Kurpälzisch

Lexikografisch erfassd unn beawaid werre di kurpälzische Dialekte vum Badische un vum Siedhessische Wärdabuch.

 

S Kurpälzisch is des Pälzisch wu ma reschts vum Rhoi babbelt. Di Abgrenzung zu alle iwwarische Pälzische Variande is also da Rhoi. Des Schbroochgebiet vum Kurpälzische deckt sisch im Große un Gånze mid-em reschtsrhoinische Deil vun da hischdoarische Kurpalz. Dodemit gehts weit iwwa-s Gebiet vun da haidische Regiõn Kurpalz in Bade naus.

Di Außegrenze losse sisch net schaaf feschdleje. Des is äfach e Dialegdkondinuum mid allmählische Iwwergäng zu de Nochbadialegd.

Di Unnerschied zwischem Kurpälzische un em Siedhessische sinn net gräßer wie innerhalb vum badisch kurpälzische Gebiet. Di Bezaischnung als Hessisch un Kurpälzisch odder gaa Badisch rischt sisch änzisch noch de haidische Ländergrenze un hot mit da Schbroochgeografie nix zu du. Im hessische Ried, des is di Rhoiewene, an da Bergschdrooß un im Odewald schwetzt ma pragdisch di selb Schbrooch wie in da badisch Kurpalz. Vawunnere dud des oim net, hot doch des gsamde Gebied zum Fliggedebbisch ghert, wu (vor allem) unner de Färschdetimer vun Kurmoinz, Worms un Kurpalz uffgedaild waa. Di Schbrooch ännert sisch gõnz allmehlisch. Noch Norde hie naigt ma tendenziell mehr zu helle Vokale, noch Siede zu dunggle. S-gibt wennisch Unnerschied im Wortschadz. Zum Baischbiel deggd ma sisch im hessische Orewald mid-eme Kolder zu, im badische Odewald mit eme Debbisch. De selwe Unnerschied gibt-s iwwarischens aa innerhalb vum lingsrhoinische pälzische Schbroochgebiet. Des Kurpälzisch-Siedhessische setzt sisch noch bis ins bayrische Unnerfrõngge iwwer de Main weg fort un erschdreggd sisch noch ugfähr uf de Londkrais Mildeberg.

Noch Siede hawwe di Schbroochforscher schemadisch di Linje zwische p un pf als Grenz vum Kurpälzische zum Siedrhoifränggische feschdgelegt. Des gilt glaischzaidisch als Grenz zwischem Middldaitsche un em Owwerdaitsche. Awwer so äfach is des net. Erschdens emol hot sisch di Linje im Lauf vun da Zaid immer waider uffgschbalde un is fä vaschiedene Wärder gãnz unnerschiedlisch. Zweddns hawwe sisch selle Linje noch Nordweschde verschowe. Des hot dodezu gfiehrt, daß ma hait in da Gejend um die ald Haubschdadt vun da Kurpalz, Haidlberg, noch da lingwischdische Definizion gar nimmi kurpälzisch babble ded(!). Dabei ännert sisch zwische da Regiõn närdlisch un e gãnzes Schdick Siedlisch vun Haidlberg net allzuviel an da Schbrooch.

Vokale

Konsonande

Lenisierung

Lenisierung heeßt ma e Erwaischung vun Konsonande (vun ladeinisch lenis: mild, sãmpfd).

g-Lenisierung

• Des g verwãndelt sisch noch dunggle Vokale zum Deil zu-mne ch (wie in Dach) odder r, odder s-fallt aus un dehnt-s a (guggd aach bai Rhotazismus)

Baischbiele:
froore, isch frooch; sare, isch sach, hosch gsaat; Warre; Aag / Aach, Aare / Aache

• Noch helle Vokale wärd des g in mãnsche Fäll zu-eme j odder s-verschwindt gånz, wie uf da lingge Said vum Rhoi närdlisch vun Ludwischshafe aa.

Baischbiele:
Je noch Region: Rege, Reje, Ree’e; krigge, krije; schdaige, schdaije; Gegend, Gejend; vun weege, vun weeje; sisch ärgare, sisch äjare
(Uff da lingge Said vum Rhoi siedlisch vun Ludwischshafe wär des: Rääsche, krische, schdaische, Gechend, vun weesche, sich ärschan)

• E vorausgehendes l kãnn aa wie in Vokal wirge un des g zu-mne j werre losse:

morje frieh, gudde Morje, Dilje

• Daß e g zu-mne sch wärd, kummt selde vor:

gudde Morge, gudde Morsche, gudde Morje (regional unnerschiedlisch odder im selwe Ord newanãnna verwendt)

b-Lenisierung

• Zwische Vokale odder Vokal un l wärd des b gern zu-mne ww:

Baischbiele:
Zwiwwl, awwer, Mewwl, zowwle, owwe, driwwe, Howwl

• E vorausgehendes l odder schdajg vokalisierdes r, wu sisch faschd wie e a ããherd, wirge do als aa wie n Vokal:

halb, halwa; olwa; Ärwet

r-Lenisierung

• Des r kãnn zwische vorausgehendem Vokal un nochfolgendem g odder k zu-mne j werre:

Regional unnerschiedlisch: schdaag, schdajg; Maagd, Majkd; Berg, Berge / Bäjg, Bäjge
(Uf da lingge Said vum Rhoi närdlisch vun Schbayer sescht ma eweso Berg / Bäjg, siedlisch devu heeßts Bärsch.)

Rhotazismus

Vun Rhotazismus redt ma, noch-m grieschische Buschdawe Rho, wann sisch in Konsonand zu-mne r verännert.

• Da g-Rhotazismus is wait vabrait: Warre, sare, Aach / Aare, froore
• Da d-Rhotazismus kummt regional vor: Borre(m), Orrewald, Ourewald

Je nochdem wu ma im Odewald is, sescht ma Odewald, Oddewald, Orrewald, Ourewald odder Oulewald.

Lambdazismus

Beim Lambdazismus, noch em grieschische Buschdawe Lambda benãnnd, wärd in Konsonand zu-eme l. Des hot-s frieher in verschiedene Orde in da Gejend vun Månnem bis Ewwerbach gewwe wie Aldrib (direkt iwwam Rhoi driwwe), Neggarau, Kefferdal, Faidene (wu di Oiwuhner selwer Failne nenne), Wallstadt, Seggene, Friedrischsfeld, Heddese (des heßt dort Hellese), Schriese, Dossene, Aldebach, Låmbehãã, Hilsehãã, Wilhelmsfeld, Hailischkraizschdåånisch, Aiderbach, Altnaidorf, Schänau, Heddesbach, Långedal, Schääbrunn, Moosbrunn, Ewwerbach. Hait hert ma des wohl bloß noch in e paa Orde bai Månnem un nerdlisch vun Haidlberg.

• E d zwische zwee Vokale kãnn do zu-mne l werre:

Bollem, Bruler, Oulewald, daweller, Hellese, olla, holler
Di Laid in selle Orde hot ma frieha mid sellem Schbruch geuzt: Hinnerm Laale laila

Im Nordoschde vun da Kurpalz sescht ma ähnder Brurer, im Siedweschde Bruder un bloß in sellem klääne Lambdazismus-Gebiet dazwische heeßts Bruler.

Morphologie

Substantive

Verbe

Morphosyntax

Syntax

Fabraidung unn Schdadus im Wordschatz

Besunnahaide im Wordschatz

Tibisch kurpälzische Ausdrigg sinn zum Beischbiel: