Χαβίτς

Μαερεύκεται αγλήγορα και ίνεται από γνήσια προϊόντα. Εν πολλά καλόν για την υΐαν.

• 1 ποτήρ λαζουδί αλεύρ
• 2 χουλερέας φαΐ παρχαρί βούτορον (ασα χτήνεα)
• 3 ποτήρεα νερόν
• 2 μικρά κομματόπα τυρίν χτηνί ή κατσικί, άμον ντο είναι τα λουκούμεα
• Ολίγον άλας

Το χαβίτς θέλ ολίγον λαζουδί αλεύρ, παρχαρί τυρίν και βούτορον (ασα χτήνεα), άλας και νερόν. Σο τηγάν' βάλλομε τ'αλεύρ να καβουρεύκεται και συνέχεια με το χουλιάρ ταράζομ'ατο να μη κάεται. Όνταν εγροικούμε εκαβουρεύτεν τ'αλεύρ, ατότε γομώνομε το νερόν σο τηγάν και ως να βράζ' με το χουλιάρ γάλια γάλια ταράζομ'ατο. Όνταν εγροικούμ' έβρασεν, τρίφτομε το τυρίν και σύρομ'ατο απές σο τηγάν. Επεκεί βάλλομε το βούτορον απές σ'έναν τηγανόπον να λύεται κι ασο λύεται και ύστερα κςύνομ'ατο απές σο τρανόν το τηγάν και με το χουλιάρ ταράζομ'ατο. Περιμένομεν ολίγον κιάλλο να βραζ κι αραέτς ψέεται. Ασο ψέεται και ύστερα, εβγάλομ'ατ' ασο τηγάν, βάλλομ'ατο σ'έναν ςκεύος, κάθουμες κα και τρώγουμε.

• Πως εφτάμε το χαβίτς - sintagespareas.gr (ελλ)
• Πως εφτάμε το χαβίτς με φούρνικον αλεύρ' - sintagespareas.gr (ελλ)