8. April – E Romengoro Internacionalno Dive

April – E Romengoro Internacionalno Dive. Svako berš ko akava dive, but Romane organizacie aranžirinena festivalia, seminaria, koncertia, konferencie... Ko akava datum e beršeste 1971 hine o jekhto Romano kongresi ki London. Ko odova kongresi alje but Romane aktivistia kotar celo sveto. Tegani anđe pe but važna odluke:

• o Roma te na oven više tretirime sar etničko grupa, nego te oven priznaime sar nacia,
• e narodosoro jekh jedino hem korektno anav te ovel Rom,
• o Roma te oven oljen pravo ki piklji čhib hem kultura,
• tegani hine prezentirimi i nacionalno himna hem o nacionalno bajrako.

O dujto Romano kongresi hine ki Ženeva (Genève), ki Švajcaria e beršeste 1978. O trito Romano kongresi hine ko Getingen (Göttingen), ki Germania e beršeste 1981. O štarto Romano kongresi hine ko Šerok (Serock), ki Poljska e beršeste 1990 hem tegani anđa pe oficialno odluka o datum 8. April te ovel E Romengoro Internacionalno Dive. O panđto Romano kongresi hine ko Prag (Praha), ki Češka e beršeste 2000. O šovto Romano kongresi hine ko Lančiano (Lanciano), ki Italia e beršeste 2004. O eftato Romano kongresi hine ki Zagreb, ki Kroacia. Akala kongresia organizirini i Internacionalno Romani Unia.

But Romane organizacie ko celo sveto aranžirinena festivalia, seminaria, koncertia, konferencie kuri oljengoro primarno cilji tano te ilustririnen i Romani problematika. Momentalno duj najbare "Romane" problemia tane: diskriminacia hem edukacia.