Piewie, Piewie, Piewittitie!
Ei, Piewie, bischt zerick?
Nau hock dich uff der Poschde hie
Un sing dei Mariyeschtick.
Hoscht lang verweilt im Summerland,
Bischt seit Oktower fatt;
Bischt drunne aardlich guud bekannt?
Wie geht’s de Veggel datt?
‘S iss schee datt uff de Aarenschbeem:
Gell, datt gebt’s gaar kee Schnee?
Doch fiehlscht du als recht grank fer heem
Wann’s Zeit iss fer zu geh!
Bischt doch uns all recht willkumm do;
Denk, du bischt net zu frieh,
Der Mariye guckt emol net so -
Gell net, du glee Piewie?
Piewie, wu bauscht du des Yaahr hie?
Kannscht waehle, wu du witt;
Witt du am Haus en Bletzeli?
Ich deel dir’s willich mit.
Ich geb der neier Dreck fer nix,
Geilshaar un Flax un Helm;
Nemmscht’s eenihau! - Ich kenn dei Dricks,
Du schmaerder, gleener Schelm!
Des iss yuscht Schpass, mei Piewiefreind,
Ich rechel dich kee Dieb!
Hettscht mit meim Gold dei Nescht geleint,
Du waerscht mir yuscht so lieb.
En Fruchtyaahr unne dich, Piewie,
Waer wie en leerie Welt!
Dei Dinscht, mei liewes Veggeli,
Bezahlt mer net mit Geld!
Piewie, wie’n mildie Luft du bringscht!
Die Friehyaahrssunn, wie schee!
‘S gebt nau, weil nu mol mariyets singscht,
Kee Winderdaage meh.
Bin froh, du bischt zerick;
Nau hock dich uff der Poschde hie,
Un sing dei Mariyeschtick!
This article uses material from the Wikipedia Deitsch article Der Piewie, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Der Inhalt ist verfügbar unter CC BY-SA 4.0, sofern nicht anders angegeben. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Deitsch (DUHOCTRUNGQUOC.VN) is an independent company and has no affiliation with Wiki Foundation.