponenne de doje turbine Francis da 975 kW ognune. Ave funzionate 'nzigne a 'u 1971 quanne 'a trasute in esercizie de l'Acquedotte d'u Pertusille diminuì le portate idriche, ma jndr'à 'u 2009 ave trasute arrete in servizie avenenne alimendate da 'na turbine Pelton a 3 gette cu putenze de 450 kW.
Mò avène presendate 'na tabbelle relative a le amministraziune ca se onne cangiate jndr'à stu comune.
Periode | Prime cetadine | Partite | Careche | Note | |
---|---|---|---|---|---|
30 luglie 1985 | 26 luglie 1990 | Gesèppe Nigro | Democrazia Cristiana | Sinnache | |
26 luglie 1990 | 28 decemmre 1994 | Alessandre Neglia | Partito Popolare Italiano, Democrazia Cristiana | Sinnache | |
25 scennare 1995 | 24 abbrile 1995 | Clara Minerva | Comm. pref. | ||
24 abbrile 1995 | 14 sciugne 1999 | Viteandonije Caliandro | lista civica | Sinnache | |
14 sciugne 1999 | 14 sciugne 2004 | Viteandonije Caliandro | lista civica | Sinnache | |
14 sciugne 2004 | 8 sciugne 2009 | Frangische Nigro | lista civica | Sinnache | |
23 settemmre 2009 | 10 febbrare 2010 | Marije Andoniette Olivieri | Comm. pref. | ||
10 febbrare 2010 | 28 masce 2014 | Frangische Nigro | lista civica | Sinnache | |
28 masce 2014 | 30 masce 2019 | Viteandonije Caliandro | lista civica | Sinnache | |
30 masce 2019 | in cariche | Giuanne Barletta | lista civica | Sinnache |
Jndr'à 'u paese stonne diverse suggettate sportive, in particolare 'u Villa Castelli Calcio. Pò se agigunge 'n'otra discipline sportive assaije pratecate e amate cumme 'u ciclisme addò ste 'u Team Bike Villa Castelli ASD.
Template:Comuni Parco naturale regionale Terra delle Gravine
This article uses material from the Wikipedia Tarandíne article Villa Castidde, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 'U condenute jè disponibile sotte a CC BY-SA 4.0 senze otre note. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Tarandíne (DUHOCTRUNGQUOC.VN) is an independent company and has no affiliation with Wiki Foundation.