Ritmo Kombiná, tambe konosí komo Ritmo di Reino, ta un tipo di músika ku a originá na Kòrsou den añanan nobenta di siglo binti.
Ritmo Kombiná ta un meskla di diferente ritmo karibense, entre otro zouk, cadence, kompa, merengue, kaseko, salsa antiano i plena.
Supkategoria di | music of the Caribbean |
---|---|
Pais di orígen | Kòrsou |
Meskos ku salsa antiano ritmo kombiná a logra atkerí un lugá dentro di e músika popular antiano. Na komienso e ritmo tabata wòrdu toká riba un tèmpo bastante lihé. Den e último añanan diferente grupo ku ta toka ritmo kombiná a kuminsá baha e tèmpo i bini ku areglonan vokal. En general ritmo kombiná ta konsistí di tres tèmpo: tèmpo lento (di balada romántiko), tèmpo intermedio i tèmpo rápido ku ta usualmente toká na fiestanan i karnaval.
Na komienso di dékada 90 Gilbert (Gibi) Doran (1964), ya un konosido rei di tumba i lider di banda, ta inisiá su búskeda pa un ritmo nobo ku mester ta bailabel henter aña sin ta mará na un okashon òf temporada, manera ta e kaso ku tambú (fin di aña), tumba (karnaval) i seu (tempu di kosecha). E ta kuminsá studia diferente ritmo, entre otro pambiche (derivá di merengue), soca i tumba, ku e meta pa yega na kombiná nan. Despues di a eksperimentá tambe ku diferente instrumento i areglo e ritmo kombiná a desaroyá.
Na inisio hende tabata titulá e ritmo komo "bochincha", pero pokopoko otro bandanan tambe a kuminsá toka e ritmo kombiná den nan estilo, dunando esaki mas akohida. Na Aruba i Boneiru a kuminsá toka ritmo kombiná i na kuminsamentu di e siglo 21 ritmo kombiná a kuminsá ta dominá músika antiano popular, prinsipalmente na Kòrsou, kompletamente. E ta e tipo di músika mas popular na e Islanan ABC i tambe bou di Antiano i Arubianonan biba na Hulanda den e promé dies (10) aña di e siglo 21. Na 2010 René Rosalia, diputado di Kultura di Kòrsou, ta proklamá ritmo kombiná komo un di e géneronan musikal ofisial di Kòrsou. Tin un òf mas grupo na Venezuela tambe ku a wordu inspirá pa ritmo kombiná. Igualmente e konosido areglista merikano, Sergio George, a keda enkantá ku ritmo kombiná i esaki a inspir'é den algun areglo.
E promé eksponentenan di e género ritmo kombiná tabata e gruponan musikal Explosivos, GIO, ambos bou guia di Gibi Doran, i ERA Autentiko. Otro gruponan musikal konosí pa ritmo kombiná ta Guess, Tune Stret Konstant, EQO (Aruba), Q-Sign (Hulanda), Gio Fuertisimo (Kòrsou), Dreams (Kòrsou), Buleria (Aruba i Kòrsou), Cache Royale (Hulanda), Gentz, Dolce, TSean, OVega, Sonnos, NSTPLY i Cache Royale (Hulanda).
Fuente, nota i/òf referensia |
This article uses material from the Wikipedia Papiamentu article Ritmo Kombina, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). E kontenido ta disponé bou di CC BY-SA 4.0, a menos ku ta unique ta alkontrario. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Papiamentu (DUHOCTRUNGQUOC.VN) is an independent company and has no affiliation with Wiki Foundation.