Neidorf

Neidorf ligt im Buntsandschdåå-Odewald, im Ståånischdal. Daluffwärts kummt Kreizschdåånisch, dalabwärts Schääna. Vun Weschde mindet in Neidorf s Hilschbachdal, wu Wilhelmsfeld liggt, ins Ståånischdal. Di Gemaagung isch 5,31 km² groß un reischt vun 200 bis 503 m Heh i. NN. Di Häng beschdehe aus em Haubdbundsandschdåå im Middlare Bundsandschdåå. Im Dal findt ma aa bissl vun de drunnerliggende Bundsandschdåå-Schichde. Neidorf hot zwee Deile, s Unner- un s Owwerdorf.

S gibt verschiedene Åågawe, wann Neidorf s erschdemol erwähnt worre isch: 1316 als „Nuendorf“ odder 1355, als s „nuwe Dorf“. S werd wohl net allzulång vorher gegrindt worre soi. Des Gebiet, urschbringlisch im Bsitz vun de Strahleberjer, isch um 1300 rum an s Bischdum Worms kumme gwest. 1357 ischs an de Palzgraf Rubrescht de Äldare verkaaft worre un 1388 dånn an di Ridder vun Linnefels. 1537 ischs schließlisch unnerm Kurfärschd Ludwisch widder an di Kurpalz kumme. Di Kurpalz hot zur Verwaldung e Kellerei oigerischt, di Kellerei Waldegg, wu ihrn Sitz uff da Bujg Waldegg ghatt hot, nochem Dreißischjährische Krieg dånn in Schääna. 1803 isch Neidorf an Bade kumme, 1875 zu Schääna oigemeindt worre.

1711 isch ugfähr drei Kilomeder weschdlisch vun Neidorf noch e neies Dorf gegrindt worre. Obwohls offiziell denn Name Wilhelmsfeld griggt hot, hot ma in da Gejend „Neies Dorf“ dazu gsaat, aa di Wilhelmsfelder selwer noch e paa Jazehnde lång, wie ma in de kadolische Käjschebischer sehe kann. Zur Unnerscheidung hot ma zum äldare Neidorf dånn „Altneidorf“ gsaat.

Åfang vum 20. Johrhunnderd hawwe viele Neiderfer in da Lederfabrik in Schääna gschafft, annare als Aaweider in Heidelberg odder als Waldaaweider im Wald vun da Schäänauer Pfleeg.

Bevelgerungsentwigglung

1925 ware 98 % vun de Neiderfer evangelisch, 1968 noch vier Fimpfdel.

Bauwerge

 

Di evangelisch Käjsch, aus rodem Buntsandschdåå, isch 1937-1938 gebaut worre.

Brauchdum

Da Unåme vun de Neiderfer isch „Dallacker“.

Am Fasnachdinschdag Owend werd e Fasnachtsfaier ågezindt.

Di Neiderfer Kerwe isch immer am dridde Wocheend im Auguscht.

Neidorf hot e Grund- un e evangelische Kinnerschul, e Sporthall un en Fußballblatz.

• Carl Höfer (* 1819 Brehmen, Dauwerfrangge, † 1849 Mannem, hiigerischt), Lehrer in Neidorf un Freiheidskämbfer
• Adam Remmele (* 1877 Neidorf, † 1951 Freiburg), Badischer Schdaatsbräsident
• S gibt e Carl-Höfer- un e Adam-Remmele-Schdrooß.

Im Netz

• Gschischt vun Neidorf uf da Seit vun Schääna

Lidaradur

• Staatl. Archivverwaltung Baden-Württemberg un Stadt Heidelberg (Rausgewwer): Die Stadt- und die Landkreise Heidelberg und Mannheim: Amtliche Kreisbeschreibung. Bånd 2: Die Stadt Heidelberg und die Gemeinden des Landkreises Heidelberg. Kallsruh 1968